Read Banggai 1 SAMUEL 23 Bible Online

1 SAMUEL 23 - Banggai bible

1 SAMUEL 23

¹Daano kooloyo meeng pinopitoikon doi Daud baikon ko Filistin miano lubat molobosiyo kokota Kehila tukon lambase kogandum mosodo pinatol.

²Maka yana masadaikene doi TEMENENO, “Kai sio kulubat molobosiyo ko Filistin miano?” “Oode,” TEMENENO timbiliyo, “lobosiomo yanila tukon salamatene ko Kehila tumbuno.”

³Bai Daud nasuludadu bantile doi yana, “Sabeakai dimbaa, doi Yehuda, kita matakuto; bainokai kalu kita tauso molobosiyo ko Filistin nasuludadu doi Kehila.”

⁴Tobikon doiya daanoon koidan Daud momakabi otunggul luwedoi TEMENENO, tukon TEMENENO timbiliyo, “Inai momolili. Lobosiomo kokota Kehila, sabab ko Filistin nasuludadudoo naikon yaku salakanggenemo doi komuyu.”

⁵Maka tauso Daud tukon nasuludadu doi Kehila maka nalobosio tukon naakateo ko Filistin miano; tukon lambasemo konapoo iyayon piniala. Bunomokai doiya Daud naoluputano dokotadoo tumbuno.

⁶Salataa Abyatal Ahimelekh napau dampasene kobutongo doi Daud, tukon loolainge Daud doi Kehila, yana koidan makanggi Efod.

⁷Salataa pinopitoikon doi Saul baikon Daud modaano doi Kehila, Saul bapikil, “Daud lapamo Mian Bisa salakanggene doiyaku. Yana tangakakon sabab usoko doi kota lalomo modaano kotemboko tukon tataapono mobabasal.”

⁸Maka Saul kumandeo konasuludadu tukon ampakon doi Kehila sulano nalobosio Daud polaing-laing sasaibino konasuludadu.

⁹Bai Daud toiyomo baikon Saul konatetel kulokis doi yana. Tobikon doiya yana bantile d oi Imam Abyatal, “Babayomo do Efodtoo doisumai.”

¹⁰Maka Daud sambeang, “TEMENENO, Israel na Mian Bisa, yaku lengele baikon Saul daano konatetel sulano nalubat doi Kehila tukon namanase dokotadoo sabab yaku, Muata.

¹¹Kaibisa dobilitadoo kulinongol? TEMENENO, Israel na Mian Bisa, kai moola mupopitoikene doiyaku.” TEMENENO timbiliyo, “Oode, Saul naikon lubat.” Maka Daud sadaiyo koidan, “Oilakai kokota Kehila tumbuno naikon salakanggene yaku tukon kusuludadu doi Saul?” Maka ko TEMENENO timbiliyo, “Oode.”

¹³Maka Daud tukon uga-ugaat 600 komian konasuludadu, mosobit tinggale ko Kehila tukon lausala luwedoi meeng kotampat doi tampat bailon. Salataa Saul lengele baikon Daud motauso luwedoi Kehila, yana akiyenggenemo konatetel molobosian.

¹⁴Salataa lapa doiya Daud dungolo doi bunggo leengo doi Zif padango lalomo moluas. Saul sidutu lelenggene yana bai ko TEMENENO aki nasalakanggene doi tomundodoo.

¹⁵Maukai nabunodoiya Daud matakut koidan, sabab Saul natetel sio naakateo. Daano kotempo meeng Daud daano doi Hores, doi Zif padango lalomo moluas.

¹⁶Yonatan taus pososuunggene idoo sulano nakobukuanggene konamanganggaan baikon yana naikon Mian Bisa lindungiyo.

¹⁷Yonatan bantile doi yana, “Inai momatakut, ikoo aki naikon muotuwong doi tamanggu limano. Kotamanggu bisa toiyo baikon ikoomo naikon komo teali tomundo doi Israel tukon baikon yaku naikon malaat kadudukan teali mubawahan.”

¹⁸ Doibundu Daud tukon Yonatan kubaiyo kopaladandian posobatan doi TEMENENO salaano. Salataa lapa doiya Yonatan mule doi nabonua, bai Daud tataap dungol doi Hores.

¹⁹ Doibundu bubula komian moluwedoi Zif mangadap doi Saul doi Gibea tukon bantile, “Daud sapit doimai lipu doi leleeng lalomo loolani ko Hores, doi Hakhila bunggulo bunggono taalikon lalom ko Yehuda padango moluas.

²⁰Ikami toiyo, baikon Tuan yase tuuno molakoyo yana; tobikon doiya, lubato domai lipu. Ikami paladandikene baikon Tuan tantu moola sosinggot molakoyo.”

²¹Saul timbiliyo, “Boliisi TEMENENO nabalakaatio komuyu sabab mokubai kokubai momonondok doi yaku!

²²Tauso tukon tantukanggene koidan; palesayo tukon tutuuno inaando Daud nadaanoan tukon indee komo lapamo kitayo yana indaa, yaku lengele baikon yana pandoi.

²³Jadi palesayokai namonondok doleleengoo mobiasamo teali nasapitan, tukon abali doisumai sulano popelenggene doiyaku. Maka yaku naikon taus polaing-laing tukon komuyu, tukon kalu yana daano doi lipudoo, tantu naikon yaku umboliyo, maukai nasio kudombalaa doisumai posaapon ko Yehuda!”

²⁴Maka lenggeto domian-mianoo abali doi Zif matailukio Saul. Doi tempodoo Daud tukon nasuludadu daano doi Maon padango lalomo moluas, doi pepelako mokiis doi Yehuda padango lalomo moluas taalikon lalom.

²⁵Saul tukon nasuludadu lubat moumboliyo Daud, bai komian popitoikene dolanggedoo doi Daud, tobikon doiya yana taus doi bunggul batu doi Maon padango lalomo moluas tukon dungol idoo. Lapa Saul toiyo dolanggedoo, yana mosobit lelenggene Daud.

²⁶Saul tukon nasuludadu ampakon doi bunggul bibilo naimbaa sembeleng bai Daud tukon nasuludadu imbali bibilo sembeleng. Daud mosoisobit loloskanggene kobutongo luwedoi Saul motambuuno tikume sulano nalokoyo yanila.

²⁷Bai sosinggot lubato komeeng komian mobinotokon mangadap doi Saul tukon bantile, “Tuan siokai namosobit abali! Ko Filistin miano lobosiomo kondalipu!”

²⁸Maka Saul atadeo kona lolongganano Daud, tukon taus tuuk polobosi molawane ko Filistin miano. Doiyamo kosababpo dotampatoo sinombuikon Bunggul Poalaasan.