Read Banggai 1 SAMUEL 14 Bible Online

1 SAMUEL 14 - Banggai bible

1 SAMUEL 14

¹Doi meeng kotempo Yonatan bantile doi meeng kotabo pakanggi nasinapan, “Ayo, kita tauso mbali sembeleng doi Filistin napoos badagaiyan!” Bai yana aki napalamisi doi tamano.

²Doi tempodoo Saul daanoon doi kayung delima suukano doi Miglon, aki namodoon luwedoi Gibea. Korayat molainge uga-ugaat 600 komian konakadaang. (

³Imam momakanggi Efod doiyamo Ahiya Ahitub napau, doiyamo Ikabot utuso Pinehas napau, tukon Pinehas Eli napau, TEMENENO naimam doi Silo.) Korayat koidan aki natoiyo baikon Yonatan motauso luwe idoo.

⁴Sulano nalaate ko Filistin napoos badagaiyanoo, Yonatan sio naloloiyo komeeng kobunggul nggoango mo dinapit lua kobatu nggalanggang mopalangaitan, suwe-suwele kosambuno Bozes tukon Sene.

⁵Batu nggalanggang mo tambikon doi lembet sasalaane ko Mikhmas, tukon mo tambikon doi lalom sasalaane ko Geba.

⁶Maka Yonatan bantile doi tabodoo, “Maimo ndataus doi Filistin mianodoo mokafil nabadagaiyan. Sabab ko TEMENENO moola beena kamanaangan, maukai doi nabadaangan komian maukai doi nakidikan komian.”

⁷Dotabodoo timbiliyo, “Oilamo tolong Tuan nalinakukon, muata loingiyo.”

⁸“Monondokokai” Yonatan nabantilano. “Doi tempo pintasan kita naikon okitakene kobutonggita doi Filistin mian-mianodoo.

⁹Kalu yanila sumboliiyo kita tade tukon mototiili polong yanila lubat doi kita, maka kita naikon tataap dungol idoo tolong tukon akimo ndapintas.

¹⁰Bai kalu yanila sumboliiyo kita lubat doi yanila, kita naikon dombalaakon, tobikon doiyamo kopaloosano ko TEMENENO molapamo salakanggene yanila doi kita.”

¹¹Salataa yanila luaila okitakene kobutongo doi Filistin miano doi pos badagaiyanoo, ko Filistin miano bantile, “Kitayo, daano ko Ibrani mian-miano motobuat luwedoi buang-buang doinapoo tampat sapitan!”

¹²Doibundu yanila nggeleamon doi Yonatan tukon naata, “Libamo doisumai sulano mai okitakene komeeng kolobo doi komiyu!” Maka Yonatan bantile doi tabodoo, “Laingakumo, sabab ko TEMENENO lapamo salakanggene yanila doi Israel.”

¹³Tukon dotabodoo laingemo Yonatan molanggang doi bungkuk. Salataa Yonatan sumbut, bakatuwongo ko Filistin miano yana mobobokiiyo, bai doi tonggulungo, dotabodoo akateo yanila.

¹⁴Doi molobosianoo tumbeno, Yonatan tukon dotabodoo mangakate uga-ugaate luakolono komian doi lipudoo konakebelak 25 kometer.

¹⁵Dokadadianoo kubaiyo ko Filistin miano sibuk doi nabasandungan tukon doi padang-padang. Sasabino ko Filistin miano tukon pos-pos badagaiyan maka rombongan-rombongan pondikuk teali matakut; maukai kodunia lolondong, tukon tealimokai konggalanggabutan mohebat tuuno.

¹⁶Daanoon Saul nasuludadu mobatotooli doi Gibea doi Benyamin nalipu, yanila kitayo ko Filistin miano moobulen dombalaa doisumai tukon nggalanggabut tuuno.

¹⁷Maka Saul bantile doi nasuludadu-suludadu, “Aitemo sasaibino kosuludadu tukon palesayomo indee komiano komo akiyono.” Yanila lakukanggene doparentahdoo maka totoimo baikon Yonatan tukon dotabodoo pakanggi nasinapan akiyono.

¹⁸“Babayomo do Efodtoo doisumai,” Saul bantile doi Imam Ahia. (Doi oloyodoo Ahia babayo do Efodtoo doi Israel miano salaano.)

¹⁹Salataa Saul daanoon mobasilingan doi imamoo komatakutan doi Filistin miano nabasandungan lalomo pololokono tosuungi, tobikon Saul bantile doi imamoo, “Kita akimo natodan koidan momangkabi potudoikon loloon moluwedoi TEMENENO!”

²⁰Maka Saul tukon namian-mian banggidanggon taus doi tampat polobosian. Idoo yanila kitayo daano konggalanggabutan doi Filistin mianodoo; yanila polobosi tukon poakate.

²¹Ko Ibrani mian-miano modungol doi Filistin miano nalipu tukon komo lapamo lainge konapoo suludadu, biol maka pototongi Saul tukon Yonatan.

²²Koikoidan ko Israel miano mosapit doi Efraim bunggul-bunggulo, lengelemo baikon ko Filistin miano modampaso, pomeenggono tukon lobosiomo do Filistin mianodoo.

²³Yanila polobosi doi popupuson kololoon polong liise ko Bet-Awen. Ko TEMENENO salamatene ko Israel doi oloyodoo.

²⁴Doi oloyodoo ko Israel miano pakadako tukon akimo napoo bukuan sabab malaal, sabab doiya Saul batotopimo bunonaiya, “Katulaonkai komian momakaan oioilakai doi oloyo nia kalu akiyoon kubalase konoanggu namasakitan motuuk doi kumusuh.” Tobikon doiya akiyokai komeeng komian mokaan sampai posopokon kooloyo.

²⁵Doibundu yanila sasaibino polongo doi meeng kobabono tukon posuunggene badaang tuuno kodokot,

²⁶bai akiyo komeeng komiankai momakaan lobo moluwedoi dokotoo, sabab matakut nakanakon katula doi Saul nabinatiloo.

²⁷Bai Yonatan aki natoiyo baikon kotamano molapamo nggimoliiyo korayat tukon donatotopidoo; tobikon doiya yana ulule konatongkat kinanggi, tukon tadukene doi dokotoo papano lalomo, maka yana alayo dodokotoo tukon yana kaane. Mosobit yana lasayo monondok tukon tosuungi bukuan.

²⁸Doibundu meeng komian luwedoi suludadu-suludadudoo bantile doi yana, “Ikami sasaibino akimo mai bukuan sabab malaal. Bai tuan tamano lapamo nggimoliiyo ikami tukon totopi, bantile, ‘Katulaonkai komian mokaan doi oloyo nia.’ ”

²⁹Yonatan timbiliyo, “Tutuu todudulo kotamanggu nakokubaidoo motuuk doi nda bangsa! Kitayo, daku ndodoong diabudodoo lobian modoon konamonondokan salataa lapa yaku makaan soisik dodokotoo.

³⁰Kalukai andeno doi oloyo nia pinataikon korayat namakaan kinaan molapamo yana lambase doi tempo nalungguiyano komusuh, tantu lobian badaang ko Filistin miano momoola kita akateo!”

³¹Doi oloyodoo ko Israel miano kalayo ko Filistin miano salataa lapa polobosi popupuson kololoon luwedoi Mikhmas polong doi Ayalon. Bai lapa doiya yanila pakadako,

³²tobikon doiya yanila baku-bakulebe momangala langge mo linambas molinaat luwedoi musuh; yanila mangala domba tukon saapi maka kelete doi tampatoo koidan, tukon banggadudul makaan sail modaano kosauno.

³³ Maka binontiikon doi Saul bunonaiya, “Tomundo, korayat baladosamo doi TEMENENO sabab makaan sail tukon sauno.” Saul nggeleamon, “Ikomiyu panghianat! Monggolinggon meeng kobatu babasal doisumai.”

³⁴Doibundu konabantilano koidan doi mian-mian mobabayo dobilitadoo, “Pobabandamo doi rayatoo mobadaang tukon sumboliiyo napoo babayo konapoo saapi tukon nadomba doisumai, sulano nakinolot doi batu nia bungguno tukon kinaan dimbaa; tukon kalu bunomo doiya yanila aki namakaan sail tukon sauno tukon akimo nabaladosa koidan doi TEMENENO.” Doi popokoo koidan sasaibino komian babayo konapoo iyayon linambas tukon keletemo idoo.

³⁵Maka Saul mokokondong balabaan doi TEMENENO; doiyamokai kona balabaan kinokondong.

³⁶Doibundu Saul bantile doi nasuludadu, “Maimokai nda lobosio ko Filistin miano doi popokia tukon lambeke yanila polong dodoa maka nda akateo yanila sasaibino.” Yanila timbiliyo, “Kubaiyomokai oila Tomundo nakinita monondok.” Bai imam bantile, “Maimokai nda matailukio momakabi potudoikon moluwedoi Mian Bisa.”

³⁷Maka Saul masadaimo doi Mian Bisa, “Kai moolamo kulobosio ko Filistin miano? Oilakai yanila naikon ikoo salakanggene doi Israel miano?” Bai doi oloyodoo ko Mian Bisa aki namotimbili.

³⁸Tobikon doiya Saul bantile doi sasaibino kopakatuai rayat, “Mai dimbaa sasaibino tukon palesayokai oila kolalimo komo lapamo linakukon doi oloyo nia.

³⁹Yaku paladandi doi TEMENENO motubo, molapamo beekene komanaangan doi Israel, baikon komian mosalah naikon inukum mate, maukai daku malanedoo Yonatan.” Bai akiyokai komeeng komian mobarani timbiliyo.

⁴⁰Maka Saul bantile doi sasaibino ko Israel miano, “Ikomiyu sasaibino pokokondong taikon naimbaa.” Yanila timbiliyo, “Kubaiyomokai oila Tomundo nakinita monondok.”

⁴¹ Doibundu sambeangokai Saul, “TEMENENO, Israel na Mian Bisa, bulaando naoloyo nia moaki mutimbiliaku? TEMENENO timbiliyomo yaku lolo doi batu-batu momolius nia. Kalu dokasalahanoo daano doi yaku kai doi Yonatan, timbiliyomo tukon batu Urim, bai kalu dokasalahanoo daano doi Israel mumian, timbiliomo tukon batu Tumim.” Maka ko TEMENENO timbiliyo tudeo doi Yonatan tukon Saul; tukon bunodoiya korayat tinatukon akiyo konasalah.

⁴²Maka bantilokai Saul, “Oh TEMENENO, tantukanggenemo antara yaku tukon Yonatan.” Maka Yonatan komo tinantukon salah.

⁴³Maka Saul bantile doi Yonatan, “Oila komo lapamo ikoo kubaiyo?” Yonatan timbiliyo, “Yaku makaano soisik kodokot yaku moalayo tukon kutongkat tubono; tobikon doiya yaku basadia sulano kumate.”

⁴⁴Saul bantile doi yana, “Boliisi ko Mian Bisa naukumaku kalu aki muinukum mate, Yonatan!”

⁴⁵Bai karayat bantile doi Saul, “Kai sio Yonatan nainukum mate? Banggokai yanamo komo babayo komanaangan mobabasal nia? Aki! Kami paladandi tolongo doi TEMENENO motubo, baikon Yonatan aki namoola lapus konabuuk buuko meeng moluwedoi oluno. Sabab tukon TEMENENO natulungan, yana malaato kamanaangan doi oloyo nia.” Bunomokai doiya korayat nasalamatanano Yonatan luwedoi nainukuman mate.

⁴⁶Salataa lapa doiya ko Filistin miano abali doi napoolipu susuungo sabab Saul akimo nalelenggene yanila koidan.

⁴⁷Salataa Saul teali tomundo doi Israel, yana molobosi doiyayaa lawane sasaibino ko Israel namusuh, doiyamo Moab miano, Amon miano, tukon Edom miano, tano Zoba tomundono, tukon Filistin miano. Yaandomo konapolobosian, sidutu yana malaat kamanaangan.

⁴⁸Yana molobosi tukon tambongan barani tukon lungguiyo ko Amalek miano, tukon olupute ko Israel miano luwedoi palambok nakuasa.

⁴⁹Saul namalaneila doiyamo Yonatan, Yiswi, tukon Malkisua. Konaboine langgongo kosambuno Merab, tukon kokoluano kosambuno Mikhal.

⁵⁰Konaboloki kosambuno Ahinoam, Ahimas napau; konasuludadu talengano doiyamo Abner Ner napau, doiyamo Saul napinatama.

⁵¹Saul tamano Kis, tukon Abner tamano Ner, doiyamo Abiel napau-pau.

⁵²Doi nadaanooan Saul motubo sidutu polobosi tukon hebat molawane ko Filistin miano. Tobikon doiya, kalukai Saul kitayo komian mobukuan kai mobarani, yana mosobit tealikene suludadu anggotano.