Read Banggai TANO-TANO 9 Bible Online

TANO-TANO 9 - Banggai bible

TANO-TANO 9

¹Daano kooloyo meeng Abimelekh Gideon napau taus doi kota Sikhem tinano namondopulian natampat. Indaa yana basilingan tukon yanila, konabantilano,

²“Soba masadaikene doi sasaibino ko Sikhem tumbuno, inaando komo lobian konamondokan; kalu pitu kolono Gideon napau maparenta, kai tolongo meeng komian? Ingotiikene yanila koidan baikon yaku daano mopotaami puli tukon yanila.”

³Maka tausokai Abimelekh doi tinano pulinodoo doi Sikhem miano tukon pelenggene Abimelekh nateteba doi yanila. Maka do Sikhemoo tumbuno pomeenggono bantilan sulano napoo lainge Abimelekh, sabab konapoo pandapat yana takainomo daanoon mopotaami puli tukon yanila.

⁴Lapadoiya yanila beekene doi yana pitukolono kodoy suasa mo inala luwedoi bonua mososubaiyan Baal-Berit. Tukon dodoydoo Abimelekh matambo meeng komian tambuno mo lokis sulano napomeenggon tukon yana.

⁵Maka napoo taus doi tamano nakambung susuungo doi Ofra. Indaa yana akateyomo doutusodoo mo pitukolono doi meeng kobatu bunggono. Bai Yotam Gideon napau pioto aki natalalaing tangakate sabab yana basookon.

⁶Maka pototongimo sasaibino ko Sikhem tukon Bet-Milo tumbuno, maka taus doi kayung terpentin mo karamaton doi Sikhem. Indaa yanila sumbayo Abimelekh teali tomundo.

⁷Salataa lapa Yotam lengele dolanggedoo kaliangano, yana taus kokondong doi Gerizim Bunggulo bungkukono, maka wookon taambikon doi mianoo, “Ndongoliiyo yaku, eh Sikhem miano, sulano ko Mian Bisa koidan nandongoliiyo komuyu!

⁸Daano kokadadian meeng pototongimo kokayung-kayung naikon molilik tomundo motuuk doi yanila. Maka bantilo yanila doi kayung zaitun, ‘Tealimo tomundo doi kami.’

⁹Kayung zaitun timbiliyo, ‘Eh aki kuiyase. Sabab kalu yaku teali mutomundo, siokai kutade modaanokene kozaitun lisisono mo pinake tuuk odotiiyano kopilogot-pilogot tukon bangkapi.’

¹⁰Maka kayung-kayungoo bantile doi kayung ara, ‘Ikoomokai komo teali mai tomundo.’

¹¹Bai kayung ara timbiliyo, ‘Aki kuiyase, sabab tuuk teali mutomundo yaku sio kutade modaanokene koara saono mo mamaamis.’

¹²Salataa lapa doiya, kayung-kayungdoo bantilo doi angguroo batango, ‘Nah, ikoomo komo teali mai tomundo.’

¹³Bai anggur batango timbiliyo, ‘Bulaakai mosio kutade modaanokene koanggur mosanaanggene kopilogot-pilogot tukon bangkapi noano, tolongo tuuk tealian mutomundo!’

¹⁴Tobikon doiya bantilo sasaibino kokayung doi sonit lalomo, ‘Ikoomo tolongkai komo teali mai tomundo.’

¹⁵Dosonitoo lalomo timbiliyo, ‘Kalu komuyu tutuu yase tealikene yaku mutomundo, maimo posoop doi kukakuasaan lalomo. Kalu akipoo yase, maka luwedoi panga-panganggu mosoniton nia naikon tobuat koaung mo suayo kabus kokayung-kayung alas doi Libanon.’ ”

¹⁶“Nah,” Yotam bantile koikoidan, “Oilakai kalu Abimelekh sinumba teali tomundo, komuyukai pomeenggono doi namoloyosan tukon sanaang? Kai lapamo komuyu lakukene komo pantas doi Gideon, do tamanodoo tukon doi nakaluargaa? Kai lapamo komuyu balase kotamanggu najasa-jasa

¹⁷mo lapamo kakaate tuuk doi komuyu? Neneeke, yana lapamo bataanggene kobutongo tuuk naoluputano komuyu luwedoi Midian miano nakakuasaan.

¹⁸Bai diabudodoo komuyu mokusikene kotamanggu nakalualgaa. Konapau-pau lapamo komuyu akateo sasaibino - pitu kolono komian idanggon doi meeng kobatu bunggono. Abimelekh daanoon tamanggu napau luwedoi naata. Bai komuyu sumbayo yana teali tomundo Sikhem, tolongo sabab yana modaano konapotaamian puli tukon komuyu.

¹⁹Kalu komu kokubai oloyo nia tuuk doi tamanggu tukon dona kaluargaadoo bisa tukon sanaang, silakan basa-basanaang tukon Abimelekh, tukon batadikenemo yana nabasana-basanaang tukon komuyu.

²⁰Bai kalu aki nabuno doiya kohaalo, boliisi naluwedoi Abimelekh natobuat koaung mo suayo kabus ko Sikhem tukon Bet-Milo. Tukon boliisi naluwedoi Sikhem tukon Bet-Milo tumbuno natobuat koaung mosuayo kabus Abimelekh.”

²¹Salataa lapa doiya Yotam dambasene kobutongo maka dungol doi Beer, sabab yana matakutene Abimelekh doutusodoo.

²²Abimelekh maparentah doi Israel tolu kotaun konakalumbit.

²³Maka ko Temeneno lubatene kopomusuan doi antara Abimelekh tukon Sikhem miano tobikon yanila lawane yana.

²⁴Nalangge nia teali sulano natosoboli Abimelekh nakulokisan tukon Sikhem miano mo oluuliyo yana sulano naakateyo Gideon napau mo pitu kolonodoo.

²⁵Do Sikhem mianodoo obosiyo padagai-padagai doi bunggul bunggono sulano nalakoyo Abimelekh. Dopadagai-padagaidoo lambeke sasamba komian moaloi idoo. Maka dolanggedoo binontiikon doi Abimelekh.

²⁶Doi tempodoo Gaal Ebed napau lubato polaing-laing tukon utus-utuso sulano nadungol doi Sikhem; tukon ko Sikhem miano anggayo doi yana.

²⁷Yanila taus bapupui anggur doi anggur asi-asino, maka mokubai anggur mo ininum, tukon mokubai lamean. Yanila kaan inum doi lipu napoo mososubaiyan pilogot tukon basumba-sumbakene Abimelekh.

²⁸“Kita nia indee komaanano tobikon sio nda totuku doi Abimelekh?” Gaal bantile. “Konabisaan yanadoo indee komiano? Bolikonkai yana Gideon napau mo tukon Zebul nawakilloo tealimo Hemor naata, Sikhem tamano, nda mbumbu!”

²⁹Kalukai andeno yaku komo katuaiyo na Sikhem miano nia, tantu kabuso Abimelekh salitano! Naikon yaku bantile doi yana, “Ayo maju! Atulemo komusuludadu tukon maimo potobuat polobosi!”

³⁰Zebul, komo kuasaiyo kota Sikhem, teali nggimal salataa lengele Gaal nasalitadoo.

³¹Yana makapatu bobitokon doi Abimelekh doi Aruma sulano napelenggene nateteba nia, “Gaal Eber napau polaing-laing tukon utus-utuso lubato doi Sikhem tukon gololiiyo kotumbuno sulano nalawane ikoo.

³²Tobikon doiya, siokai ikoo tukon mumian potaus basookon doi asi doi tempo popook.

³³Namodoa dodoa kalukai sumboto kooloyo panano, lobosiyomo dokotadoo tukon tongodinggala. Tukon kalu Gaal tukon namian tobuat molawane ikoo, doiyamo kopoo todanan tuuk molobosiyo yana!”

³⁴Maka Abimelekh tukon sasaibino konasuludadu palabiok doi tempo popook. Yanila sasabul teali sangkap kotambuno maka taus sapit doi potikunggon kokota Sikhem.

³⁵Tukon soisobit salataa Abimelekh tukon namian-mian kitayo Gaal motobuat tukon kokondong doi kota tataapono mobabasal, yanila sasaibino tobuat luwedoi nalipu basookonan.

³⁶Gaal kitayo yanila, maka bantile doi Zebul, “Kitayo! Luwedoi bunggul bunggonodoo daano komian mo tokolu doisumai!” “Eh, doiyakai bolikon mian,” Zebul timbiliyo, “doiya tolongo bayang-bayangan doi bunggul.”

³⁷Maka Gaal bantile koidan, “Bisa! Daano komian mo tokolu luwedoi bunggul namotombingan, tukon meeng kotambuno koidan daanoon doisumaikon luwedoi tambikon kayung terpentin mo karamaton!”

³⁸Zebul bontiikene doi Gaal, “Nah, inaando diabudodoo domu banggaalanoo? Looluk komubantilano oila konatotuuk mosio nda totuku doi Abimelekh doo? Naiyamo komiano domu tinotulaidoo. Ayo maju lobosio yanila!”

³⁹Maka Gaal babayo tobuat ko Sikhem miano tukon lawane Abimelekh.

⁴⁰Bai Abimelekh lobosiyo yana sampe yana obulenggene kobutongo. Komian mo mate tongokoolo doi kota tataapono babasal salaano.

⁴¹Doibundu Abimelekh abali doi Aruma tukon tataapo indaa. Zebul siikayo Gaal tukon utu-utuso tobuat luwedoi Sikhem, tobikon doiya yanila aki namoola dungol indaa koidan.

⁴²Modoakon ko Sikhem miano tambuuno motinggale kokota, taus doi asi tukon dolanggedoo pinopitoikon doi Abimelekh.

⁴³Maka Abimelekh pototongikene konamian, tukon ebese yanila teali tolu kopasukan, maka yanila taus sapit doi naasi-asi. Salataa yana kitayo dokotadoo tumbuno lubotiiyomo koasi, yana tobuat luwedoi napoo basookonan maka akateo yanila.

⁴⁴Daanoon Abimelekh tukon napasukan mosobit-sobit kuasaiyo kokota tataapono mobabasal, lua konapasukan bailonggon lelenggene tukon akateo komian-mian mo obulen doi naasi-asi.

⁴⁵Abimelekh banggadudul polobosi momeenggon posopokon kooloyo tukon dungoliyomo dokotadoo, kotumbuno inakate, maka konakota minanaso doibundu tiniposii timuson.

⁴⁶Salataa komian-mian mo daano doi benteng Sikhem lalomo lengele dolanggedoo kaliangano, yanila usok doi kuil El-Belit buango lalomo taalikon doi bilit sulano napoo basoopon.

⁴⁷Maka komian popitoikene doi Abimelekh baikon komian doi Sikhem nabentengoo lapamo pototongi indaa.

⁴⁸Tobikon doiya, Abimelekh tukon namian taus doi Salmon bunggulo. Indaa yana mopotoli kayung langa-langaano tukon olowang, maka tanggunge langa-langaanodoo doi bengeno, lapadoiya sumboliiyo konamian koidan moso-mosobit nalakukene buno komo lapamo yana lakukene.

⁴⁹Maka yanila suwe-suwele mopotoli kayung langa-langaano, maka ampakon mololoi Abimelekh. Sasaibino kayungdoo langaano yanila atambune doi kuiloo buango bunggono maka yanila suayo, tukon do Sikhem doo miano daanoon doi lalomo. Tobikon doiya matemo sasaibino ko Sikhem tumbuno uga-ugaat soloon komala-malane tukon boine.

⁵⁰Salataa lapa doiya Abimelekh tauso doi Tebes. Yana lobosio tukon lambase dokotadoo maka yana dungoliyo.

⁵¹Doi kotadoo tanga-tangano daano komeeng komenara mo monggol. Maka sasaibino dokotadoo tumbuno obuleng imbali. Yanila usok doi menaladoo lalomo tukon supate kotataapono, maka liba doi bungguno.

⁵²Doibundu lubato Abimelekh idoo tuuk molobosiyo domenaradoo. Salataa yana polong doi menaradoo tataapono tukon iyasemo mosuayo,

⁵³ meeng koboine otuwongikene komeeng kobatu gilingan doi oluno bunggono tobikon mapasa kooluno tobongodoo.

⁵⁴Moso-mosobit Abimelekh monguang pamuda motanggunge kona sanjata tukon bantile, “Bubute komu sabel tukon akateomokai yaku; yaku aki kuiyase komian nabantile baikon boine komo akateyo yaku.” Maka dopamudadoo tebeke yana sampe mate.

⁵⁵Salataa ko Israel miano kitayo baikon Abimelekh momatemo, yanila sasaibino mule.

⁵⁶Bunomo doiya ko Mian Bisa nakokubai mobalese Abimelekh nakulokisan mo lakukanggenemo tuuk doi tamano, doi tempo naakateano kopitukolono koutus-utuso.

⁵⁷Tukon ko Temeneno hukume koidan ko Sikhem miano sabab yanila nakulokisan. Dolanggedoo tapaat tuuno buno komo lapamo Yotam Gideon napau bantile tentang yanila salataa nabatotopikanano yanila.