Read Banggai RUT 2 Bible Online

RUT 2 - Banggai bible

RUT 2

¹Naomi daano kona anggota kaluargaa meeng moluwedoi nalangkai, Elimelekh, nadaok. Domianoo kaasa tukon inodotii. Kosambuno Boas.

² Daano kooloyo meeng Rut bantile doi Naomi, “Tina, yaku molisaamo motaus doi yasi sulano kumopuluti gandum motuwong doi sasaibino komian mobapadak limano. Yaku pikikene daano komian mobatadikanaku kulakukanggene dolanggedoo.” Naomi timbiliyo, “Monondoko, Pau! Tausokai!”

³Sambunolapadoiya Rut tauso doi asi tukon mopuluti gandum tuunduwo sasaibino komian mo bapadak. Tukon doasidoo natausan Boas koona naasi.

⁴Doibundu aki namalumbit lubato Boas luwedoi Betlehem tukon beena adat sasaibino komian mobapadak. “Boliisi ko TEMENENO naloolainge komuyu,” konabantilano. Sasaibino domianoo mobapadak timbiliyo, “Boliisi ko TEMENENO nabalakaatiyo Tama.”

⁵Doibundu Boas sadaiyo konamandor, “Indee komiano ndaiya boinedoo?”

⁶Domandoroo timbiliyo, “Yana bangsa Moab boineno mosodo lubat polaing Naomi mo luwedoi tano Moab.

⁷Yana molisaamo doiyaku sulano naminolaakon momotuundu doibundu doi sasaibino komian mo bapadak sulano namopulut gandum motuwong doibuta. Salataa dowa-dowa yana balimang momeenggon, tukon sodo diabudodoo maka natade mobausoli soisik doi sandung.”

⁸Doibundu koidan Boas bantile doi Rut, “Coba lengele loluk. Maunaaki mutaus momopulut gandum doi mian bailonggon naasi. Mopuluto tolong naimbaa polaing sasaibino dakupolimang boineno. Palatikanggenekai inaando konapo tausan mobapadak. Sio mutuunduwo momeenggon doi yanila tukon inai mododoonggon doi yanila. Kalu ikoo molou, mangalamokai paisu doi gumbang molapamo sasaibino kopolimang mala-malaneno ontokiyo. Yaku lapamo bontiikene doi yanila sulano naaki napo ngganggukon.”

¹⁰Salataa Rut lengele doiya, yana somba doi Boas salaano tukon bantile, “Tama, aki kumoola momantalima kokubai mobuno doiya konamonondokan moluwedoi Tama. Yakunia mian molulubaton tukon aki napantas Tama mopopusinggon yaku!”

¹¹Boas timbiliyo, “Yaku lapamo lengele tentang sasaibino kolangge molapamo ikoo lakukanggene motuuk doi mumonianan boine salataamo doi mulangkai namatean. Yaku toiyomo baikon ikoo otinggalemo komu orangtua tukon komu lipu sinuungan sulano mulubat tukon dungol naimbaa podungoli komian mo akiyoon mutingoniiyo.

¹²Boliisi ko TEMENENO nabalase sasaibino komu monondokan. Boliisi mumantalima oila komo pantas ko TEMENENO, Israel na Mian Bisa nabineekon doikoo, sabab ikoo lubato mosoop doi yana!”

¹³Rut timbiliyo, “Tama tutuu monondok doiyaku, maukai naaki kupokakana Tama napolimang bailon. Tama namonondokan konoano hibure tuuno konoanggu.”

¹⁴Sambuno laate kotempono kokaanan, Boas bantile doi Rut, “Maimokai ndakaan. Naiya kopapanaso.” Sambuno buno doiya Rut kaano posinggat-singgat tukon Boas napolimang. Boas koidan beena gandum mopinanggang, tukon Rut kaane pobobosukon. Salataa lapa kaan, daano koidan kolabino.

¹⁵Doibundu koidan Rut tauso momopulut gandum. Salataa yana taus, Boas bontiikene doi sasaibino konapolimang, “Kalu yana mopulut gandum molapamo pinagot, pobatadikenemo namopulut. Inai pomokubaikene maa kai ponggimoliiyo. Tadukai posangajaiyo momobubut gandum soisik molapamo binoboi, tukon potuwenge sulano napulutiyo.”

¹⁷Rut banggadudul momeenggon momopuluti gandum popolonggon kinobian. Salataa yana umbas-umbasene dogandumoo batango sulano natoliat kobatu-batuno doi batango, uga-ugaate 10 kokilogram Rut kona kinombul.

¹⁸Sambuno lapa mobapuluti gandum yana mulemo doi kota tukon babayomo donagandumoo pinuluti tukon yana tudoikene doi namoniananoo boine bulaa konakadaang kona gandum pinulut. Tukon yana koidan beekene doi konamonianan dokinannoo labino mo aki nakabus yana kaane tukon Boas.

¹⁹Sambuno yana beekene maka Naomi bantile doi yana, “Naiya sasaibino inaando komu laatano? Indee naasi komu balimangan doi oloyo nia? Boliisi ko Mian Bisa nabalakaatiyo domianoo mo monondok konoano doikoo!” Sambuno buno doiya Rut salitaikene doi Naomi baikon koasino kona mopulutian dogandumoo doiyamo Boas naasi.

²⁰ “Pau, domianoo pulinggita mo loolani tuuno,” Naomi nabantilano. “Yanamokai komo ulusiyo kita. Boliisi ko TEMENENO nabalakaatiyo yana. Ko TEMENENO tataap tapaatiyo Konaamal, mau doi mian modaanoon motubo maukai doi mian mo matemo.”

²¹Doibundu Rut bontiikene koidan, “Tina, domianoo bantile koidan baikon sio kumopuluti momeenggon dogandumoo polaing-laing sasaibino konapolimang sampe donaasidoo hasilo lapa pinadak.”

²²Naomi timbiliyo koidan doi Rut, “Oode, pau takainomokai tadukai mupobalimanggono tukon polimang boi-boine doi Boas naasi. Sabab, kalu ikoo taus balimang doi mian bailonggon naasi, komian moola naganggukon indaa!”

²³Tobikon doiya, Rut tataap momeenggon momalaing kopolimang boi-boineno mo balimang doi Boas naasi. Rut mopulut gandum doi Boas naasi polong pokabuson tapadak — mau motapadak tumbeno maukai motapadak doibundu. Doiya kosinggato Rut tataap mopodungoli donamoniananoo boine.