Read Banggai 1 SAMUEL 15 Bible Online

1 SAMUEL 15 - Banggai bible

1 SAMUEL 15

¹ Daano kooloyo meeng Samuel bantile doi Saul, “TEMENENOkai komo sumboliiyaku mooduduke Tuan teali Tomundo doi Israel miano. Tobikon doiya, siokai Tuan nandongoliiyo ko TEMENENO Mo Babasal konakuasa naparentah.

² Yana naikon ukume ko Amalek miano sabab konapoo mbumbu lawane ko Israel miano doi tempo ko Israel miano nalubatan luwedoi Mesir.

³Jadi, potauso lobosio ko Amalek miano tukon pomanasemokai sasaibino konapoo langge. Inaikai pomotinggal mau nabaino meeng kolangge tolong; bai akateomo sasaibino komala-malane, boine, pau-pau tukon paulumboon; tukon koidan saapi, domba, unta tukon keledai.”

⁴Maka Saul sadiayomo konasuludadu tukon aitemo doi Telaim; daanoon ko 200.000 kosuludadu luwedoi Israel tukon 10.000 komian luwedoi Yehuda.

⁵Salataa lapadoiya Saul tauso polaing-laing konasuludadu doi kota Amalek lobotio tukon lobosio komusuh doi paisubatango namotuulan.

⁶Yana koidan kapatuwo koteteba poingotii doi Keni miano konabantilano, “Potauso tukon potinggalemo ko Amalek miano, sulano naaki potalaing kuakabuse polaing yanila, sabab looluk kopoo mbumbu lapamo tudoikonggon kolenggang posobatan doi Israel miano salataa ko Israel miano lubat luwedoi Mesir.” Maka ko Keni miano tauso luwe idoo.

⁷Salataa lapadoiya Saul polobosi tukon Amalek miano, tukon lungguiyo yanila popupuson kololoon luwedoi Hawila polong doi Syur doi Mesir tambikon tolopot.

⁸Sasaibino korayat tukon Amalek nasuludadu Saul akateo. Bai Agag Amalek miano natomundo tukon nasuludadu Saul lakoyo, bai yanila binatadikon tubo; bunomo koidan kodomba tukon saapi monondok tuuno, tukon sasaibino kolangge moano koanggano; tolongo iyayon piniala moakiyo konatotuuk tukon moakiyo koanggano tolong komo minanas.

¹⁰Maka ko TEMENENO bantile doi Samuel,

¹¹“Yaku manasal molapamo oduduke Saul teali tomundo, sabab yana lapamo abali luwedoi Yaku, tukon aki nalakukene Dakuparentah.” Samuel susah, tukon sasamba kopopook yana masadai doi TEMENENO.

¹²Modoakon kooloyono, dodoa, Samuel luwe sulano napososuung tukon Saul. Binontiikon doi yana baikon Saul motauso doi kota Karmel sulano namokokondong batu poingotii tuuk doi butongo indaa, maka na banggadudul doi Gilgal.

¹³Salataa Samuel pososuung tukon Saul, Saul bantile doi yana, “Boliisi ko TEMENENO nabalakaatio Tama! Yaku lapamo lakukene ko TEMENENO napalenta.”

¹⁴Bai Samuel masadai, “Kalu buno doiya, bulaando yaku molengele kosaapi mongaaton tukon domba mombeekon?”

¹⁵Saul timbiliyo, “Doiyayon-iyayonoo doiyamo iyayon moluwedoi molinambas moluwedoi Amalek miano. Domba tukon saapi momonondok tuuno lapamo rayat alayo sulano nasinosubakon salaku sosubakon doi TEMENENO Tama Bisa. Bai kolabino lapamo ikami akamanase kabus.”

¹⁶Salataa Samuel lengele doiya yana bantile, “Totiili soisi ken, yaku naikon popitoikene oila ko Mian Bisa nabinantil doiyaku doi kolubongidoo.” Saul bantile, “Bantilemokai.”

¹⁷Samuel bantile, “Bolikonkai Tuan lapamo teali katua doi Israel bense-benseno, maukai Tuan naanggene kobutongo aki napenting? Tuan TEMENENO lapamo pilio teali tomundo doi Israel,

¹⁸koikoidan ko TEMENENO sumboliiyo Tuan moakabuse ko Amalek miano mokulokisoo. Tuan sinumbolii polobosi lawane yanila sulano napoo kabus sasaibino.

¹⁹Bulaando Tuan moaki naloingiyo ko TEMENENO naparentah? Bulaando Tuan mo polaing-laing korayat momangala balang molinambas, tukon dokokubaidoo mobuno doiya Tuan tealikene manasal ko TEMENENO noano?”

²⁰Saul timbiliyo, “Yaku lapamo loingiyo ko TEMENENO naparentah, tukon taus polobosi pokonoi tukon nasosumbolii doiyaku; Agag tomundo Amalek kutaane tukon sasaibino ko amalek miano yaku akateomo.

²¹Bai daku suludadu aki naakateo sasaibino koiyayon piniala; yanila lapamo lilike kodomba tukon saapi momonondok tuuno luwedoi balangoo molinambas sulano napoo sosubakene doi Gilgal salaku sosubakon doi TEMENENO Tama Bisa.”

²²Bai Saul bantile, “Inaandokai komo lobian ko TEMENENO nainias, nataatan kai sosuba mosinosubakon. Kotaatan doi TEMENENO lobian kona monondokan komososubakonan sosubakon. Kotaatan lobian konamonondokan doi domba inakko.

²³Sabab kolaanano ko TEMENENO pokakana konakulokisan kolakukanano kobasu-basupaan, tukon kona banggalan komian noano pokakana kona kulokisan kososubaiyano kopilogot. Sabab Tuan lawanemo ko TEMENENO naparentah, maka ko TEMENENO lakon aki naakuiyo koidan Tuan salaku tomundo.”

²⁴Salataa Saul ndongoliio doiya yana mangakukenemo doi Samuel, konabantilano, “Takainomo yaku baladosamo. Yaku lupaiyomo ko TEMENENO naparentah tukon akimo kupopusinggon Tama naotunggul. Yaku matakutene daku suludadu tobikon doiya maka kudaanokene konapoo kakabi.

²⁵Bai diabudoo, yaku kabiyo doi Tama, ompunio dakulalim tukon abalimo polaing-laing tukon yaku doi Gilgal, sulano kumoola bakaleda doi TEMENENO.”

²⁶Bai Samuel timbiliyo, “Yaku akimo kuiyase abali polaing-laing tukon Tuan. Tuan lawanemo ko TEMENENO naparentah, tukon diabudodoo yana akimo naakuiyo Tuan salaku tomundo Israel.”

²⁷Maka Samuel mbaleng kabi nataus, bai Saul taane yana tukon taanio konajuba, tobikon dojubadoo mosiak.

²⁸Maka Samuel bantile doi yana, “Doi oloyo nia ko TEMENENO siakemo ko Israel nabatomundoan luwedoi Tuan, tukon beekenemo doi mian bailon molobian kona monondokan luwedoi Tuan.

²⁹Mo Inakabasal Israel na Mian Bisa aki nakala-kala tukon aki koidan naboliyo kona mongiasan, sabab yana bolikon bangkapi.”

³⁰Saul timbiliyo, “Yaku baladosamo. Bai Tama tulungakukai, abalimokai polaing-laing tukon yaku sulano kumoola bakaleda doi TEMENENO Tama Bisa. Tukon kalu bunodoiya Tama odotiiaku doi sasaibino komo katuaiyo daku bangsa salaano tukon sasaibino ko Israel miano salaano.”

³¹Maka Samuel abalimo polaing-laing tukon yana doi Gilgal, tukon Saul bakaleda doi TEMENENO.

³²Doibundu Samuel maparentakene, “Babayomo Tomundo Agag doisumai,” Agag lubat doi yana, tukon moinikene sabab yana pikikene, “Kobalaa matean tolumbaimo.”

³³Maka Samuel bantile, “Buno musabel lapamo kubaiyo badaang kotina molapus konapau, bunomokai doiya koidan tinamu naikon lapus konapau.” Maka Samuel tabase Agag doi balabaan salaano doi Gilgal.

³⁴Lapa doiya Samuel taus doi Rama tukon Tomundo Saul mule doi nabonua doi Gibea.

³⁵Sampe yana mate, Samuel aki naposuung koidan tukon Saul. Bai Samuel susah sabab ko TEMENENO manasakene molapamo oduduke Saul teali Israel natomundo.