Read Banggai 1 SAMUEL 16 Bible Online

1 SAMUEL 16 - Banggai bible

1 SAMUEL 16

¹Bubula kotempo doi bundu ko TEMENENO bantile doi Samuel, “Bulaa konakalumbit koidan kona susaan konoamu sabab Saul? Bolikonkai yana akimo nainakui salaku tomundo Israel? Diabudoo, mangalamo zaitun lisisono tukon tauso doi Betlehem, doi meeng komian kosambuno Isai, sabab daano komeeng komian moluwedoi napau-pau yaku lilikemo teali tomundo.”

²Bai Samuel masadai, “Bulaando mosio kulakukene? Kalu dolanggedoo Saul lengele, tantukai yaku inakatemo!” Ko TEMENENO timbilio, “Babayomo meeng kosaapi mongula, tukon bontiikene doi mian baikon ikoo lubat dombalaa tuuk mososubakon sosubakon doi TEMENENO.

³Maka koloyokai Isai doi bakolobokiyan mokolotan iyayon. Sio naikon kupopitoikene oila komo sio mulakukene. Komian yaku motudoikene doi komuyu, sio muoduduke teali tomundo.”

⁴Samuel lakukene pokakana ko TEMENENO nabinantil. Salataa yana polong doi Betlehem, sasaibino kokota katuano ndobotio tukon ngginggim tukon masadai, “Oilakai Tama nalubatan babayo kosalamat?”

⁵Samuel timbilio, “Oode, bisa. Yaku lubat sulano kumososubakon sosubakon doi TEMENENO. Maka koliyouse kobutomu sulano mumoola momalaing dobakolobokiyanoo mokolotan iyayon.” Isai tukon napau-pau koidan sinumbolii koliyousio kobutongo suwe-suwele, tukon yana kinolo doi bakolobokiyanoo.

⁶Salataa yanila lapa pototongi tukon Samuel kitayo Eliab Isai napau, yana pikikene, “Tantukai naiyamo naikon ko TEMENENO nalinilik.”

⁷Bai ko TEMENENO bantile doi Samuel, “Inaikai natongo lambot konoamu sabab ndondoongo momonondok tukon tatandak kobutongo; bolikon yana daku iniyas. Yaku aki kumonilai pokakana kobangkapi naponilai. Kobangkapi kitayo konandondoong, bai yaku kitayo konoano.”

⁸Doibundu Isai uange konapau, Aminadab, maka sumboliiyo momangadap doi Samuel. Bai Samuel bantile, “Yana koidan aki TEMENENO nalilike.”

⁹Maka Isai sumboliiyo Syama namaju, bai Samuel bantile, “Yana Koidan aki TEMENENO napilio.”

¹⁰Bunomokai doiya Isai nasumboliyano konapau pitu potutuundu momangadap doi Samuel, bai Samuel bantile doi yana, “Yanila aki TEMENENO napilio.”

¹¹Maka Samuel masadaikene doi yana, “Kai tolongo naiya sasaibino komupau mala-malaneno?” Isai timbiliyo, “Daanoon komeeng koidan, kopioto, bai yana daano mobatotooli domba.” Samuel bantile, “Sumboliiyo nainuang yana sabab kita aki nda moola kaan kalu yana akiyoon nalubat.”

¹²Maka Isai monggiuanggene dopaudoo. Tokita yana meeng kotabo motambongan tukon sehat, tukon komatano monondok. Maka ko TEMENENO bantile doi Samuel, “Naiyamokai yana; odudukemo yana!”

¹³Salataa lapa doiya Samuel mangala dozaitunoo lisisono tukon odudukemo Daud tukon konggoliomo batuluan lisison doi utuso langgo-langgongo salaano. Doi tempodoo koidan ko TEMENENO Na Roh kuasaiyomo Daud. Tambuun doi oloyodoo tukon banggadudul ko TEMENENO Narohlolaingemo. Lapa doiya mulemokai Samuel doi Rama.

¹⁴Ko TEMENENO Na Roh otinggalemo Saul, tukon diabudoo yana sinakisaamo luwedoi roh molokis; TEMENENO mosumboliiyo.

¹⁵Tobikon doiya Saul naata-ata bantile doi yana, “Ikami toiyo baikon ko TEMENENO sumboliiyo koroh molokis mosakisaayo Tuan.

¹⁶Kalu Tuan satuju, kami basadia moumbolii meeng komian mopandoi maen kasapi. Kalukai Tuan sinakisaa roh molokis, domianoo moola namaenggene konakasapi, tukon Tuan naikon lasayo sehat koidan.”

¹⁷Maka Saul palentayo doi yanila, “Moumboliimo meeng komian mopandoi bamusiik, tukon babayomo yana doisumai.”

¹⁸Salataa lengele doiya meeng konaata bantile, “Isai kota Betlehem tumbuno daano komeeng konapau malaneno mopandoi bamusiik. Yana meeng komian mobarani tukon meeng kosuludadu Yanakai koidan tambongan tukon pandoi basilingan, tukon ko TEMENENO sidutu tulungiyo.”

¹⁹Maka Saul makapatu bobitokon doi Isai nababayo nateteba nia, “Sumboliiyokai komupau Daud, domototooliyo domu domba-dombadoo namangadap doiyaku.”

²⁰Doibundu Isai sadiayo komeeng kokeledai, maka yana muotiio tukon meeng kombembe napau, roti tukon pulukon kulit koantoko moono anggur. Sasaibino doiya bineekon doi Daud tuuk sinosubakon doi Saul.

²¹Bunomo doiya Daud lubat doi Saul tukon teali napeleleani. Saul seseange yana tuuno tukon tinealikon pakanggi nasinapan.

²²Doibundu Saul makapatu teteba doi Isai, “Yaku yase doi Daud. Pataikenemokai yana natataap dungol dimbaa tukon leleaniaku.”

²³Salataa tambuun doiya sasamba luunggon doroh molokisoo nalubotiio Saul, Daud alayo konakasapi yana maenggene. Maka Saul lasayo tanaang tukon sehat koidan, sabab dorohdoo molokis otinggalemo.