Read Banggai 1 SAMUEL 12 Bible Online

1 SAMUEL 12 - Banggai bible

1 SAMUEL 12

¹Maka Samuel bantile doi sasaibino ko Israel miano, “Yaku lapamo loingiyo sasaibino komukakabi tukon oduduke komeeng komian moteali tomundo doi komuyu.

²Tambuun diabudodoo yanamo naikon komo katuaiyo komuyu. Kitayomo, yakunia motuamo tukon mbombolo dakubuuk. Yaku malumbito tuuno daku katuaiyano komuyu — daanoon doi tempo kupaumalanean polong niabudodoo. Konabukti doiyamo kupau-pau mo bobosoliimo.

³Budodoiya naiyamo kotempono, yaku kokondong doi salaamiu! Kalu daano daku kasalahan, kalaakanakumo doi TEMENENO salaano tukon doi tomundo salaano Yana mo piliyomo. Kai biasamo yaku moalayo komian bailon nasaapi kai nakeledai? Kai biasamo yaku bakokolii kai lailainggene kai mantalima doy sogok? Bantilemokai, sulano oila daku inala moola kuabalinggene.”

⁴Domian-mianoo timbiliyo, “Aki, aki nabiasa Tama bakokolii kai lailainggene kami; aki nabiasa Tama moalayo komian bailon nalobo.”

⁵Maka Samuel bantile, “Doi oloyo nia ko TEMENENO tukon tomundo naililik teali sakisii baikon yaku tokita akiyo daku salah mau natongo soisik.” “Oh bisa, ko TEMENENO teali nda sakisii,” yanila timbiliyo.

⁶ Maka Samuel bantile koidan, “TEMENENOkai komo piliyo Musa tukon Harun, tukon mobabayo komu mbumbu tobuat luwedoi Mesir.

⁷Diabudodoo, inaisoon motaus. Yaku naikon kalaakene komuyu doi TEMENENO salaano. Neneekekai naikon sasaibino ko TEMENENO namonondokan molapamo tudoikene doi komuyu tukon doi mumbumbu.

⁸ Salataa Yakub tukon nakalualgaa lubat doi Mesir, tukon ko Mesir miano lailainggene yanila, maka komu mbumbu makabi tulung doi TEMENENO, maka ko TEMENENO sumboliiyo Musa tukon Harun. Domianoo molua babayo komu mbumbu tobuat luwedoi Mesir tukon tulungio yanila motataap doi tano nia.

⁹ Bai doibundu yanila toliminggenemo ko TEMENENO, konapoo Mian Bisa, tobikon doiya yana batadikenemo napoo linobosi tukon Sisela lungguiyomo yanila, suludadu talengano doi Hazor tukon luwe Filistin miano tukon tomundo Moab.

¹⁰ Doibundu yanila sambeang doi TEMENENO tukon yanila mangakakukene konapoo lalim; yanila bantile, ‘Ikami baladosamo sabab otinggalemo ikoo, oh TEMENENO, tukon sosubaiyo kopilogot Baal tukon Asytoret timba-timbalango. Bai diabudodoo, salamatenemokai ikami luwedoi mai musuh, maka naikon mai maangga doikoo!’

¹¹ Doibundu ko TEMENENO sumboliiyo Gideon, doibundu Balak, lapadoiya Yefta, tukon doibundu yaku. Ikami suwe-suwele lapamo oluputene komuyu luwedoi pomusuh-musuh, tobikon pomalaat tuboan tukon monondok.

¹² Baikai salataa komuyu kitayo Nahas tomundo Amon kabimo lobosio komuyu, komuyu tolake ko TEMENENO salaku mutomundo tukon bantile doiyaku, ‘Ikami yase komeeng kotomundo naparentah kami.’

¹³Diabudodoo, kitayo, naiyamo yana, tomundo komuyu mopilio doo. Ikomiyu lapamo kabiyo, tukon ko TEMENENO lapamo beekene doi komiyu.

¹⁴Kinatauwankai komiyu kalu komiyu odotiiyo ko TEMENENO, tukon anggayo doi yana, tukon longoliyo tukon taatiyo Konaparentah, bainokai koidan kalu komiyu tukon dopoo tomundodoo tataap mangga doi TEMENENO mu Mian Bisa.

¹⁵Kobalino, kalu komuyu akipoo lengele ko TEMENENO, bai tolongo lawane kona palenta, tantu ikomiyu tukon potomundo naikon TEMENENO lawane.

¹⁶Diabudodoo, ndongoliio koidan! Palatikanggene komo minasaindinggon mobabasal naikon ko TEMENENO nalinakukanggon doi matamu salaano.

¹⁷Yaku naikon masadai doi TEMENENO, tukon maukai diabudoo tempo pital, ko TEMENENO naikon obulusene kobubuung tukon udan salaku potimbili daku sambeang. Doi tempodoo, ikomiyu naikon toiyomo bulaando konababasalan kopoo lalim motuuk doi TEMENENO sabab pomakabian meeng kotomundo.”

¹⁸Maka sambeangokai Samuel, tukon doi oloyodoo koidan ko TEMENENO lubatene kobubuung tukon udan. Posaapon dolipudoo teali matakut doi TEMENENO tukon doi Samuel.

¹⁹Maka bantilokai yanila doi Samuel, “Tulungiyomokai Tama, sambeanggenemokai naikami nia doi TEMENENO mu Mian Bisa, sulano naaki mai mate. Diabudodoo kami toiyo baikon sangalaasan komai lalim doi loolukoo, kami baladosamo koidan sabab makabi meeng kotomundo.”

²⁰Samuelkai timbiliyo, “Inai matakut, maukai polapamo lakukanggene domo kulokisoo, inaimokai motinggale ko TEMENENO, bai tataap mangangga doi yana tukon tootubo konoamu.

²¹Inaimokai mololoiyo kopilogot-pilogot moaki namoola motulungi tukon salamatene komiyu, sabab kona tutuuwan yanilakai akiyo.

²²Ko TEMENENO batotopimo, baikon yana aki naikon naotinggale komiyu sabab yana lapamo putusiyo sulano natealikene komiyu namian susuungo.

²³Tentang ko butonggu, boliisi naaki kubaladosa tuuk doi TEMENENO sabab aki kusambeanggene komiyu. Kobalino yakukai naikon banggadudul mootunggukene doi komuyu kolangge-langge mo monondok tukon mobisa.

²⁴Odotiiyokai ko TEMENENO tukon poanggayokai doi yana tukon potaat tootubo konomuyu. Poneneekekai naikon kokokubai-kokubai babasal molapamo yana lakukene doi komiyu.

²⁵Bai kalu komuyu banggadudul koidan mokubai lalim, maka komiyu tukon potomundo naikon sinilaka.”