Read Banggai 1 SAMUEL 26 Bible Online

1 SAMUEL 26 - Banggai bible

1 SAMUEL 26

¹ Daano kooloyo meeng komian-mian moluwedoi Zif lubat doi Saul doi Gibea tukon popitoikene doi yana baikon Daud daanoon mosapit doi Hakhila bunggulo doi Yehuda padango boneno bibilo.

²Maka tukon mosobit Saul luwe tolu koloon kosuludadu momonondok doi Israel komo lolainge, mopakatuuwo ko Zif padango moluas sulano naunggoliiyo Daud.

³Saul basandung doi loloon bibilo sulano naloolani ko Hakhila Bunggulodoo. Daud danoon doi padang lalomo moluas, lengele baikon Saul motuunduwo polong doi padang lalomo moluas.

⁴Maka yanakai mobintokon namata-mata, tukon yana toiyomo tukon tutuu baikon Saul daanomo idoo.

⁵Tukon mosobit taus doi Saul nabasandungan tukon idoomo kosandungo konalaatano Saul namooloan lolani Abner Ner napau. Saul nasandungoo daano doi tanga-tanga, konasuludadu daanon mobasandung potikunggon.

⁶Doibundu Daud masadai doi Ahimelekh Het mianodoo, tukon doi Abisai Yoab utuso (kotinanoila doiyamo Zeruyah), “Indee komo barani usok polaing yaku doi Saul nasandung lalomo?” Abisai timbiliyo, “Yaku!”

⁷Maka doi popokoo Daud tukon Abisai mbaleng-mbalengo doi basandunganoo lalomo tukon kitayo Saul modaano momoolo doi basandungan tanga-tangano, konapandong tobusanggon doi buta loolani kooluno. Abner tukon nasuludadu daano momoolo potikunggon Saul.

⁸Maka Abisai bantile doi Daud, “Ko Mian Bisa lapamo salakanggene komumusuh doikoo doi popookia. Pataikanakumokai kubusanggene konapandong doi butongo susuungo sulano natadul polong doi buta, kuakateyo yana tukon idan kutebeke, mau naaki nalua luunggon!”

⁹Bai Daud bantile, “Inai mobula-bulaandekene yana! Ko TEMENENO tantu hukume komian momokubai lokis doi natomundo pinilih.

¹⁰Tolongo TEMENENO motubo, yaku toiyo baikon sio naikon TEMENENO susuungo komo akateo Saul, kalu laatemo konamatean, bai kalu yana mate doi polobosian lalomo.

¹¹Boliisi ko TEMENENO napantanaku moakateo kona tomundo pinilih! Alayomokai konapandong tukon konamangabosan paisu, maka nda taus!”

¹²Maka Daud alayo dopandongoo tukon doi Saul namangabosan paisu motangabos taalikon doi Saul oluno sembeleng, lapadoiya maka yanila tauso. Akiyokai komeeng komian mokitayo dolanggedoo kai motoiyo oila komo lapamo teali, kai komo tabangun, sabab ko TEMENENO kubaiyo yanila sasaibino moola tukon tomboosokon.

¹³Maka Daud pintosiiyo kopepelakon bibilo bailonggon polong doi bunggul bunggono, tobikon yana mododoono luwedoi Saul nabasandungan.

¹⁴Doibundu Daud wookonio doi Abner tukon Saul nasuludadu konabantilano, “Abner kai ikoo lengele koalalonggu?” Abner timbane koidan, “Indeekai komiano ikoo mowowowookonoo?”

¹⁵Daud timbiliyo, “Abner, bolikonkai ikoo mian mohebat tuuno doi Israel? Bulaando moaki mudagaiyo komutuan, tomundo? Daanokai komian mosodo usokiyo komubasandungan sulano naakateo komutuan.

¹⁶Ikoo aki mosanggup moampakonggene komulimang, Abner! Tolongo TEMENENO motubo, komuyu sasaibino sio pomate, sabab aki podagaiyo kopo tuan, kotomundo TEMENENO mopiliyomo. Sobakitayo! Nandomokai doi tomundo napandong? Inaandomokai dobangabosanoo paisu modaano budodoo taalikon doi oluno sembeleng!”

¹⁷Saul tingoniiyo Daud alalo tukon masadai, “Kai ikoo Daud, kupau?” Daud timbiliyo, “Oode Tuan.”

¹⁸Maka nabantile koidan, “Bulaando Tuan modaano koidan molelenggene ata? oilakai ata nasalah?

¹⁹Tuan, ndongoliiyokai ata nasombaan nia. Kalukai andeno ko TEMENENO komo sumboliiyo Tuan sulano nalawane ata, meeng kososuba mosinosubakon naikon moola naatadeo Konanggimalan motuuk doi ata. Bai kalu andeno banggkapi komo sumboliiyo doi Tuanoo, boliisi ko TEMENENO nakutuke yanila! Sabab koakibato luwedoi napo kokubaidoo, tealikene ata siniika luwedoi TEMENENO natano, tukon tapakisaa sio potaus doi tano bailonggon inaando komo moola ata bakaleda, doi ila-ila bailonggon.

²⁰Inaikai mobatadikene ata namate doi mian nalipu bailon naodoon luwedoi TEMENENO. Oila kotakoso ikoo kotomundo Israel molubat moakateo ata nia motongo buno meeng kokitu tolong? Oila kotakoso yana moasuwo ata nia buno mian momangasu manuk lobo?”

²¹Maka Saul timbiliyo, “Yaku makabaimo salah. Abalimokai Daud, ikoo dakupau! Yaku akimo naikon kumakabai lokis koidan doi komuyu sabab ikoo otuboiyakumo kolubongidoo. Longas tuuno dakukalakuan. Yaku tutuu bingungo!”

²²Bai Daud timbiliyo, “Naiyamo tomundo napandong, mosumboliimo meeng tomundo nasuludadu nalubat doisumai sulano naalayo.

²³Ko TEMENENO naikon balakaatio sasamba komian mosetia tukon momoloyos konoano. Sabab maukai doi oloyo nia ko TEMENENO salakanggene daku Tuan doi ata, bai ata aki naiyase makabai lokis motuuk doi Tuan, TEMENENO natomundo pinilih.

²⁴Jadi, buno Tuan ata molapamo otuboiyo doi oloyo nia, bunomo koidan boliisi ko TEMENENO nalindungiyo ata tukon tongosodii luwedoi sasaibino kobahaya!”

²⁵Maka Saul bantile doi Daud, “Ko TEMENENO nabalakaatikon, ikoo dakupau! Ikoo naikon malaat hasil doi sasaibino komulimang lalomo!” Maka Daud banggadudukene konaampakonan, tukon Saul mulemo doi nabonua.