Read Banggai 2 YOHANES 1 Bible Online

2 YOHANES 1 - Banggai bible

2 YOHANES 1

¹Doi Tinano Mian Bisa mo lilikemo, tukon doi pau-pau tinano. Suratnia luwedoi yaku, katua jemaat mo bisa-bisa seange komuyu. Bolikon tolongo yaku, bai sasaibino komian mo tingoniiyo ko Mian Bisa mo bisa, seange komuyu koidan.

²Sabab Mian Bisa dungol doi noanggita lalomo, tukon naikon sidutu daano tukon kita sidutu-posidutukon.

³Boliisi kita nda binee balakaat, maasi tukon monondokan doi Mian Bisa Tama, tukon doi Yesus Kristus Tama Na Paudoo. Boliisi sasaibino doiya kita laate tukon noa mo moliyous tukon koidan naseang.

⁴Yaku laba tuuno baikon daano kopau-pau tinano mo tubo loloiyo ko Mian Bisa naotunggul, buno mo lapamo Mian Bisa Tama parentakene doi kita.

⁵ Tobikon doiya, Tina, yaku kabiyo tuuno sulano kita sasaibino nda poseseang. Komo yaku loolukene nia bolikon kai meeng koparenta mo boolu; parenta nia lapamo bineekon doi kita salataa doi nda tambuunan mangangga.

⁶Poseangan koalatino tubo loloiyo ko Mian Bisa naparenta. Tukon parentadoo komuyu mo lapamo lengele salataa doi tumbe doiyamo baikon komuyu sio potubo tukon seseange meeng tukon bailon.

⁷Badaang kopangakakon mosasabulo doi posaapon kodunia. Yanila daanokai mian-mian mo aki naanggayo baikon Yesus Kristus lubat doi dunia pokakana buno meeng kobanggapi. Mian mopokakana doiya daano meeng kopangakakon tukon Kristus na Musu.

⁸Tobikon doiya, podagaiyo inai nateali lapus doi komuyu oila komo lapamo kami usahakanggene motuuk doi komuyu. Pousahakanggene sulano potalimayo kopatambo sasaibino luwedoi Mian Bisa.

⁹Mian mo aki nabataani doi Kristus naotunggul, bai tolongo isa doi oilamo Kristus nainotunggukon, doiya mianoo akiyo kona Mian Bisa. Mian mo tataap loingiyo doi Kristus naotunggul, koalatino daano ko Mian Bisa Tama mau Na Pau.

¹⁰Tobikon doiya, kalu daano komian molubat tukon pailukene doi komuyu kootunggul Kristus mo aki naotunggulkene, inai potalimayo doiya mianoo doi pobonua lalomo kai beena pongodotii doi yana.

¹¹Sabab komian mo mebee pongodotii doi mianoo mo buno doiya turut koidan buno mianoo mo kubaiyo kokokubai mo lokis.

¹²Badaang tuuno komo palaluu yaku pailukene doikoo, bai kupikikene lobian monondok inai natolongo surat. Yaku moinikene sulano namoola kulubat tukon pobasalitai doi komuyu, sulano konoanggita laba-laba tuuno.

¹³Pau-pau moluwedoi utus boine Tinano Mian Bisa molilike koidan makapatu pongodotii doi Tina.