Read Banggai 1 SAMUEL 13 Bible Online

1 SAMUEL 13 - Banggai bible

1 SAMUEL 13

¹Daano kooloyo meeng, salataa Saul tealimo tomundo,

²yana piliyo ko 3.000 ko Israel miano; luwedoi yaniladoo ko 2.000 podungoli tukon yana doi Mikhmas tukon doi Betel bunggulo lipuno, bai ko 1.000 koidan taus tukon Yonatan napau malaneno doi Gibea doi Benyamin nabenseno nalipu. Kolabino luwedoi rayatoo pianataikono mo mule doi nabonua suwe-suwele.

³Doibundu Yonatan akateo ko Filistin nasuludadu talengano doi Gibea, tukon ko Filistin miano lengele tentang dolanggedoo. Maka Saul sumboliiyo napinuuk kotolompet doi posaapon kotano tuuk mouange ko Ibrani miano sulano namaju polobosi.

⁴Doi sasaibino ko Israel miano binontiikon baikon Saul akateomo ko Filistin nasuludadu talenganodoo tukon baikon ko Filistin miano mosikitene tuuno ko Israel miano. Tobikon doiya korayat loingiyo doponguangoo sulano napototongi tukon Saul doi Gigal.

⁵Daanon mobuno doiya ko Filistin miano pototongi koidan tuuk molobosiyo ko Israel miano, yanila daano 30.000 koloda pomusuan, 6.000 komian mo lakit adalan, tukon suludadu-suludadu konakadaang buno bone doi tobun bibilo. Yanila basandung doi Mikhmas taalikon tolopot doi Bet-Awen.

⁶Doibundu yanila banggadudul molobosi tuuno doi Israel miano, tobikon ko Israel miano daanoon doi ndondoong mosusah. Meeng kotambuno luwedoi Israel miano daano sapit doi leeng lalomo tukon bunggul buango kai doi batu nggalanggang nggoanggoango lalomo, kai doi bubung lalomo tukon doi buta buango,

⁷daano koidan komo pintosiio ko Yordan Paisunobatango tukon usok doi Gad tukon Gilead lipuno. Saul daano doi Gilgal, tukon korayat momalaing mbombokon matakut.

⁸ Saul totiiliyo Samuel pitu kooloyo kanakalumbit, pokokonoi tukon Samuel nateteba doi yana, bai Samuel akiyoon koidan napolong doi Gilgal bai Saul konarayat tambuuno otinggalemo yana.

⁹Tobikon doiya yana bantile doi yanila, “Babayomo doisumai kososubakon mosinua tukon sosubakon podameanoo.” Maka yana susuungo komo sosubakene dososubakonoo mosinamea.

¹⁰Bai sodokai nalapa lakukene, Samuel lubato. Saul lolobotio yana sulano nabeena salam,

¹¹bai Samuel masadai, “Oila komo lapamo tomundo lakukene?” Saul timbiliyo, “Yaku kitayo baikon korayat tambuuno tinggale yaku, baikai Tama akiyoon nalubat doi tempo Tama mo tantukanggenemo. Koikoidan ko Filistin miano pototongimo doi Mikhmas.

¹²Maka yaku pikikene, inai-inaikene ko Filistin nasuludadu naapa doiya koidan lobosio yaku nimbaa doi Gilgal, banggokai yaku akiyoon kumangkabi maasi doi TEMENENO. Tobikon doiya yaku mangala kaputusan sulano kumososubakon dososubakonoo.”

¹³Salataa lengele doiya Samuel bantile doi Saul, “Tomundo natindakanoo longas tuuno. Kalukai Tomundo loingiyo ko TEMENENO Mian Bisa naparentah doi Tomundo, tantumo ko TEMENENO naikon tataapkanggene Tomundo tukon Tomundo natulunan teali tomundo doi Israel tuuk sidutu-posidutukon.

¹⁴ Bai diabudodoo Tomundo nabasambuan aki kai namalumbit. Sabab Tomundo aki naloingiyo ko TEMENENO Naparentah, maka ko TEMENENO mopilimo mian bailon konainias tuuk inoduduk teali tomundo doi namian.”

¹⁵Doibundu Samuel tinggalemo ko Gilgal tukon banggadudukene kona ampakonan doi Gibea doi Benyamin nalipu. Daanon mobunodoiya Saul palesayo konapasukan, konakadaang uga-ugaat 600 komian.

¹⁶Bunomodoiya Saul tukon namalane Yonatan, tukon napoo anggota basandung doi Geba Benyamin nalipu; bai ko Filistin miano basandung doi Mikhmas.

¹⁷Doi tempodoo koidan tolu kotambuno ko Filistin napalambok luwedoi Filistin nabasandungan sulano napoo pondikuk; komeeng kotambuno taus doi Ofra Syual nalipu,

¹⁸kotambuno ko luano pakituuwo ko Bet-Horon; tukon kotambuno meeng koidan pakituuwo kokalalatan mosasalaane ko Zeboim pepelakono tukon padang bone.

¹⁹Doi posaapon ko Israel akiyo kotolotutuk, sabab ko Filistin miano aki napataikene ko Ibrani miano namokubai sabel tukon kalait.

²⁰Jadi ko Israel miano sio nataus doi Filistin miano kalu sio nabilase konabajak matano, konapacol, konaolowang tukon sabit;

²¹kotambono doiyamo meeng kodoy logam tuuk mobilasan olowang tukon kindokano kopakakas poumbas saapi, tukon lua kodoy logam pauno tuuk mobilasan pakakas matano kai pacol.

²²Doiyamo kosababpo, doi oloyo polobosian doi Mikhmasoo, akiyo komeeng komiankai luwedoi Israel miano modaano konasabel kai kalait, alaasene Saul tukon namalane Yonatan.

²³Ko Filistin miano mokubai meeng kopoos badagaiyan sulano napalataanggene komeeng kobunggul nggoango doi Mikhmas.