Read Banggai 1 SAMUEL 17 Bible Online

1 SAMUEL 17 - Banggai bible

1 SAMUEL 17

¹Daano kotempo meeng ko Filistin miano atule konasuludadu sulano namaju polobosi. Yanila atule konabarisan doi kota Sokho, doi Yehuda nalipu lalomo tukon kekendenge kona basandungan doi napokalalatanan ko Sokho tukon Azeka, loolani ko Efes-Damim.

²Saul tukon Israel miano pototongi koidan tukon basandung doi Ela Pepelakono; yanila basa-basadia tuuk mosasalaane ko Filistin miano namolobosian.

³Bunomokai doiya ko Filistin miano nabarisan kokondong doi meeng kobunggul tukon ko Israel miano nabarisan doi bunggul bailon, tukon doi napokalalatanan daano komeeng kopepelako.

⁴Maka meeng komian mobukuan poakate kosambuno Goliat, luwedoi kota Gat, sumbot luwedoi Filistin nabasandungan tuuk motantange ko Israel miano. Konakatandak uga-ugaate tolu kometer,

⁵tukon yana mapake songgo tambaga tukon bokukum tambaga polobosian konakotoong uga-ugaate limakolono pitu kokilogram.

⁶Koaino linapis tukon palapis mianaino moluwedoi tambaga, tukon doi bengeno yana tanggunge kopandong tambaga.

⁷Konapandong lulukano konakabasal pokakana kokayung batonunan pakakaso, tukon konapandong matano uga-ugaate pitu koliloglam konakotoong. Meeng kosuludadu ampakon doi salaano tukon mababa tombide.

⁸Goliat tade maka tukon nggeleomoniio ko Israel miano nasuludadu, “Oila kopoo kinubai koindokon? Kai komuyu yase polobosi? Yaku meeng ko Filistin miano, eh Saul naata-ata! Lilikemokai komeeng komian doi komuyunokon mobarani tokolu sulano mai polobosi.

⁹Kalu doi tandingan polobosianoo lalomo, yaku tangakate, kami yase teali muata, bai kalu yaku komo manaang tukon mangakate, komuyumo naikon komo teali maiata.

¹⁰Budodoiyamo kai, dakutantangano ko Israel nasuludadu; piliyomokai komeeng komian sulano napotanding molawanaku!”

¹¹Salataa Saul tukon konamian lengelemo dotantanganoo yanilakai nggimnggim tukon teali matakut tuuno.

¹²Daud daanokai Isai napau Efrata miano, moluwe doi Betlehem doi Yehuda. Isai daano konapau malaneno alu komian, tukon doi Saul nabapalentaan loununo, Isai motuamo tuuno.

¹³Kotolu Isai napau langgongo tauso polobosi lainge Saul. Kolanggongo kosambuno Eliab, koluano Aminadab tukon kotoluno Syama.

¹⁴Daud pau pioto. Doi tempo kotolu doutusodoo langgongo daanoon polobosi lainge Saul,

¹⁵Daud tetembokon otinggale Saul tukon mule doi Betlehem sulano nadagaiyo kotamano nadomba.

¹⁶Sanggap kolono kooloyo konakalumbit, sasamba kododoa tukon kinobian, Goliat koolaniyo ko Israel miano nabarisan tukon tantange yanila.

¹⁷Daano kooloyo meeng Isai bantile doi Daud, “Mangalamokai songulo kokilogram kobokinde mosinua tukon narotinia mosongulo, tukon babayomo doi utus-utusomu langgongo doi suludadu nabasandungan.

¹⁸Babayomo koidan nakejunia saono mosongulo babakenemo doi pasukanoo kapalano. Masadaikenekai bulaando kondondoongo koutus-utusomu langgongo, tukon babayomokai konabukutii doiyaku baikon ikoo lapamo posuung tukon yanila tukon akiyo kobula-bulaa.

¹⁹Yanila daano doi Ela Pepelakono polaing Tomundo Saul, tukon sasaibino ko Israel miano daanoon mopolobosi molawane ko Filistin miano.”

²⁰Modoakon kooloyono, dodoa, Daud bangun maka basadia. Konadomba yana monggidagaikene doi meeng kopototooli, doibundu yana leleiyo konalobo kinanggi maka nalengget, loingiyo kotamano napinalentahkon. Doi tempo napolongan doi basandungan pokokonoi ko Israel miano natausan doi polobosian lalomo tukon keis-keison salaku tanda polobosian.

²¹Ko Filistin nasuludadu tukon Israel nasuludadu posasalaan tukon basa-basadia tuuk polobosi.

²²Maka Daud otinggoliikene konalobo kinanggidoo doi suludadu pototooli lolonggu tukon bulen doi polobosian lalomo sulano naposuunggene koutus-utuso langgongo.

²³Bai salataa yana daanoon mobasilingan tukon yanila, Goliat maju doi muka tukon motantange ko Israel miano, buno mobiasamo yana lakukene. Daudkai lengele konatantangan bantilan-bantilanoo.

²⁴Mosobit salataa ko Israel miano kitayo Goliat, yanila bulen sabab matakut.

²⁵Yanila sasaibino bantile, “Kitayomokai yana! Lengelekai kona tantangan binantil! Saul nda tomundo lapamo paladandi baikon indeemo komo akateo Goliat, naikon binee tambo mobabasal. Tomundo koidan naikon osowaanggene domianoo tukon namoluko. Tukon domianoo tamano pulino naikon pinelei doi babealan lulu.”

²⁶Maka Daud bantile, “Barani tuuno ko Filistin miano makiyo kona temenenodoo motantange ko Mian Bisa motubo nasuludadu!” Doibundu yana masadai doi meeng kosuludadu, “Oilakai naikon komo bineekon doi mian momoola akateo do Filistin mianodoo tukon akiyenggene kototulai motuuk doi Israel?”

²⁷Korayat popitoikene doi yana oila komo lapamo tomundo dondiikene.

²⁸Eliab Daud utuso langgongo lengele Daud mobasilingan tukon suludadu-suludadu. Yana teali nggimoliio doi Daud tukon bantile, “Bulaando ikoo molubat doisumai? Indee komo lapamo ikoo sumboliyo mouluse komudomba-domba mobubuladoo konakadaang doi padang bone? Yaku toiyo komu ndondoong barani; ikoo lubat doisumai tuuk kitayo kopolobosian bolikon?”

²⁹Daud timbiliyo, “Oila daku salah? Yakukai tongo masadai!”

³⁰Maka yana taus tukon masadaikene kolangge mopokakana doi suludadu-suludadu bailon; tukon yana malaat potimbili bunomo koidan doiya.

³¹Bai bubula komian molengele Daud nabantilan, pelenggenemo doi Saul, jadi Daud inuang momangadap.

³²Daud bantile doi Saul, “Tuan maunaaki ndamatakutene do Filistin mianodoo! Ata basadia molawane yana.”

³³“Inai” Saul timbiliyo, “Bulaando konatealian ikoo mopotanding tukon yana? Ikoo daano mongula tuuno, baikai yana biasamo mopolobosi salataa doi napaumalanean.”

³⁴Bai Daud bantile, “Tuan, ata biasamo totoolio ata tamano nadomba. Kalukai daano kosinga kai asu lobo molubat sokuwo kodomba,

³⁵doiyayonoo mobarani ata lelenggene tukon umbase, maka ata salamatkanggene dodombadoo. Tukon kalu singa kai asulobodoo lawanaku, maka ata taanio kobulungo, maka ata bobokiio sampe mate.

³⁶Ata lapamo mangakate singa kai asulobo, tukon do Filistin mianodoo moakiyo kona temeneno koidan naikon buno pokakana doiyayon-iyayonoo, sabab yana barani totulaiyo kosuludadu moluwedoi Mian Bisa.

³⁷Ko TEMENENO lapamo salamatene ata luwedoi singa tukon asu lobo, Yana koidan naikon salamatene ata luwedoi Filistin mianodoo.” Maka Saul bantile doi yana, “Monondokokai, boliisi ko TEMENENO natulungikon.”

³⁸Saul beekene konapakean polobosian, doiyamo meeng kokalambi besi doi Daud tukon Daud konoikenemo. Maka Saul konoikene kosonggo tambaga doi Daud oluno.

³⁹Doibundu Daud boboikene Saul nasabel doi kalambi besidoo maka sobayo moampakon, bai aki namoola, sabab Daud aki napomanaanggon momapake pakean polobosian. “Ata aki namoola ampakon tukon napakean nia,” konabantilino doi Saul, “Ata aki nabiasa mapake.” Maka iniduso sasaibino dopakean polobosianoo.

⁴⁰Doibundu yana alayo konatongkat batotoolian, tukon molilik lima kobatu momatimbuk luwedoi paisubatango, maka usekene doi napulukan lalomo. Tukon kodimbaalot motasadiamo doi limano, maka yana tauso mopososuunggene Goliat.

⁴¹Doibundu bubula mo kotempo Goliat napakanggi tombide komo loolukoniodoo, ambakono mokoolaniyo Daud.

⁴²Bai salataa yana kitayo Daud tukon okiteese, Goliat kokumbite tukon sosiboliyo sabab Daud daano mongula tuuno tukon tambongan.

⁴³Goliat bantile doi Daud, “Oila konatotuuk koya mutongkatokon? Ikoo anggene kai yakunia asu?” Goliat sambuwo sasaibino konapoo ila sulano nakutuke Daud.

⁴⁴Tukon koidan yana tantange Daud konabantilano, “Ayo maimo! Sulano kobutomu kubeekene kotomisi tukon iyayon nakaane.”

⁴⁵Bai Daud timbiliyo, “Ikoo lubat lawanaku tukon sabel, pandong tukon sosiduk, bai yaku lubat lawane ikoo tukon TEMENENO sambuno Mo Babasal konakuasa, Israel nasuludadu na Mian Bisa ikoo mototulaiyodoo.

⁴⁶Doi oloyo nia koidan ko TEMENENO naikon salakanggenemo ikoo doiyaku; yaku naikon lungguikon tukon yaku naikon patele koolumu. Kobutomu tukon ko Filistin nasuludadu-suludadu butongo yaku naikon beekene kotomisi tukon iyayon sulano nakaane. Maka posaapon kodunia naikon toiyo baikon ikaminia Israel miano daano komai Mian Bisa ikami mososubaiyo,

⁴⁷tukon sasaibino komian dimbaa naikon kitayo baikon ko TEMENENO aki napalaluuwo kosabel kai pandong tuuk salamatene Konamian. Yanamo komo tantukanggene kololoon polobosian nia tukon Yana naikon salakanggene komuyu doi limanggami lalomo.”

⁴⁸Goliat tambuuno maju koolaniyo Daud, maka tukon mosobit Daud obulen taalikon doi Filistin miano nabarisan maka nasasalaane yana.

⁴⁹Daud puake konapolukon, mangala meeng kobatu maka lombitikene doi Goliat. Dobatudoo tepak doi Goliat bonggoto maka mapasamo kooluno tobongo, tukon yana tolubang tukon buno inanggalaup doi buta.

⁵⁰Daud obulen dombalaa Goliat, maka kokondong koolaniyo; yana alayo Goliat nasabel tukon bubute luwedoi salungo, maka yana patele Goliat oluno. Bunomokai doiya Daud nalungguiyano tukon naakateano Goliat, tolongo tukon dimbaalot tukon batu! Salataa ko Filistin miano daango kitayo baikon konapoo talenga momatemo yanila dampaso.

⁵¹

⁵²Ko Israel tukon Yehuda miano koku-kokuweis tukon lelenggene ko Filistin miano polong doi Gat tukon Eklon tataapono babasal. Ko Filistin miano pokolon totibalat popuson doi Saaraim loloonodoo!

⁵³Salataa lapadoiya ko Israel miano abalimo luwedoi napoo lolongganano ko Filistin miano, maka yanila lambase konapoo basandungan antoko.

⁵⁴Daud alayo Goliat oluno, maka binaba doi Yerusalem, bai Goliat nasinapan-sinapan inabos doi nasandung susuungo lalomo.

⁵⁵Salataa Saul kitayo Daud motaus lawane Goliat, yanakai sadaiyomo Abner dona suludadudoo talengano, “Abner, indeekai napau yana?” Abner timbiliyo, “Tuan, ata aki natoiyo.”

⁵⁶Maka Saul palentayo, “Tauso tukon masadaikene dolanggedoo.”

⁵⁷Jadi salataa lapa akateo Goliat Daud abali doi basandungan; Abner babayo yana momangadap doi Saul. Daud daano mokanggiyo Goliat oluno.

⁵⁸Maka Saul masadaikene doi yana, “He tabonokon! Indee napau ikoo?” Daud timbiliyo, “Ata nia Isai napau luwedoi Betlehem.”