Read Banggai YUDAS 1 Bible Online

YUDAS 1 - Banggai bible

YUDAS 1

¹ Utus-utus mo lapamo inuang tukon Mian Bisa Tama nasineang tuuno, tukon modinagai tuuk Yesus Kristus. Salaku Yesus Kristus napeleleani, yaku, — Yudas — Yakobus utuso,

²moinikene: Boliisi ko Mian Bisa nabeena balakaat, maasi tukon namondokan doikoo tukon nalobi-lobianan.

³Utus-utus mo sineang! Daku makisuut tutuu motulis kosurat doikoo kokasalamatan tentang kita toupiyomo singgat-singgat. Bai budodoiya yaku lasayo buno sinumbolii sulano otinauwo komuyu tukon suratnia sulano komuyu pobagadudul kakate tuuk manganggaan mo lapamo idan ko Mian Bisa nabeekene tuuk sidutu-posidutukon doi namian.

⁴Sabab aki nda sadariyo, daano ko mian-mian motantu kokulaing usok doi kita tanga-tangano. Yanila mian-mian molokis mo bakala-kalakene bilita tentang ko Mian Bisa namaasi doi kita, sulano namalaat todanan sabukene kona pai noanoila napisuu. Tukon yanila tolake Yesus Kristus, komemeengo Balakuasa tukon nda Temeneno. Doi loolukoo ukuman tuuk doi yanila lapamo pinopitoikon doi Kitab Moliyous lalomo.

⁵ Sasaibino lapamo komuyu toiyo. Bai yaku yase ingotiikene komuyu bulaando ko Temeneno nasalamatanano ko Israel miano kaliangano moluwedoi tano Mesir, bai doibundu lopue ko mian-mian mo aki namangangga doi antara yanila.

⁶Neneeke koidan komalaekat mo liisiyo kosipat yanila nabalakuasaan, tobikon taus tinggale yanila nalipu dungolan. Ko Mian Bisa boboiyo do malaekat-malaekatoo tukon rante moaki nabontol-bontol, doi lipu mokalipookan doi buta lalomo. Idoo yanila tinaan banggadudul polong yanila kinonoi ukuman doi Oloyo mo hebat tuuno.

⁷ Neneeke koidan kota Sodom tukon Gomora tukon kota-kota potikunggon, kotumbuno kubaiyo kolangge-langge buno malaekat-malaekatoo nakinubai. Yanila kubaiyo kolangge-langge balolowaan tukon molokis, tobikon yanila sinakisaa tukon inukum aung mo akiyo kona posoan, sulano tinealikon poingotii doi sasaibino komian.

⁸Bunomo koidan do mian-mianoo dongo-dongolo polong yanila kubaiyo kolalim doi yanila butongo susuungo. Yanila kitayo ko Mian Bisa nakakuasaan lendah tukon totulaiyo sasaibino komahluk monondok doi surgaa.

⁹ Mikhael susuungo, mo kapalaiyo komalaekat-malaekat, aki nabiasa mokubai buno doiya. Doi tempo yana pogagai tukon Ibiliis doi ponggimakonan lalomo tentang indeemo naikon komo laate Musa bajano, Mikhael aki nabarani hakimiyo Ibiliis tukon bantilan-bantilan totulai. Mikhael tongo bantil, “Temeneno naikon odinggayo ikoo!”

¹⁰Bai tukon totulai-totulai, do mian-mianoo lobosio sasaibino kolobo mo aki napo alatio. Yanila pokakana buno iyayon-iyayon mo akiyo kona pikilan, mo toiyo kolangge-langge tukon namotoiyan. Bai tongo doiya langge-langgedoo kubaiyo yanila silaka.

¹¹ Silakamo yanila! Yanila lapamo loloiyo Kain naloloon. Sulano namalaat doy, yanila usekene kobutongoila doi susaan lalomo pokakana buno Bileam. Tukon yaniladoo minanaso sabab nggimal buno Korah.

¹²Doi tempodoo komuyu kubaiyo kolamean kaanan, mian-mianoo nasikap manganikene toluwe doi antara komuyu. Sabab yanila kaan tukon modoko aki namamaa, tukon tongo utamakene kobutongo susuungo. Yanila buno bunom mbombuul mo puule, bai aki nalubatene koudan. Yanila koidan buno kayung mo akiyo kosaono mau kai doi tempo kayung nasao-saowan; kayung-kayung mo lapamo kinubut koanggolo tukon matemo tuuno.

¹³Pokakana buno bokol mo makansang doi tobun, mobukal bunomo koidan yanila mobukal-bukal kokubai-kokubai mo minamaakon. Yanila buno bituwon-bituwon pauno mo tasabul tukon mo lapamo Mian Bisa sadiakene kona tangabosan doi kalipookan lalomo mo kulokis tuuno sidutu-posidutukon.

¹⁴ Henokh, Adam natulunan kopituno, looluk biasa popitoikene do mian-mianoo kaliangano. Henokh bantile, “Kitayo, Temeneno naikon lubat tukon doi loloon-lonoono Namalaekat moliyous

¹⁵tuuk hakimiyo sasaibino komian. Temeneno naikon ukume sasaibino ko mian-mian molokis sabab yanila nakokubai-kokubai mo kulokis. Tukon Yana naikon ukume komian mokubaiyo kolalim tukon palalentel sabab sasaibino kona pobinantil pototulai.”

¹⁶Mian-mianoo sidutu nggimal-nggimal tukon asalakene komian bailon. Yanila tubo tulutiyo kona pomongiasan mo baladosa. Yanila babanggaalkene kobutongo susuungo tukon akakene komian sulano namalaat kauntungan.

¹⁷Bai Utus-utusonggu mo sineang, neneeke naikon oila loolukoo nda Temeneno Yesus Kristus Narasul-rasul nabinantil.

¹⁸ Yanila loolukonoo bontiikene doikoo baikon naloolanian kolonu napupusan naikon sumbot ko mian-mian mo sosiboliiyo komuyu, doiyamo mian-mianoo mo tubo tulutiyo kona pomongiasan mo baladosa.

¹⁹Yanila naiyamo ko mian-mian badaang mo sumbetene kopooalaasan. Yanila aki nakinuasai Mian Bisa Na Roh, bai dunia nia nandondoong kona minoo-minooton.

²⁰Bai komuyu, Utus-utusonggu, didike banggadudul komu tuboan lengget doi mumanggaan doi Yesus Kristus. Do mumaangganoo moliyous tuuno. Sambeang loolukon tukon Mian Bisa Na Roh nakuasa,

²¹tukon potubomo sidutu doi Mian Bisa naseang lalomo doi nadaanoan komuyu mototiili nda Mian Bisa Yesus Kristus namaasi, naikon mo bineekon doikoo tuboan mobisa tukon posidutukon.

²²Doi mian-mian maragu-ragu konoano, siokai komuyu tudoikene koposeangan.

²³Kibute komian natabuat doi aung lalomo tuuk salamatene yanila. Doi mian-mian bailon siokai komuyu tudoikene koposeangan polainggene kopalasaan matakut, bai mosikitene kai tukon yanila napakean mo lapamo kinonggiliti tukon yanila namongiasan mo baladosa.

²⁴Mian Bisa komo moola madagai sulano komuyu akipo tuwong, tukon mo moola babayo ikoo doi nakakuasaan mo babasal tukon nasanaangan moakiyo kososiboliino,

²⁵yanamo ko Mian Bisa momeeng, Pasalamaton kita mololoi doi Yesus Kristus nda Temeneno. Yanamo ko Mian Bisa mo monondok, babasal, balakuasa tukon inangga doi loolukoo polong budodoiya tukon tuuk sidutu-posidutukon! Amin.