Read Banggai 1 SAMUEL 22 Bible Online

1 SAMUEL 22 - Banggai bible

1 SAMUEL 22

¹ Doibundu Daud tinggale kokota Gat tukon sapit doi leeng moloolani kokota Adulam. Salataa koutuso langgongo tukon sasaibino konakeluarga lengele baikon yana daano idoo, yanila lubato doi yana.

²Tukon koidan badaang komian molinailainggon, moano konasamea, tukon morasayo aki nabiai, sasaibino pomeenggon tukon Daud, tukon Daud teali napoo katua. Komo lainge Daud konakadaang uga-ugaat daano ko 400 komian.

³Luwedoi leengoo Daud taus doi Mizpa doi Moab tukon bantile doi tano Moab tomundono, “Pataikenemokai komuata tamano tukon tinano nadungol doi ku Tuan sulano ata natoiya oila ko Mian Bisa namakisud motuuk doi ata.”

⁴Doibundu kotamano tukon tinano yana babayo doi tano Moab tomundono, tukon yanila tataap indaa doi nadaanoan Daud mosapit doi leeng.

⁵Daano kooloyo meeng komeeng konabi kosambuno Gad lubat doi Daud tukon bantile, “Inai modungol naileengia, tauso tukon mosobit doi Yehuda nabuta.” Maka tauso Daud tukon usok doi pobilat bonggulungo.

⁶Daano kooloyo meeng Saul daano moosulang doi kayung tamaliska adeno doi Gibea bunggulo bunggono; yana daanoon motaanio kona pandong bai sasaibino konasuludadu kapalano kokondong potikunggon yana. Salataa yana lengele baikon Daud natampat tukon nasuludadu tinoimo,

⁷yana bantile doi sasaibino konasuludadu kapalano, “Ndongoliio, he Benyamin miano! Oilakai Daudtoo naikon beenggemuyu asi tukon anggul asino? Oilakai komuyu sasaibino inoduduk teali suludadu kapanalano doi nasuludadu lalomo?

⁸Doiyamokai kosababpo komuyu pomeenggon molawanaku tukon akiyo komeeng komian mopopitoikene doiyaku baikon dakupau susuungo kokousoko doi Daudtoo? Akiyokai komeeng komian moluwedoi komuyu mopikikene kobutonggu kai popitoikene doiyaku baikon i Daud, kusuludadu susuunggu, doi tempo nia daano mototiili todanan sulano naakateaku, tukon baikon dakupau Yonatan beenamo dorongan doi yana!”

⁹ Doeg Saul napototooli iyayon kapalano, daano idoo koidan tukon sasaibino Saul nasuludadu kapalano, maka Doeg bantile, “Ata kitayomo Daud molubotiiyo Ahimelekh Ahitub napau doi Nob.

¹⁰Ahimelekh makabi otunggul doi TEMENENO oila kokaliangano komo sio Daud nalakukanggene. Sangalaasan doiya Daud kinomondui kinaan koidan tukon Goliat nasabel bineekono doi yana, do Filistin mianodoo.”

¹¹Maka tomundo monggiuanggene Imam Ahimelekh tukon sasaibino kona montolutusan moteali imam doi Nob; maka yanila mangadap doi yana.

¹²Saul bantile doi Ahimelekh, “Ndongoliiyokai, he Ahitup napau!” Konapotimbili, “Oode Tuan.”

¹³Saul masadai doi yana, “Bulaando ikoo mopomeenggon tukon Daud molawanaku? Bulaando ikoo mokomonduio yana roti tukon ikoo beena sabel tukon ikoo makabi otunggul luwedoi Mian Bisa? Jadi diabudoo yana lawanemo yaku tukon daanoon mototiili todanan sulano naakateaku.”

¹⁴Maka Ahimelekh timbiliyo, “Bai bolikonkai Daud Tuan nasuludadu kapalano motaat Tuuno? Yana doiyamo Tuan namonianan susuungo, Tuan napololaing kapalano, tukon sasaibino komian doi Tuan nakamali lalomo odotiio yana.

¹⁵Bisa molapamo ata makabi otunggul luwedoi Mian Bisa tuuk yana, bai bolikon kotumbeno luunggon ata nalinakukanggon. Pomeenggonan kaliangano molawane i Tuan inaimo koidan Tuan molaite ata kai meeng komiankai doi ata nakaluarga lalomo. Ata aki namotoy oioila dopalakaladoo kaliangano!”

¹⁶Bai tomundo bantile, “Ahimelekh! Ikoo tukon sasaibino komu montolutusan tantu mate.”

¹⁷Maka yana monggiparentahkene doi sasaibino konapololaing nakokondong koolaniyo yana, “Ayo, poakateomo do TEMENENO doo naimam-imam! Yanila pomeenggono tukon Daud. Yanila toiya baikon Daud dampasene kobutongo, bai yanila aki nayase popitoikene doiyaku.” Bai sasaibino dopololaingoo aki naiyase moakateo do TEMENENO doo naimam-imam.

¹⁸Tobikon doiya Saul bantile doi Doeg, “Ayo mosobit! Ikoomokai komo akateo yanila!” Maka majumo kai Doeg tukon akateomo doimam-imammoo. Doi oloyodoo yana mangakate alu kolono lima koimam-imam momoola pakeyo ko Efod kalambino.

¹⁹Saul koidan maparentahkene sulano nainakate sasaibino ko Nob tumbuno, doi imam-imamoo nakota; mala-malane, moluko, pau-pau tukon paulumboon, koidan saapi, keledai tukon domba, sasaibino inakate

²⁰Tolongo Abiyatal, meeng komian moluwedoi Ahimelekh napau-pau komo luput. Yana dampasene kobutongo doi Daud,

²¹maka popitoikene baikon Saul moakateomo sasaibino ko TEMENENO naimam.

²²Maka Daud bantile doi yana, “Salataa kukitayo Doeg indaa doi oloyodoo, yaku toiyomo tukon tantumo baikon yana naikon mobakalaakon doi Saul. Jadi yakumokai komo tanggungjawape doi sasaibino komu montolutusan namatean.

²³Dungolo doi yaku tukon inaimo momatakut. Saul yase akatekon, bai yana yase koidan moakateaku. Jadi, ikoo naikon tanaang doi kutampat.”