Read Banggai 1 SAMUEL 21 Bible Online

1 SAMUEL 21 - Banggai bible

1 SAMUEL 21

¹ Maka Daud tauso doi Imam Abimelekh doi Nob. Tukon ngginggim Abimelekh sumbot mopososuung Daud tukon masadai doi yana, “Bulaando motongo susuumu komo doisumaikon?”

²Daud timbiliyo, “Tuan lapamo beena yaku meeng kolimang tukon pantane mobontiikene doi meeng komiankai dolimangoo kaliangano. Tobikon doiya daku suludadu yaku sumboliiyomo mototiili doi meeng kotampat.

³Maaf, diabudoo yaku yase masadai, kinaan oila komo daano doi Tama? Beenggumo lima koroti kai oilamo komo daano dimbaa.”

⁴Maka do Imammoo bantile, “Yaku akiyo daku roti biasa, tongo roti sosubakon komo daano; ikoo moola mumangala, asal komusuludadu naaki nalakukanggene kopokooloiyan sosodoan nia.”

⁵Daud timbiliyo, “Tantumo yanila aki nalakukanggene. Sidutu kalu kami balimang, dakusuludadu totoolio sulano naaki napoo mokubai langge-langge mopinantanggon doi agama, baanggokai kona bisaanoo tolongo tuuk limang-limang biasa; bainokai kolimang mo tangalaas buno diabudoo nia!”

⁶ Maka doimammoo beekene doi Daud koroti sosubakonoo, sabab komo daano doi yana tolongo roti mosinosubakon doi Mian Bisa, tukon lapamo biningkat luwedoi balabaan tuuk posoboli tukon roti boolu. (

⁷Pokonoi, Doeg Edom miano Saul napototooli iyayon piniala kapalano daano idoo doi oloyodoo sulano natapaatiyo komeeng koagama kawajibano.)

⁸Doibundu Daud masadaikene doi Ahimelekh, “Oilakai Tama mangabos pandong kai sabel momoola kupakeo? Doi Tuan naparentahdoo mandadak tuuno tobikon doiya yaku luwe tukon sia-sia tuuno tukon aki kutodan koidan momangala senjata kai pakakas bailon.”

⁹ Maka Ahimelekh timbiliyo, “Yaku abese Goliat nasabel, Filistin miano ikoo moakateo doi Ela Pepelakono; dosabeloo daano doi Efod tonggulungo, tobungus doi toik lalomo. Kalu ikoo yase, alayomo, sabab tolongo doiyamo kosenjata modaano dimbaa.” Daud bantile, “Dosabelloo sabel momonondok doi posaapon kotano, beekenemo doiya doiyaku!”

¹⁰Doi oloyodoo koidan Daud dampasene kobutongo luwedoi Saul, maka polong doi Akhis kota Gat tomundono.

¹¹ Sasaibino konapagawai bontiikene doi Akhis bunonaiya, “Bolikonkai yana nia Daud, tomundo doi natano? Tukon bolikonkai tuuk yanamo sasaibino koboine doi tempodoo osu-osuleng tukon manani bunonia, ‘Saul mangakate doi loloono komusuh, bai Daud doi nasousonguloan koloono?’ ”

¹² Dobantilan-bantilanoo gangguwe Daud napikilan, tukon yana teali matakut tuuno doi Tomundo Akhis.

¹³ Tobikon doiya doi mian badaang salaano Daud bakokolii tindo. Salataa yanila sosobayo motaanio, yana babunokon mian moakinduung natoitanga konapikilan; yana kalu-kaluke kokota tataapono tukon sodiikene naseselet kona nggeook doi nasimbil adeno.

¹⁴Maka akhis bantile doi sasaibino konapagawai, “Kai aki pokitayo baikon domianoo tindo? Bulaando komuyu mobabayo doisumai?

¹⁵Kai daano mokidik komian moaki natoitanga konapikilan doi potikunggon yaku, tobikon doiya pobabayo koidan komeeng komian motindo doi kubonua nia?”