Read Banggai RUT 3 Bible Online

RUT 3 - Banggai bible

RUT 3

¹Doibundu bubula kotempo koidan, Naomi bantile doi Rut, “Sio kukakaate momouboliikonggon langkai koidan sulano musanaang.

²Ikookai balimang polaing-laing tukon Boas napolimang boi-boineno doi naasi? Jadi, doi Boasoo doiya pulinggita. Sobakai lengele! Napopokia yana naikon taus pipikiyo kogandum doi naasi.

³Diabudodoo mansaumo, pakeyomo komu pakean mo monondok tuuno tukon mapake minyak-minyak mo babangi. Kalu ikoo lapamo bapake maka mutaus doi naandomo Boas nadaanoan mobalimang mopoalaasene kogandum doi kuwongo. Totiliyomo idoo sampe nalapa kaan tukon inum, bai inai natoiyo ikoo modaano idoo.

⁴Palatikanggenekai inaando konatausan moolo. Kalu yana tombosookono, pakono idoo maka mubukayo kona toik ngguloson, maka mumoolo doi naloolanian koaino. Pasti yana naikon bontiikonggon oila komo sio mulakukanggene.”

⁵Rut timbiliyo, “Tina, doiya monondok, sasaibino doi tina nabinantiloo yaku naikon lakukanggene.”

⁶Sambuno lapa doiya Rut tauso doi mian natampat balimangan mopupuiyo kogandum doi kuwongo. Salataa Rut polong indaa yana lakukanggene sasaibino konamonianan boine napinalentakon.

⁷Sambuno lapa Boas kaan tukon inum, yana lasayo kambul tukon sanaang konoano. Doibundu yana tauso momoolo doi naloolanian kogandum nainatambunan. Rut tukon aki nabiyok-biyok lubat tukon bukayo Boas natoik ngguloson, maka nabamoolokon doi naloolanian koaino.

⁸Salataa pintanga kopopook sosinggot Boas tabangun tukon palese kobutongo. Yana masainding salataa nakitayo daano komeeng koboine mo moolo doi naloolanian koaino.

⁹Boas sadaiyo, “Indee ikoo?” Rut timbiliyo, “Tama, yaku Rut! Tama daanokai pulinggami moloolani mo sio nauluse nakutuboan nia. Tadukai mualaaku sulano nateali Tama naboloki.”

¹⁰Boas bantile, “Ikoo dakupau, boliisi ko TEMENENO nabalakaatikon. Kalu pinokakanakon tukon oila komo lapamo ikoo lakukanggene doi mumonianan boinedoo, komukokubai diabudodoo nia otudoikene doiyaku komeeng kokokila mo babasal koidan. Ikoo moola mumoumbolii langkai motabokon doi mian mo kaasa kai doi mian motalalais, bai doiya aki mulakukanggene.

¹¹Tobikon doiya, Rut, inai momolili. Sasaibino domukakabidoo yaku naikon laksanakanggene; sabab sasaibino komian doikota nia toiyo baikon ikoo daanokai meeng koboine mo monondok konoano.

¹² Takainomo tutuu, sio kuuluse komutuboan, sabab yaku nia pulimu mo loolani. Bai daano koidan komian bailon mosio nauluse komutuboan. Tukon doi yanadoo puli mo loolani tuuno doiyaku.

¹³Napopookia dungolo looluk naimbaa. Namodoa dodowa maka naikon kusadaiyo oilakai yana yase mouluse komutuboan kai aki. Kalu yana yase, monondoko; bai kalu aki naiyase, maka yaku paladandi tukon Mian Bisa sambuno motubo, yaku naikon uluse domutuboanoo. Diabudoo moolomo naimbaa polong dodowa.”

¹⁴Doibundu Rut moolomo idoo loolani Boas aino. Modoakon dowa-dowa soono, Rut banguno sulano naakiyo komian mokitayo. Sabab Boas aki nayase nadaano komeeng komian motoiyo baikon Rut molubat doi tampatoo.

¹⁵Boas bantile koidan doi Rut, “Liatemo komusalendang tukon beleatenemo naimbaa.” Maka Rut liatemo konasalendang tukon beleatenemo. Sambuno lapa mobeleatene maka Boas kundongiiyo gandum doi salendangoo lalomo uga-ugaate luakolono kokilogram. Boobus koidan yana binggatemo maka naabese doi Rut bengeno. Sambuno lapa doiya Boas tauso doi kota.

¹⁶Salataa Rut polong doi bonua, konamonianan boine sadaiyo yana, “Oilamo komo teali, pau?” Maka Rut basalitakene sasaibino oila Boas nalinakukanggon doi yana.

¹⁷“Tukon,” Rut banggadudukene konabantilan, “sasaibino nagandumia yana komo beekanaku, sabab konabantilano yaku aki kumoola mule doi Tinanggu tukon limanggu sousongulo.”

¹⁸Maka Naomi bantile, “Totiiliyomokai, pau, bulaando komu kitaano naikon nalangge nia konapupusan. Boas aki natongo batingaakon tolong kalu akiyoon naalapayo napalakala nia doi oloyo nia.”