Read Banggai 1 SAMUEL 20 Bible Online

1 SAMUEL 20 - Banggai bible

1 SAMUEL 20

¹Maka Daud dampas luwedoi Nayot lolani ko Rama tukon taus pososuung Yonatan, maka sadaiyo, “Oila daku salah? Kulokisan oila komo lapamo yaku lakukene tukon oila daku lalim motuuk doi tamamu tobikon naiyase moakateaku?”

²Yonatan timbiliyo, “Inai mobantile bunodoiya! Tukon TEMENENO sambuno, ikoo aki naikon muinakate. Kotamanggu sidutu bontiikene sasaibino konatetel doiyaku, mau mopentiing, maukai moaki. Jadi aki namungkin kotamanggu moseekene kona makisuutoo motuuk doiyaku. Tobikon doiya, oila domu binantiloo aki nabisa!”

³Daud timbiliyo, “Tamamu toiyo tuuno baikon ikoo seseangaku. Jadi tantu yana aki naiyase bontiikene dolanggedoo doikoo sulano naaki mususah. Maunabulaandomo koidan, tukon doi TEMENENO sambuno motubo, konatutuuan dakutuboan bunokai nggalau doi tanduk bunduno!”

⁴Maka Yonatan bantile, “Oilanokai komu kinabi naikon kulakukanggene.”

⁵ Daud timbiliyo, “Bunonaiya, namodoa daanokai kolamean Bituwon Boolu, tukon siokai kukaan polaing-laing tukon tuan. Bai kalu ikoo yasemo, aki naikon kutaus tukon sapit doi padang polong iniwuan popook.

⁶Kalu tamamu masadaikene bulaando moaki kulubat, bontiikene doi tamamu, baikon yaku lapamo makabi palamisi doikoo sulano kumosobit mule doi Betlehem, sabab indaa kinubai kobakolobokian bakolotan iyayon sasamba kotaun motuuk doi sasaibino dakukalualgaa.

⁷Kalu tomundo bantile, ‘Monondoko,’ maka yaku naikon tanaango, bai kalu dotomundodoo nggimal, potoiyomokai baikon dotomundodoo lapamo mangala kaputusan sulano nasilakaiyaku.

⁸Yaku makabi mutulungan, sabab kita lapamo pomeenggene konda paladandian doi TEMENENO salaano. Kalukai yaku salah, akateakumokai, bai inaimo mosalakangganaku doi tamamu.”

⁹Yonatan timbiliyo, “Inai molili! Kalu yaku toiyo tukon tontong baikon kotamanggu lapamo niatene sulano naosilakaiyo ikoo, tantukai naikon yaku pelenggene doikoo.”

¹⁰Doibundu Daud masadai, “Indekai naikon komo bontiikene doiyaku kalukai andeno tamamu timbilikon tukon nggimal?”

¹¹Yonatan bantile, “Maimo ndataus doi padang.” Maka yanila tauso polaing-laing doi padang.

¹²Maka Yonatan bantile doi Daud, “Boliisi ko TEMENENO, Israel na Mian Bisa teali nda sakisii! Namodoa dodoa kai iniuwan uga-ugaat pokakana diabudoo kotempono, yaku naikon kakaate motoiyo kotamanggu noano lalom. Kalu konandondoong monondok doikoo, yaku naikon makapatu bilita doikoo.

¹³Kalu yana baniat mosilakaiyo ikoo, tantu naikon kupopitoikene doikoo koidan sulano mumoola salamatene kobutomu. Boliisi ko TEMENENO naakateaku kalu dolanggedoo aki kulakukanggene. Boliisi ko TEMENENO natulungikon buno yana molapamo tinulungi koidan!

¹⁴Tukon kalu yaku daano motubo neneekekai konda paladandian doi TEMENENO salaano tukon potaatkai doiyaku; bai kalu yaku akiyono,

¹⁵ Tudoikenekai komu taatan doi kutulunan polong sidutu-posidutukon. Tukon kalukai ko TEMENENO akabusemo komu musuh sasaibino,

¹⁶inaimokai nabontol konda paladandian luakita. Kalukai naikon teali bontol, TEMENENOkai naikon komo ukume ikoo.”

¹⁷Jadi tuuk koluano luunggon Yonatan nasumboliiyo Daud paladandi naikon naseseangano yana, sabab yana seseange Daud buno butongo susuungo.

¹⁸Doibundu Yonatan bantile doi yana, “Namodoa Lamean Bitoun Boolu. Tantu naikon tinoimo baikon ikoo moaki mulubat, sabab kosongo komutampat doi meda kaanan;

¹⁹baimokai kalu iniuwan! Tobikon doiya, potauso doipolipu sapitan moloolukoo, tukon totiiliomokai doi batudoo nainatambunan idoo tonggulungo.

²⁰Iniuwan yaku naikon mapanakon tolu kopana matano taalikon doi batudoo, kaukadukon panakene doi mopinakituu.

²¹Maka naikon kusumboliyo dakuata mopulute dopana-panadoo, tukon kalu yaku bantile doi yana, ‘Eh, dopanadoo loolani tuuno doisumai; alayomo,’ doiya koalatino baikon ikoo tanaang tukon moola musumbot. Yaku batotopi tukon TEMENENO sambuno motubo baikon akiyo kosilaka oioila doikoo.

²²Bai kalu yaku bantile doi kuatadoo, ‘Eh, dopanadoo lobian kona odoonan koidan dombalaa,’ doiya koalatino TEMENENO sumboliiyo ikoo motaus; jadi tausokai.

²³Boliisi ko TEMENENO nadagaiyo sulano konda paladandian luakita natataap kita taanio momeenggon.”

²⁴Maka sapitokai Daud doi padang. Doi Lamean Bituwon Boolu, Tomundo Saul lubat doi lameannoo.

²⁵Buno nakabiasaan yana osulang loolani kosasanggal; Yonatan mangala tampat doi salaano, Abner doi Saul sembeleng, bai Daud nakulusii tataap kosong.

²⁶Bai Saul aki nabantile kona akiyoonan nalubat Daud oloyodoo, sabab yana pikikene, “Baanggokai uga-ugate yana daano konahalangan, tobikon doiya yana aki nabilisii kalu mololoi agama.”

²⁷Doi oloyo bailonggon, doiyamo oloyo koluano Bituwon Boolu, Daud nakulusii daano mokosong koidan, maka Saul sadaiyomo Yonatan, “Bulaando kolubabi tukon naoloyo nia Daud moaki nalubat doi lameannia?”

²⁸Yonatan timbiliyo, “Yana lapamo makabi izin doiyaku sulano nataus doi Betlehem.

²⁹Konabantilano, ‘Pataikanakumo kutaus sabab dakukaluargaa daanoon molamekene kolamean bokolotan iyayon doi Betlehem, tukon koutusonggu langgongo sumboliiyaku lubat. Tobikon doiya, kalu ikoo pataikanaku sodiiyaku kutaus sulano kupososuung tukon daku montolutusan,’ doiyamo kosababpo tobikon naaki nalubat doi lamean nia, Tama.”

³⁰Salataa Saul lengele doiya yana nggimoliyo tuuno doi Yonatan tukon bantile doi yana, “Pau molokis tombololoaon. Diabudoo yaku toiyomo baikon ikoo mopomeenggon Daud tukon kubaiyo kobutomu tukon tinamu mammaa!

³¹Kai Aki mutoiyo baikon kalu daanoon Daud motubo ikoo aki naikon mumoola teali tomundo nai tano nia? Diabudoo sumboliyo komian naumboliyo yana tukon babayo doisumai, sabab yana sio namate!”

³²Maka Yonatan timbiliyo, “Bulaando yana mosio namate? Oila konadosa?”

³³Salataa Saul lengele doiya maka nasokulikene konapandong doi Yonatan sulano naakateo. Maka Yonatan toiyo baikon kotamano bisa tutuu konaniat mosio naakateo Daud.

³⁴Yonatan nggimal tuuno yana tinggalemo dolameannoo tukon yana akimo namakaan oioila doi oloyodoo koluano doi lamean Bituwon Booludoo. Yana poloon tuuno mopikikene Daud molapamo tamano Saul totulaiyo.

³⁵Modoakon kooloyono Yonatan taus doi padang sulano napososuung tukon Daud buno molapamo yanila pomeenggene doiya pandapatoo. Yana babayo komeeng kopau malaneno, naata,

³⁶maka nabantile doi yana, “Ayo, pulutekai kopanah-panah yaku naikon mopanakene.” Daanoon dopaudoo moobulen, Yonatan panakene komeeng kopanah liisio dopaudoo.

³⁷Salataa dopaudoo polong doi tampat panahdoo natuwongan, Yonatan nggeleamon doi yana, “Ah, panahdoo lobian modoon koidan indaa!

³⁸Mosobit soisik, inai modungol!” Dopaudoo pulute dopanahdoo tukon abali doi natuan.

³⁹Yana tutuu aki namangalati dobantilan-bantilanoo namakisud, tolongo Yonatan tukon Daud komo alatio.

⁴⁰Doibundu Yonatan beekene dona panah pakakaso doi paudoo tukon sumboliyo naabali doi kota.

⁴¹Salataa lapa dopaudoo taus, Daud sumbot luwedoi batudoo mo inatambun tonggulungo, maka sosuba tolu luunggon. Mau yana maukai Yonatan, lualuaila kokiil salataa yanila pouma. Daud napoloonan lobioniiyo Yonatan napoloonan.

⁴²Doibundu Yonatan bantile doi Daud, “Boliisi ko Mian Bisa natulungikon. Ko TEMENENO naikon daanokene baikon kita tukon ndatulunan sidutu taanio konda paladandian luakita doi Mian Bisa salaano.” Salataa lapa doiya Daud tauso, tukon Yonatan mulemo doikota.