Read Banggai 1 SAMUEL 19 Bible Online

1 SAMUEL 19 - Banggai bible

1 SAMUEL 19

¹Saul bantile doi namalane Yonatan, tukon doi sasaibino konapagawai baikon yana sio naakateo Daud. Bai Yonatan seange tuuno doi Daud,

²tobikon doiya yana bantile doi yana, “Kotamanggu kakaate moakatekon; jadi bada-badagai! Sapitokai namodoa dodoa doi meeng kolipu motosookon, tukon dungolo idoo.

³Yaku naikon taus doi padang polaing tukon kotamanggu tukon kokondong doi naloolanian domu lipu sapitanoo. Maka yana naikon posilingonii motuuk doikoo, tukon doimbai posilingoniianoo makasuuto maka nasodo kubontiikonggon.”

⁴Maka Yonatan bantile komo monondok tentang Daud doi Saul, konabantilano, “Tama, inaimokai Tama mosilakaiyo komuata Daud. Sabab yana aki na mokubai kasalahan oioila doi Tama; baikai kobalino, yana badaang tuuno konalimang doi Tama.

⁵Yana bataanggenemo kobutongo doi naakateano Goliat, tukon ko TEMENENO beekenemo komanaangan mobabasal doi Israel lolo doi yana. Tama susuungo lapamo kitayo dokadadianoo, tukon doi tempodoo Tama laba. Jadi, bulaa diabudoo Tama mosio mukulokisene komian moakiyo konasalah tukon yase moakateo Daud akiyo koalasan oioilakai?”

⁶Doi Yonatan nabantilan-bantilanoo Saul teali sadar, tukon yana batotopi lolo TEMENENO sambuno baiko Daud aki naikon naakateo.

⁷Salataa lapadoiya Yonatan uange Daud, tukon salitaikene sasaibino konapoo sinalita budodoo. Doibundu yana babayo Daud doi Saul, tukon Daud leleaniyo yana buno loluk.

⁸Doibundu tealimo koidan kopolobosian tukon Filistin miano. Daud molobosi tukon kalayo yanila sasaibino, tobikon doiya yanila buleno.

⁹Daano kooloyo meeng Saul daano moosulang doi nabonua tukon taanio konapandong doi limano tukon sosinggot Saul linubotii koidan roh molokis TEMENENO mosumboliyo. Doi tempodoo Daud daano momaenggene konakasapi.

¹⁰Maka Saul kakaate mokudokiikene kona pandong doi Daud doi daanoan mololani kosanggal. Bai Daud basilaton, maka dopandongoo tobusanggon doi sasanggal. Daud dampas sulano nasalamatene kobutongo.

¹¹ Doi popokoo koidan Saul mosumbolii bubula komian doi Daud nabonua sulano nasopitio Daud tukon naakateo doi tempo dodoa. Bai Mikhal donabolokidoo bantile doi yana, “Kalu ikoo aki mudampas popokia, namodoa dodoa ikoo tantumo moinakate.”

¹²Maka Mikhal obulusene Daud lolodoi lolombong, tukon Daud dampasene kobutongo tobikon nalolos.

¹³Salataa lapa doiya Mikhal alayo koilah timbalango doi nabonua lalomo maka abese doi Daud namooloan. Doibundu taalikon doi oluno inobosi tangunan luwedoi mbembe bulono, tukon koikoidan tinonggupikon dotimbalangoo tukon nalunggut.

¹⁴Salataa sasaibino Saul nabito-bito lubat tuuk molakoyo Daud Mikhal bantile, “Daud daano momasakit.”

¹⁵Bai Saul sumboliyo koidan yanila nataus idoo sulano napoo kitayo Daud tukon matanoila susuungo. Konaparentah, “Babayomo yana doi sumai tukon sasaibino konamooloan, sulano kuakateo.”

¹⁶Maka usoko dobito-bitodoo doi kombiang lalomo tukon komo talaat tongo dotimbalangoo motangabos doi mooloan tukon tangunan moluwedoi mbembe bulono taalikon doi oluno.

¹⁷Saul bantile doi Mikhal, “Tutuu bisa ikoo moakakanaku bunonia! Ikoo lapamo tulungiyo dakumusuh modampasene kobutongo!” Mikhal timbiliyo, “Yana nggimal tukon naikon akateaku kalu aki kuyase tomboniiyo yana modampasene kobutongo.”

¹⁸Salataa Daud moolamo lolos, yana taus doi Samuel nabonua doi Rama, maka bontiikene sasaibino Saul nalinakukanggon doi yana. Doibundu Daud tukon Samuel polaing-laing taus doi Nayot tukon dungol idoo.

¹⁹Bai binontiikon doi Saul baikon Daud daano doi Nayot lolani ko Rama.

²⁰Tobikon doiya Saul mosumbolii bubula konabito-bito sulano nalakoyo Daud. Bai yanila laate konabi meeng tambuno modaanoon moosu-osuleng tukon wowookon posinggat-singgat, Samuel komo katuaiyo. Maka sasaibino doi Saul nabito-bitodoo Mian Bisa Na Roh kuasaiyomo tobikon yanila koidan tambuuno osu-osuleng tukon wowookon.

²¹Salataa dobilitadoo polong doi Saul, yana mosumbolii bito-bito bailonggon tukon yaniladookai tambuun osu-osuleng tukon wowookon. Tuuk kotoluno luunggon Saul namosumbolii bito-bito tukon bunomo doiya koidan kona tealian doi yanila.

²²Tobikon doiya Saul tauso doi Rama. Polong doi bubung babasal doi Sekhu yana masadai inaando Samuel tukon Daud nadaanoan, tukon komian idoo popitoikene doi yana baikon yanila daano doi Nayot.

²³Jadi yana banggadudul dombalaa, bai yana koidan Mian Bisa Na Roh kuasaiyomo, tobikon yana osu-osuleng tukon wowookon popuson kona ampakonan doi Nayot.

²⁴ Salataa polong indaa, yana bukayo konapakean tukon osu-osuleng maka wowookon doi Samuel salaano, maka tolubang doi buta tukon talalau posopokon kooloyo tukon popook. (Naiyamo kona tambuunan kososombot, nabantilano, “Oilakai Saulloo tealimo nabi?”)