Read Banggai 1 SAMUEL 1 Bible Online

1 SAMUEL 1 - Banggai bible

1 SAMUEL 1

¹Daano komeeng komala-malane, kosambuno Elkana, luwedoi Efraim nabenseno. Yana dungol doi kota Roma, doi Efraim nalipu bunggulo. Elkana doiyamo Yeroham napau tukon Elihu natumbu. Yana tongusokon Tohu nakaluargaa, akaitan moluwedoi Zuf nakaluargaa.

²Elkana lua konaboloki, Hana tukon Penina. Penina daano konapau, bai Hana akiyo.

³Sasamba kotaun Elkana taus luwedoi Roma sulano nakaleda doi Silo tukon mososubakon sosuba doi TEMENENO Mo Babasal kona kuasa. Komo teali TEMENENO naimam doi Silo doiyamo Hofni tukon Pinehas, Eli napau-pau.

⁴Sasamba luunggon kalu Elkana mososubakon sosuba, Penina tukon sasaibino konapau suwe-suwele binee soobos sembeleng luwedoi sailo mo sinosubakon.

⁵Bai Hana tongo binee soobos tolong sabab ko TEMENENO aki nabeena pau doi yana. Maukai nabuno doiya Elkana kilakene tuuno Hana.

⁶Penina sidutu totulaiyo tukon osokitiyo Hana noano, donamoluwedoo, sabab ko TEMENENO aki nabeena pau doi yana.

⁷Dolanggedoo teali luwedoi taun paisoboli kotaun; kalu yanila taus doi TEMENENO Na Bonua, sidutu Penina osokitio Hana noano. Biasa teali Hana kokiil tukon aki naiyase kaan sabab yana tinotulay.

⁸Maka sasamba lunggon koidan Elkana, nalakai, masadai, “Bulaando ikoo mokokiil Hana? Bulaando ikoo mo aki muiyase kaan tukon banggadudul poloon tolong? Baanggokai yaku aki kulobian koanggano doikoo luwedoi songulo kopau mala-malaneno?”

⁹Daano kooloyo meeng salataa yanila lapa kaan doi TEMENENO Nabonua doi Silo, Hana kokondong luwedoi meda kaanan. Doiya kotempono Imam Eli komo daano koidan doi TEMENENO Na Bonua, daano moosulang doi nakadela loolani kotataapon. Tukon poloon tuuno Hana sambeang doi TEMENENO tukon kokiil odi-odi.

¹¹ Lapadoiya Hana bantile ko napaladandian, konabantilano, “TEMENENO Komo Babasal kona kuasa, palatikanggene namuata nia! Kitayokai komu ata nasakisaawan. Neneeke domu ata tukon inai motoliminggene komuata! Kalu ikoo beena doi muata meeng kopau mala-malane, ata paladandi naikon beekene yana doikoo pomatekon. Ata paladandi koidan baikon konabuuk aki namoola naikon pinatol.”

¹²Malumbit tuuno Hana nasambeangan, tukon Eli palatikanggene boinedoo suungo.

¹³Hana sambeang doi noano lalomo, jadi tolongo suungo bibilo komo biyok-biyok, bai koalalo aki nalongol. Tobikon doiya Eli anggene yana malangu.

¹⁴Maka Eli bantilo doi yana, “Bulaando ikoo momalangu naimbaa! Inaimo momonginum anggul koidan!”

¹⁵Bai Hana timbiliyo, “Yaku aki kumalangu, Tama, yaku aki kumonginum anggul! Yaku manasal, tukon daano mosambeang salitayo sasaibino daku sakisaawan doi TEMENENO.

¹⁶Inaimo poangganaku moluko balolowa. Yaku sambeang buno nia sabab yaku poloon tuuno.”

¹⁷Maka Eli bantile, “Kalu buno doiya mulemo tukon salamat. Boliisi ko Israel na Mian Bisa nadaanokene komu kakabi.”

¹⁸Sambuno lapadoiya Hana timbiliyo, “Boliisi kulaate Tama napalasatujuan.” Yana taus, maka kaan; tukon yana akimo napoloon koidan.

¹⁹Modoakon kooloyono Elkana tukon nakalualgaa bangun dodoa, tukon salataa lapa bakaleda doi TEMENENO, yanila mulemo doi Rama. Maka Elkana pokoloi tukon Hana, donabolokidoo, tukon ko TEMENENO daanokene Hana nasambeang.

²⁰Boinedoo tianan tukon mosuung pau malaneno. Yana sombuikene Samuel, konabantilano, “Yaku lapamo kabiyo luwedoi TEMENENO.”

²¹Laatemo kotempono Elkana tukon nakaluargaa taus doi Silo koidan namososubakon sosuba taunan doi TEMENENO. Sangalaasan doiya Elkana lapamo paladandi sulano namososubakon sosuba mo tangalaas.

²²Bai diabudodoo nia Hana akimo namalaing. Yana bantile doi nalakai, “Sioh naakimo nasusu, Samuel naikon yaku antekene doi TEMENENO Nabonua, tukon yana naikon dungolo indaa pomatekon.”

²³Elkana timbiliyo, “Monondoko, lakukenemo oila komu kinita monondok; dungolokai doi bonua polong laate kotempono dondapaudoo akimo nasusu. Tukon boliisi ko TEMENENO nakubaiyo komupaladandian nateali tokita.” Jadi, Hana dungol doi bonua polong laate kotempono dona paudoo akimo nasusu.

²⁴Sambuno lapa Samuel akimo nasusu, kotinano antekene yana doi TEMENENO Na Bonua doi Silo. Doi tempodoo yana daano mopoipoisik tuuno. Hana mababa koidan meeng kosapi langgilo kona umur tolu kotaun, gandum songulo kokilogram, tukon meeng kopulukon kulit koantoko moono anggul.

²⁵Dosapidoo kinolot, maka Samuel inantokono doi Eli.

²⁶Hana bantile doi Eli, “Maaf, Tama. Daano Tama moneneeke yaku? Yakumo nia koboine Tama mo biasa kitayo mokokondong naimbaa mo daano mosambeang doi TEMENENO.

²⁷Naiyamo dopaudoo yaku mokabiyo luwedoi TEMENENO. Daku sambeang lapamo dinaanokon,

²⁸tukon tobikon doiya napau nia yaku beekene sulano nateali TEMENENO koona polong pomatekon.” Sambuno lapa doiya yanila bakaledamo doi TEMENENO.