Read Banggai 1 SAMUEL 2 Bible Online

1 SAMUEL 2 - Banggai bible

1 SAMUEL 2

¹ Maka Hana sambeang, konabantilano, “TEMENENO kindendeke konoanggu; Konakokubai kindendeke dakutuboan. Tukon ku sanaangan maka kutotulaiyo daku musuh, sabab tutuumo ko Mian Bisa lapamo tulungiaku.

²Akiyo komo moliyous mo buno TEMENENO! Tolongo Yana komo moola beena soopan.

³Atadeomo komu babanggaalan mokosong! Opusiomo kobasilinganan mo akiyo kotakoso! Sabab do TEMENENO doo Mian Bisa Mo Babasal konapangalatian. Komo hakimiyo sasabino komian nakokubai.

⁴Ko talenga napana batango lapamo moloto, bai komian mo muyuk pololokon bukuan.

⁵Komian lolukon mo bobosul sabab badaang kokinaan, budodoiya teali mian mo balainggon sulano namalaat kinaan. Mian doi lolukonoo momalaal, diabudodoo biai, sukup kokinaan. Koboloki mo kamba, diabudodoo babanggaal, pitu kopau molapamo na suunge! Bai kotina mo badaang konapau, inotinggalo, binatadikono nasusah.

⁶Ko TEMENENO akateomo, Yana kai otuboiyomo. Doi mian mate nadunia Inobuluson kobanggapi. Tukon yana koidan komo binggate luwe indaa.

⁷Daano komian mokinubai talalais, daano koidan komo kinubai kaasa. Daano komian mo pinandang enteng, daano koidan komian mo kinatandak.

⁸Luwedoi nasakisaawan Yana bingkate komian moakiyo konabuat, luwedoi sakisaawan sinodiimo komian motinotulai. Yanila tinealikon tula-tulano sasaibino komian motulunan sambu, tukon bineekon kosambu moinodotii. Kobuta sakean TEMENENO koona, doi bunggono binangun kodunia.

⁹Komian momangga sidutu aman, doi TEMENENO napopiala lalomo. Bai komo lokis manas tuuno doi kalipookan lalomo tukon kalipookan tuuno. Konabukuanan susuungo aki namoola balaanggene, kobanggapi nabukuanan aki nalubatene komanaangan.

¹⁰Ko TEMENENO namusuh-musuh manas molutak, yanila matakut; luwedoi timbu Yana bubunggon. Ko TEMENENO naikon hakimiyo posaapon nadunia nia, tukon beena kuasa mobabasal doi tomundo Nalinilik.”

¹¹Maka Elkana mulemo tukon nakaluargaa doi Rama, bai Samuel, dopaudoo dungolo doi Silo tukon leleaniyo ko TEMENENO luwedoi Imam Eli napangatur.

¹²Eli napau-pau lokis tuuno. Yanila aki namatakutene ko TEMENENO

¹³tukon yanila salaku Imam mokubai tindakan mo lobi-lobian doi Israel miano. Kalu andeno daano komian mososubakon sosuba, kopotombonii Imam lubat momababa polok mo tolu kongolingo. Kalu daanoon dosailoo mokinolua,

¹⁴doi porokoo tinobokon doi paang lalomo dosailoo nasinaangan, maka dosailoo mototobokon doi porokoo doiyamo komo teali Imam koona. Sasaibino ko Israel miano mo lubat doi Silo tuuk namososubakon sosuba linakukanggon buno doiya.

¹⁵Tukon idan-idan dopotomboniidoo lubat akiyono koinako nainalaas sulano nasinua, maka yana bantile doi mian mo mososubakon dososubakonoo, “Beekenemokai koiya sailokon modaanon doi Imam sulano natapayo, yana aki naiyase matalima sail mokinolua.”

¹⁶Kalu domianoo timbiliyo, “Kona mondokan kalu kita taatio koaturan, tukon sinua doinakodoo looluk; salataa lapa doiya moolamo mubebas mumangala,” maka dopotombonidoo bantile, “Aki, diabudodoo koidan sio kubeekene, kalu aki, naikon yaku alayo tukon pakisaayo.”

¹⁷Bunomodoiyakai doi Eli napau molua namokubaiyan lalim babasal doi TEMENENO matano, sabab yanila pandang entenge ko sosubakon mosinosubakon motuuk doi temeneno.

¹⁸Daanoon mobuno doiya, Samuel doi napau-paunoanoo bai yana tambuuno moleleaniyo ko TEMENENO. Yana mapake kalambi motangalaas luwedoi toik lenan, buno sasaibino ko Imam nakalambi kaledaan.

¹⁹Sasamba kotaun kotinano mokubai jubah popoisik maka nabeekene doi Samuel kalu boinedoo polaing-laing tukon nalakai lubat mososubakon sosubakon taunan.

²⁰Maka Eli balakaatio Elkana tukon naboloki, tukon yana bantile doi Elkana, “Boliisi ko TEMENENO nabeena pau-pau koidan doikoo luwedoi muboloki nia, tuuk posobolino dopaudoo molapamo komuyu salakanggene doi TEMENENO.” Sambuno lapa doiya yanila mulemo doi Rama.

²¹Ko Mian Bisa balakaatio Hana, tobikon mosuung koidan tolu kopau malaneno tukon lua kopau boineno. Samuelkai tosuungi kona babasalan doi nadaanoan moleleaniyo ko Mian Bisa.

²²Eli motuamo tuuno. Yana sidutu momeenggon molengele ko pakalaakon tentang napau-pau nakalakuan motuuk doi Israel miano. Eli toiyo koidan baikon donapau-paudoo moolo tukon boi-boine mobalimang doi TEMENENO Na Sandung na daanoan tataapono salaano.

²³Tobikon doiya yana bantile doi napau-pau, “Yaku lapamo mantalima lapulan luwedoi sasaibino komian manganai polenggang kaliangano molokis. Bulaando komuyu mokubaiyo doiya?

²⁴Komuyu dakupau. Inaimo pokubaiyo bunodoiya koidan. Tutuu lokis tutuuno oila ko TEMENENO namian nasinalita motuuk doi komuyu!

²⁵Kalu komian mokubai salah motuuk doi banggapi, ko Mian Bisa moola belayo; bai kalu mian baladosa doi TEMENENO indeekai komo moola tulungiyo?” Bai yanila aki namaangga dotamano Eli naotinau doi yanila, sabab ko TEMENENO lapamo putusiyo sulano napo inakate.

²⁶Kona balikan Samuel, dopaudoo, pololokon babasal tukon pololokon kinilakon, mau doi TEMENENO mau doi sasaibino komian.

²⁷Daano kooloyo meeng lubato komeeng konabii doi Eli tukon pelenggene koteteba mo luwedoi TEMENENO doi yana, Konabantilano, “Salataa pombumbu Harun tukon nakaluargaa teali tomundo Mesir naata, Yaku lapamo okitakene Kobutonggu doi Harun.

²⁸ Luwedoi sasaibino ko Israel benseno lapamo Kulilike kona kaluargaa moteali Kuimam, tuuk peleleani doi balabaan, momosua kamangian, tukon mapake imam napakean kalu basilingan tukon Yaku. Doi yanila tukon napokatulunan Kubeena haak tuuk moalayo kosoobos luwedoi sosubakon mosinosubakon mo sinua doi balabaan.

²⁹Jadi, bulaando ikoo daano mombosinakene mokitayo kososubakon-sosubakon mopokokonoi tukon Kuparentah, Daku mian nasinosubakon doiya-Ku? Eli bulaando mo lobian komo odotiiyano komu pau-pau luwedoi muodotiiyano Yaku, tukon sodiiyomo yanila mokalanake kobutongo tukon obos mo monondok luwedoi samba Daku mian nasosubakon doiya-Ku?

³⁰Yaku, TEMENENO Israel na Mian Bisa, looluk lapamo paladandi baikon komu kaluargaa tukon mupokoolanian naikon leleaniyo Yaku salaku imam tuuk sidutu-posidutukon. Bai diabudonia Yaku akimo kuiyase dolanggedoo koidan! Sabab komo odotiiya-Ku, naikon Kuodotiiyo, bai komo totulaiya-Ku, naikon Kutotulaiyo.

³¹Ndongoliiyo, naikon lubat kotempono Yaku akateyo sasaibino kotabo doi mukaluargaa lalomo tukon mupokoolanian, tobikon akiyono komeeng komalane doi mukaluargaa lalomo naikon konaumur mo tatandak.

³²Ikoo naikon poloon tukon masakit konoamu mokitayo sasaibino kobalakaat naikon kubineekon doi mian-mian bailon doi Israel, baimokai doi mukalualgaa lalomo sasaibino naikon matedoi natabokonan.

³³Bai, meeng komian luwedoi mukatulunan, naikon kubatadikene natubo tukon leleaniyo yaku salaku imam. Maukai yana naikon nateali piit tukon tubo susah. Sasaibino komuturunan bailon naikon tangakate.

³⁴Salaku bukutii baikon sasaibino daku binantiloo tutuu naikon teali, maka domu paudoo mo lua, Hofni tukon Pinehas naikon mate doi meeng kooloyo lalomo.

³⁵Doibundu Yaku naikon molilik imam mo tulut-tulutan doi Yaku tukon lakukanggene oila Daku pinalentakon doi yana. Naikon Kubeekene kokatulunan doi yana mosidutu naikon balimang salaku imam doi tomundo-tomundo Kuililik salaano.

³⁶Sasamba komuturunan mo daano motubo, naikon taus doi imammoo tuuk mangkabi doy tukon kinaan. Yana naikon kabiyo: Pataikenemo kutomboniiyo sasaibino koimam, sulano kumalaat kaan mau natolongo soisik tolong.”