Read Banggai 1 SAMUEL 10 Bible Online

1 SAMUEL 10 - Banggai bible

1 SAMUEL 10

¹Doibundu Samuel mangala mangabosan paisu koantoko zaitun lisisono, maka kundongiikene dolisisonoo doi Saul oluno bunggono, tukon yana umayo Saul maka bantile, “Ko TEMENENO lapamo oduduke ikoo teali tomundo doi naumat Israel. Ikoo naikon palentayo konamian tukon dagaiyo yanila luwedoi napoo musuh-musuh. Naiyamo komu paloosan baikon ko TEMENENO molapamo lilike ikoo teali tomundo doi namian:

²Lapa ikoo tinggalaku doi oloyo nia, ikoo naikon pososuung tukon lua komala-malane loolani Rahel kibulo doi Zelzah doi Benyamin nalipu. Yanila naikon bantile doikoo, bunonaiya: Keledai-keledaidoo muinumboliidoo pinosuunggono. Diabudodoo tamamu akimo namolili koidan iyayon-iyayonoo kaliangano, bai banggadudul masadai oila komo sio nailakukanggon tuuk posuunggene ikoo.”

³Samuel bantile koidan, “Luwe idoo ikoo ampakon banggadudul polong doi kayung bakaledaan doi Tabor. Imbali ikoo naikon pososuung tukon tolu komala-malane mo daanoon mosasalaane ko Betel tuuk mososubakon sosubakon doi Mian Bisa. Meeng komian babayo tolu kombembe napau, komeeng komian koidan makanggi taku koantoko anggur.

⁴Yanila naikon beena salam doi komuyu tukon ikoo naikon binee lua koroti mo sio mutalimayo.

⁵Nalapa doiya ikoo sio mutaus doi Mian Bisa nabunggul doi Gibea, tampat Filistin nabasandungan. Doi tataapon usokan doi kota, ikoo naikon pododuang tukon meeng kotambuno konabi mo obulus luwedoi bunggul basosubakonan. Yanila osu-osuleng tukon wowookon, bagambus, rebana, basuling tukon bakasapi.

⁶Doi tempodoo koidan ikoo naikon ko TEMENENO Na Roh kuasaikon tukon ikoo naikon malaing moosuleng-osuleng tukon yanila nawookonanoo, maka ikoo binee sifat soodo tobikon teali banggapi bailon.

⁷Kalukai sasaibinodoo tealimo, lakukanggenemo oilamo tolong komu inomii monondok, sabab ko Mian Bisa lolaingemo ikoo.

⁸Lapa doiya ikoo sio mutaus doi Gilgal tukon mototiili pitu kooloyo indaa. Yaku naikon lubat tuuk mososubakon sosubakon mo sinua tukon sosubakon podamean, tukon popitoikene doi komuyu oila komo sio mukubaiyo.”

⁹Soisobiton salataa lapa Saul tinggale Samuel, Saul matalima sifat soodo luwedoi Mian Bisa. Tukon sasaibino kolangge Samuel nabinontiikon doi yanadoo teali doi oloyodoo koidan.

¹⁰Salataa Saul tukon napeleleanidoo polong doi Gibea yanila pososuung tukon meeng kotambuno konabi. Doi tempodoo koidan ko Mian Bisa Naroh kuasaiyomo Saul, yana malaingo moosu-osuleng tukon nabi-nabi mo kokuweisoo.

¹¹Komian-mian motingoniiyo yana luwedoi looluk, kitayo donakalakuanoo, maka meeng komian masadai doi bailon, “Oilamo komo lapamo teali tukon doi Kish napaudoo? Oilakai Saul koidan teali nabi?”

¹² Maka meeng komian mo dungol idoo masadai, “Bulaandomo tukon donabi-nabidoo bailonggon — manurut komuyu indeekai kotamano?” Doiyamo konatambuunan nasosombotia, “Oilano koidan Saul teali nabi?”

¹³Salataa Saul lapa osu-osuleng tukon koku-kokuweis, yana tauso doi balabaan doi bunggul bunggono.

¹⁴Saul napinatama kitayo yana tukon napeleleani, maka masadai doi yanila, “Inaando kopoo luwean?” Saul timbiliyo, “Moumbolii keledai molapusoo, tukon salataa aki mai posuunggene, ikami taus mopososuung Samuel.”

¹⁵“Tukon oila kona binontiikon doi komuyu?” Napinatama sadaiyo.

¹⁶Saul timbiliyo, “Yana popitoikene baikon doiyayon-iyayonoo pinosuunggono.” Bai Saul aki nasalitaikene doi napinatama baikon yana molapamo Samuel oduduke teali tomundo.

¹⁷Maka Samuel monggiuanggene ko Israel miano sulano napototongi doi Mizpa,

¹⁸tukon yana bantile doi yanila, “Naiyamo ko TEMENENO nabinantil, Israel na Mian Bisa, ‘Yaku lapamo babayo komuyu tobuat luwedoi Mesir tukon olupute komuyu luwedoi Mesir miano nakuasa tukon sasaibino kobangsa bailon mo lailainggene komuyu.

¹⁹Yaku lapamo oluputene komuyu luwedoi sasaibino kokasusaan tukon sakisaawan, bai diabudoo komuyu lapamo tolake Yaku, mu Mian Bisa, sabab komuyu kabiyo sulano kuoduduke komeeng kotomundo tuuk doi komuyu. Nah, monondoko, pototongimo doi salaanggu, mu TEMENENO, luwe doimu benseno tukon pulimu.’ ”

²⁰Maka Samuel sumboliiyo sasaibino kobenseno nataus doi muka tukon Benyamin benseno komo topilih.

²¹Salataa Benyamin benseno nakaluargaa-kaluargaa lalomodoo sinumbolii taus doi muka, maka komo topilih Matri nakaluargaa. Doibundu tauso sasaibino komalane doi Matri nakaluargaa lalomo, tukon Saul Kish napau komo topilih. Maka yanila unggoliiyo Saul, bai yana akiyo.

²²Tobikon doiya komian-mian masadai doi TEMENENO, “Oh TEMENENO, oilakai domianoo daanomo dimbaa?” Ko TEMENENO timbiliyo, “Saul sapit doi lolonggu mo sinadia doo tonggulungo.”

²³Yanila tukon soisobit lolobotio mo Saul luwe idoo, tukon babayo yana doi rayat tanga-tangano. Maka Saul kokondongo doi yaniladoo tukon yanamo komo tatandak tuuno; komian bailon tolongo polong doi bengeno.

²⁴Doibundu Samuel bantile doi rayat, “Naiyamo ko TEMENENO namian pinilih, akiyo kona pokakanaan doi antara kita sasaibino.” Sasaibino domianoo kokuweis, “Tubomo tomundo!”

²⁵Doibundu Samuel tarakanggene doi bangsadoo tentang hak tukon tomundo nakawajiban maka yana tulise doi buku lalomo mo inabos doi tampat momoliyous. Lapa doiya Samuel sumboliiyo sasaibino dobangsadoo namule doi nabonua suwe-suwele.

²⁶Saul koidan mule doi nabonua doi Gibea, bubula komian motambongan tukon barani polainggene tukon ko TEMENENO lapamo bukayo konoano.

²⁷Bai bubula komian lokis bantile, “Bula kona tealian namian nia naikon daano konatotuuk doi kita?” Yanila aki naodotiiyo Saul tukon aki nabeena tambo doi yana. Bai yana kakadukon aki natoiyo.