Read Banggai 1 SAMUEL 18 Bible Online

1 SAMUEL 18 - Banggai bible

1 SAMUEL 18

¹Salataa lapa Saul tukon Daud basa-basalita, Saul oduduke Daud teali napagawai tukon tambuun doi oloyodoo yana akimo napinataikon momule doi tamano-tinano nabonua.

²Yonatan Saul namalane, lengele donapoo basalitaanoo. Yana lasayo monondok koidan doi Daud, tukon seange buno butongo susuungo.

³Tobikon doiya Yonatan batotopi naikon posobat tukon Daud sidutu posidutukon.

⁴Yonatan liate konajubah maka beekene doi Daud, koidan pakean polobosian tukon nasabel, pana batango tukon napoboot oako.

⁵Daud kubaiyo tukon monondok sasaibino kolimang Saul mobeekene doi yana. Tobikon doiya Saul odudukemo yana teali nasuludadu kapalano, tukon sasaibino kosuludadu tukon sasaibino Saul naata kilakene Daud.

⁶Salataa Daud abali doi nalapaan yana lungguiyo Goliat do Filistinoo miano, tukon sasaibino konasuludadu mobaris usok doi kotadoo lalomo, tobuat koboiboine luwedoi sasaibino kokota doi Israel tuuk mololobotio Tomundo Saul. Yanila mananikene kolagu-lagu labaan, tukon osu-osuleng tukon maenggene korebana tukon kasapi.

⁷ Daanoon moosu-osuleng sasaibino koboine manani bunonaiya, “Saul mangakate doi loloono komusuh bai Daud doi nasousonguloan koloono.”

⁸Salataa lengele doiya, Saul teali nggimal tuuno. Sabab yana pikikene, “Daud komo inaanggon mangakatemo doi nasousonguloan koloon komian, bai yaku tolongo doi nasosoloonan tolong. Naapadoiya koidan tantumo yanila tealikene yana napoo tomundo!”

⁹Tambuuno doi oloyodoo yana masakito konoano doi Daud.

¹⁰Modoakon kooloyono Saul daano doi nabonua lalomo daano motaanio konapandong tukon sosinggot koroh molokis lubotiio yana Mian Bisa mobintekene, tobikon doiya yana nggimalo buno mian motindo. Dotempodoo Daud daano maen kasapi buno nakabiasaan.

¹¹“Sio kubusanggene napandong nia doi Daud sampe tobusanggon doi sanggal!” Saul pikikene, maka yana sakukene donapandongoo polong lualuunggon doi Daud bai Daud aline.

¹²Saul toiyomo baikon ko TEMENENO lindungiyo Daud bai yana susuungo TEMENENO tinggale. Tobikon doiya yana teali matakutene Daud.

¹³Maka yana biele Daud nalimang mokapalaiyo kopagawai doi doi kamali, tukon oduduke yana teali komondan doi nasoloonan kosuludadu. Tukon buno doiya Daud katuaiyo konapasukan doi sasamba kopolobosian lalomo.

¹⁴Yana laksanakanggene sasaibino konalimang ano kohasilo, sabab ko TEMENENO tulungiyo.

¹⁵Salataa Saul kitayo baikon Daud sidutu ano konahasil, polokono yana matakutene doi Daud.

¹⁶Bai sasaibino ko Israel tukon Yehuda seange doi Daud sabab yana meeng kokatua mobadaang konajasa.

¹⁷Saul batetekene sulano ko Filistin miano naakateo Daud doi polobosian lalomo sulano nabolikon yana susuungo komo akateo. Jadi daano kooloyo meeng Saul bantile doi Daud, “Merab kuboine langgongo, naikon kupokilakene tukon ikoo, asalkai ikoo muokitakene komu baranian doi polobosian lalomo motuuk doi TEMENENO.”

¹⁸Daud timbiliyo, “Oilakai koalatino naata nia, tukon oilakai koalatino kotamanggu nakaluargaa doi Israel, tobikon ata teali Tomundo namonianan?”

¹⁹Bai salataa laate kotempono Merab nainosowaangganan tukon Daud, baanggokai boinedoo inosowaanggono tukon Adriel luwedoi Mehola.

²⁰Mikhal Saul naboine bailon yase kilayo Daud. Salataa Saul lengele dolanggedoo, yana satujuimo koidan.

²¹Yana pikikene, “Tadukai kubeekene Mikhal doi Daud, sulano Daud natangakakon tukon ko Filistin miano namoola akateo yana.” Jadi tuuk koluano luunggon Saul bantile doi Daud, “Diabudoo ikoo moola teali kumonianan.”

²²Maka yana sumboliiyo sasaibino konapagawai sulano nabontiikene doi Daud tukon akiyo komo toiyo, bunonaiya, “Tuan seange doikoo tukon sasaibino konapagawai; jadi diabudoomo kotempono motapaat doikoo tuuk pokilaikene konaboine.”

²³Bai salataa yanila pelenggene dogalaloo doi Daud; yana timbiliyo, “Komuyu anggene gambang kotealian tomundo namonianan? Yakukai mian motalalais tukon akio koalatino!”

²⁴Sasaibino dopagawaidoo popitoikene doi Saul Daud napotimbilidoo,

²⁵maka Saul sumboliiyo yanila mobontiikene doi Daud, buno nia, “Tuan naminakisuuti salaku kopasaino tongo 100 ko Filistin miano namaa oluno kulito, salaku posobolino doi tuanoo namusuh.” (Naiyamo Saul nabinatetelikon sulano naakateo Daud tukon lolo doi Filistin miano.)

²⁶Sasaibino Saul napagawai pelenggene dotetebadoo doi Daud, tukon Daud talimayo doi tomundo nagalal. Tobikon doiya, akiyoon nalaate konakabusan kotempono, yana luwemo tukon nasuludadu doi Filistin lipuno. Yana akateo ko 200 ko Filistin miano, maka yana alayo konapoo maa oluno kulito, tukon sinalakanggon doi Saul tukon akiyo komeeng mokulang. Salataa lapa doiya Saul pokilakenemo Mikhal tukon Daud.

²⁸Sambuno buno doiya Saul toiyomo baikon ko TEMENENO lindungiyo Daud tukon koidan koboine Mikhal seange yana.

²⁹Tobikon doiya yana pololokono matakutene Daud mosikitene yana polong pomatekon.

³⁰Sasamba lunggon kalukai ko Filistin nasuludadu lubat momolobosi, Daud polokon badaang konainakate luwedoi sasaibino Saul nasuludadu kapalano bailon. Maka Daud polokono tololongol.