Read Banggai 1 SAMUEL 25 Bible Online

1 SAMUEL 25 - Banggai bible

1 SAMUEL 25

¹Aki namalumbit doibundu Samuel matemo. Sasaibino ko Israel miano pototongimo sulano namalaing bakolobokiyan susaan. Doibundu yana kinibul doi nabonua doi Rama. Salataa lapa doiya Daud taus doi Paran padango moluas.

²Doi kota Maon daano komeeng komalane moluwedoi Kaleb pulino, kosambuno Nabal. Yana daano konabuta bapialaan iyayon loolani kokota Karmel. Yana kaasa tuuno tukon motooli 3000 kodomba tukon 1.000 kombembe. Abigail Nabal naboloki, pandoi tukon tambongan, bai Nabal konatabiat kasal tukon konakalakuan lokis. Doi meeng kooloyo Nabal daano mongguntinge konadomba bullono doi Karmel

⁴Salataa Daud daano doi padang lalomo moluas, lengele dolanggedoo,

⁵yana mosumbolii songulo kotabo motaus doi Karmel,

⁶posuunggene Nabal tuuk mopelenggene Daud nasalam doi yana. Yana sumboliyo yanila mobantile buno naiya doi Nabal, “Salam doi namonondokan doikoo tukon mukaluargaa tukon sasaibino komulangge.

⁷Yaku lengele baikon ikoo daanoon moguntinge komu domba bullono. Ikoo toiyomokai baikon komu pototooli-pototooli iyayon modaano doi mailipu, aki maibiasa nggabute, tukon koidan akiyoon nabiasa lapus konapoo langge doi napoodaanoan doi Karmel.

⁸Sobakai masadaikene doi yanila, tutuu yanila naikon bisakene dolanggedoo. Tobikon doiya, kumoinikene dakusuludadu natinalima tukon monondok doi mubonua, sabab kami lubat doi oloyo babasal nia. Beekenemo koidan doi muata-ata nia tukon doiyaku, Daud, kotulamu momonondok, oila tolong komo bineekon.”

⁹Salataa polong doi Karmel Daud nasuludadu pelenggenemo dotetebadoo doi Nabal mangatas Daud sambuno, maka yanila totiili.

¹⁰Bai Nabal timbiliyo, “Daud? Yana indee? Indee doiya Isai napau? Akiyoon kubiasa molongol kaliangano yana! Doibubundu nia badaang koata modampas luwedoi natuan doi tano nia!

¹¹Nando konamoolaan yaku mangala roti tukon paisu kuininum, tukon sail molapamo kusadaiayo doi sasaibino dakutologunting, maka kubeekene sasaibino doiya doi mian moaki natontong konaluwean!”

¹²Maka Daud nasuludadudoo abali doi Daud tukon popitoikene doi yana doi Nabal nabantilan-bantilanoo.

¹³“Takesene komusabel doi oakomu suwe-suwele!” Daud naparentah. Mosobit konasuludadu anggayomo doparentahdoo. Daud koidan boboikene konasabel doi oako maka lenggeto tukon uga-ugaat 400 komian, bai 200 komian dungol sulano nadagaiyo kolangge-langge.

¹⁴Daanoon mobuno doiya Abigail Nabal naboloki, lapamo pinopitoikon luwedoi meeng komian Nabal napeleleani, bunonia, “Kai lapamo nyonya lengele? Daud mosumboli bubula kona bito-bito luwedoi padang lalomo sulano mebee salam doi ndatuan, bai tuan totosio yanila.

¹⁵Banggokai yanila mondok tuuno doi kami, aki nabiasa nggabutami tukon koidan akiyon nabiasa lapus komai oila salataa kami polaing tukon yanila doi padang lalomo.

¹⁶Oloyo popook yanila lindungi kami doi nadaanoan madagaian mbembe domba mololani doi yanila.

¹⁷Tobikon doiya, popikikenekai langge nia, tukon potusemo oila komo moola Nyonya kubaiyo. Sabab tontongo naikon lubat ko pabalaso motuuk doi donda tuanoo sasaibino kona kaluarga. Donda tuanoo motikas konoano tobikon doi tuanoo aki ndamoola pobasilingoni!”

¹⁸Maka mosobit Abigail mangala lua kosakato koroti, tukon lua kopolukan kulit koantoko moonoh anggur paisuno, lima kodomba tinapa, sungulo pitu kokilo gandum mosininanga, sakat koanggur sauno momotuul mopinokotikon tukon lua kosakato koara kukiso. Saibino doiya inalakit doi nakaladai-kaladai bunggono.

¹⁹Maka bantilo yana doi napeleleani-peleleani, “Komuyu ampakono matailukon; maka kutuundu komuyu.” Bai yana aki namabatil oi-oila doi nalakai.

²⁰Abigail lokitio kona kaladai, tukon salataa yana polong doi meeng koliasan doi bunggul bibilo popaason Daud tukon nasuludadu modaanon motokolu pakituuwo doi salaano.

²¹Doi tempo doo Daud daano mopikikene, “Palasumakai yaku mobadagai mian koona doo doi padang lalomo! Mau nasoisik akiyo komo lapus luwe doi koona; tukon diabudodoo Yana balasemo daku monondokkan tukon kulokisan!

²²Boliisi Mian Bisa naakateo Yaku kalukai aki kuakateyo sasaibino komala-malane modano indaa doi akiyonan kooloyo matano nasumbut!”

²³Salataa Abigail kitayo Daud, yana mosobit obulus luwe doi nakaladai maka sosuba doi Daud aino

²⁴maka bantile doi yana, “Dakutuan, yasekai mondongoli! Batadikenemo ata susungo motanggunge kasalahano!

²⁵Inaimokai daku Tuan napikikene Nabal, domianoo moakiyo konatotuuk! Yana mian molongas - pokakana tukon sambuno alatino. Ata aki nakitayo dobito-bitodoo daku Tuan nasinumboliidoo.

²⁶Ko Mian Bisa lapamo pantane daku Tuan motuntute kopabalaso tukon mangakate Tuan namusuh-musuh. Tukon diabudoo daku Tuan, tukon tolongo TEMENENO motubo, ata batotopi, boliisi sasaibino daku Tuan namusuh nanasib tukon sasamba komian moiyase silakaiyo daku Tuan konanasib pokakana buno Nabal nanasib.

²⁷Talimayomokai nabungkusannia ata mobabayo tuuk doi Tuan, tukon Tuan nasuludadu.

²⁸Maafkanggenekai ata nakalalaian. Ko TEMENENO tantu naikon tealikene daku Tuan tomundo doi Israel tukon ku Tuan nakatulunan, sabab daku Tuan polobosi tuuk TEMENENO; tukon daku Tuan pomatekon aki naikon namakabai lokis.

²⁹Kalukai andeno meeng komian lobosio daku Tuan tukon sobayo moakateo daku Tuan, maka daku Tuan tantu TEMENENO Mian Bisa lindungiyo buno buat tumbuno modagaiyo. Bai daku Tuan namusuh naikon TEMENENO sakukene dodoon, pokakana kona sinakukonan kobatu doi dimbaalot.

³⁰Ko TEMENENO naikon lakukanggene sasaibino komo monondok modinondiikon doikoo Tuan, tukon akimo namalumbit koidan daku Tuan tinealikono tomundo doi Israel.

³¹Doi tempodoo daku Tuan naikon neneeke baikon daku Tuan aki namangakate kalu akiyo kosababpo kai adiliyo susuungo tobikon daku Tuan aki napalaluu susah kai manasal. Tukon kalukai ko TEMENENO lapamo balakaatiyo daku Tuan, inai motoliminggene daku Tuan naata nia.”

³²Maka Daud bantile doi yana, “Tanggaalokai ko TEMENENO, Israel na Mian Bisa, mobintekene ikoo doi oloyo nia mopososuung yaku!

³³Tanggaalo komu pandoiyan tukon ngginaalokai ikoo susuumu sabab lapamo taane yaku molakukanggene komangakatean tukon mohakimiyo susuungo.

³⁴Ko TEMENENO lapamo pantanaku mokubaiyo kolokis motuuk doi komuyu. Tolongo TEMENENO, Israel na Mian Bisa motubo, kalu andeno ikoo aki namosobit pososuung yaku, tantumo sasaibino Nabal nasuludadu naikon matemo doi tempo oloyo matano nasumbotan.”

³⁵Lapadoiya Daud talimayomo oila doi Abigail nabinaba tuuk yana, maka nabantile doi yana, “Mulemokai doi mubonua tukon inai mo molili. Yaku daanokenemo.”

³⁶Salataa Abigail abali doi Nabal, tokita daano kolamean babasal doi nabonua, buno tomundo nalamean. Tukon sabab Nabal malangu tukon laba-laba, konaboloki aki namobontiikon oioila doi yana polong modoakon kooloyono.

³⁷Salataa dodoa Nabal akimo namalangu, konaboloki bontiikene doi yana sasaibino dokulokisanoo kaliangano. Maka Nabal kanakon doi pupulosono tukon posaapon kobutongo teali lemat.

³⁸Uga-ugaat songulo kooloyo doibundu Nabal kanakon panakit koidan doi pupulosono luwedoi TEMENENO tobikon doiya yana matemo.

³⁹Salataa Daud lengele baikon Nabal momatemo, yana bantile, “Tanggaalo ko TEMENENO! Yaku lapamo balese kototulai Nabal molakukanggene doiyaku tukon lapamo pantane kona ata nia molakukanggene kokulokisan. Ko TEMENENO lapamo hukume Nabal sabab nakulokisan.” Doibundu Daud makapatu bito-bito doi Abigail tuuk masadai teali naboloki.

⁴⁰Maka polongo kai Daud nabito-bito doi boinedoo doi Karmel tukon bantile doi yana, “Ikami inutus luwedoi Daud momangadap doi Nyonya, sabab yana yase mosadaiyo Nyonya teali naboloki.”

⁴¹Abigail luwe tukon somba maka bantile, “Yaku nia Daud naata, yaku balasadia mokumesio sasaibino daku ata aino.”

⁴²Doibundu yana tukon mosobit basa-basadiamo. Yana lakit doi nakeledai bunggono tukon lima kopeleleani boine komo lolainge, maka yana luwemo moloolainge Daud nabito-bito, maka yana tealimo Daud naboloki.

⁴³Akiyoon nalapa doiya Daud lapamo pokila tukon Ahinoam moluwe doi Yizreel, tukon budodoiya Abigail tealimo naboloki koidan.

⁴⁴Daanoon mobuno doiya Saul osowaanggenemo Mikhal donaboinedoo, doiyamo Daud naboloki, tukon Palti Lais napau mo luwedoi kota Galim.