Read Banggai RUT 1 Bible Online

RUT 1 - Banggai bible

RUT 1

¹Doi lolukonoo ko Israel moakiyoon nadaano komeeng kotomundo, kotano Kanaan tinepak balaa malaalan. Doi tempodoo daano komeeng komalane kosambuno Elimelekh. Yana konaluwean doi Efrata miano, tukon dungol doi Betlehem doi Yehuda nalipu. Sabab dobalaadoo malaalan, tobikon doiya Elimelekh tukon konaboloki, Naomi tukon konapau malaneno lua; Mahlon tukon Kilyon yanila tauso doi tano Moab. Tukon yanila dungolo indaa. Doi tempo napo daanoan indaa, Elimelekh matemo.

³Jadi bainokai Naomi tukon donapaudoo molua komo daanoon.

⁴Donapaudoo molua osowaano powala tukon boi-boine Moab, kosambunoila doiyamo Orpa tukon Rut. Sambuno songulo kotaun doibundu,

⁵Naomi napaudoo malaneno molua, matemo koidan, tobikon doiya Naomi akiyono konalangkai tukon donapaudoo molua.

⁶Sambuno bubula kotempo doibundu Naomi lengelemo baikon ko TEMENENO balakaatiyomo ko Israel miano nalangge-langge sinakakon tukon badaang kohasilo momonondok. Tobikon doiya Naomi tukon donamoniananoo molua yanila batotobomo mootinggale ko Moab.

⁷Yanila lengget polaing-laing mule doi Yehuda. Doi loloon tanga

⁸Naomi bantile doi namoniananoo molua, “Tadukai pomulemo doi tinamuyu nabonua. Boliisi ko TEMENENO nakitayo monondok komuyu pokakana koidan komuyu mopokindokon yaku tukon tuuk doi yaniladoo mo matemo.

⁹Boliisi ko TEMENENO nadaanoon mobeena jodoh doi komuyu sulano pobaruma tangga koidan.” Sambuno lapa mobantile bunodoiya, maka Naomi palamisimo doi yaniladoo maka naumayo yanila. Bai Orpa tukon Rut yanila kokiil kokobukuan,

¹⁰tukon yanila bantile doi Naomi, “Aki, Tina! Kami yase momalaing Tina moampakon doi Tina nabangsa.”

¹¹Naomi timbiliyo, “Pau, inai! komuyu tadukai pomule. Oila kogunano komuyu molaingaku? Sulano potoiyo yakunia akimo kumosuung pau koidan sulano nateali polangkai?

¹²Naomi bantile koidan, pau, pomulemokai, sabab yaku motuamo tuuno akimo namoola kuosowaan koidan. Kalu andeno yaku daanoon moola osowaan tukon kuosowaan doi popokia koidan tukon kumalaat pau mala-malaneno,

¹³kai moola pototiiliyo sampe nababasal? Bulaando motongo doiya langgedoo moakimo poiyase osowaan tukon mian bailonggon? Komuyu dakupau inai, inaikai pobunodoiya! Oila kopotinoupi yaku lasayo susah sabab ko TEMENENO nahukuman doiyaku.”

¹⁴Rut tukon Orpa yanila kokiil kokobukuan koidan tukon doibundu Orpa molisaamo maka yana umayo donamoniananoo boine tukon doibundu yana mulemo. Bai Rut aki naiyase pobabandakon donamoniananoo.

¹⁵Naomi bantile doi yana, “Rut, kitayokai! Komuandalan mulemo doi nabangsa tukon doi na temeneno. Ikoo dakupau, malaingo yana momule!”

¹⁶Bai Rut timbiliyo, “Tina, inaikai mosumboliiyaku mule tukon mootinggale Tina! Yaku yase momalaing tukon Tina. Inaandokai Tina natausan idoomokai daku tausan. Inaandokai Tina nadungolan, idoomo daku yasano dungol. Tina nabangsa, doiyamo dakubangsa. Tina na Mian Bisa sinosubai doiyamo naikon dakusinosubai koidan.

¹⁷Inaandokai Tina namatean, idoomo koidan daku yasano mate tukon tinadin. Kandati ko TEMENENO nahukumaku tukon hukuman mo motoong, bai aki kuiyase pobabandakon tukon Tina, alaasene matean komo pobabandakene kita!”

¹⁸Sambuno Naomi kitayo baikon Rut tataap kakatikas momalaing, jadi, akimo namabantilan-bantilan bai-bailonggon.

¹⁹Doibundu yanila banggadudukene konapoampakonan polong doi Betlehem. Salataa yanila polong indaa, sasaibino dokotadoo tumbuno masainding. Sasaibino koboine indaa yanila bantile, “Kai tutuu yanamo nia Naomi?”

²⁰Naomi bantile, “Inaimokai moungaku Naomi, bai uangakumo Nggimal, sabab ko Mian Bisa Mo Babasal Konakuasa batadikanakumo tubo doi sakisaa lalomo.

²¹Salataa yaku taus luwe naimbaa badaang daku lolonggu, bai diabudoo ko TEMENENO babaaku tukon limanggu sousongulo. Tobikon doiya inaimo pouangaku koidan Naomi, sabab ko TEMENENO Mo Babasal konakuasa hukumakumo luwedoi kasusahan mobadaang tuuno!”

²²Bunomokai doiya kosalitano bulaando Naomi naabalian luwedoi Moab polaing konamonianan Rut do Moabpoo miano. Konapopolongan doi Betlehem pososinggat konatambuunan komian mobapadak gandum.