Read Banggai 1 SAMUEL 27 Bible Online

1 SAMUEL 27 - Banggai bible

1 SAMUEL 27

¹Daud pikikene doi noano lalomo, “Mau nabulaandokai koidan doi oloyo meeng Saul naikon akateaku. Jadi, akiyono kololoon bailonggon koidan doiyaku, alaasene kudampasene kobutonggu luwedoi tano Filistin. Salataa buno doiya Saul akimo naikon naunggoliiyaku koidan doi Israel, tukon yakukai naikon amano.”

²Maka Daud tukon nom kosakato kosuludadu basenggetikon taus doi Akhis Moab napau, kota Gat tomundono.

³Maka yana tataapo mopodungoli konasuludadu doi Gat, suwe-suwele tukon napoo kaluarga. Daud tobiyo konaboloki lua, doiyamo Ahinoam boine moluwe doi Yizreel, tukon Abigail Nabal baluno boine doi Karmel.

⁴Salataa Saul lengele baikon Daud dampasenemo kobutongo doi Gat yana akimo koidan nakakaate molakeo.

⁵Maka Daud usule doi Akhis, “Kalu Tuan lasayo sanaang tukon ata, beenamo doi ata meeng kokota mopoipoisik doi lipuno teali nalipu dungolan, tobikon Tuan naata nia aki napodungoli doi Tuan doi kota nia.”

⁶Maka Akhis beekene kokota Ziklag doi Daud, tukon doiyamo kosababpo ko Ziklag tealimo tomundo-tomundo koona polong diabudodoo.

⁷Daud dungol doi tano Filistin meeng katun sangkap kobituwon konakalumbit.

⁸Doi namalumbitanoo doiya Daud tukon nasuludadu tetembokon lobosio ko Gesur, miano Girzi miano, tukon Amalek miano; dobangsa-bangsadoo malumbito kona dungolan doi lipudoo. Yana lubotiio tukon lobosio dotanodoo konaodoonan potimbang ko Sur, tukon banggadudul doi Mesir.

⁹Yana akateo sasaibino komala-malane tukon moluko tukon lambase konapoo domba, saapi, keledai, unta, tukon konapoo pakean koidan. Doibundu yana abali tukon mangadap doi Akhis.

¹⁰Kalu Akhis masadai doi yana, “Inaando kopoo molobosian dia budodoo nia?” Maka Daud bantile doi yana baikon yana tauso doi Yehuda taalikon lalom kai doi Yerahmeel miano nalipu kai doi Keni miano nalipu dungolan.

¹¹Akiyokai komeeng komian doi lipu-lipudoo nalinobosinoo yana mobatadikene tubo, sulano naakiyo komian luwedoi lipu-lipudoo momoola taus doi Gat sulano napopitoikene oila konatotuuk Daud tukon nasuludadu nakinubai. Bunomokai doiya Daud natindakan doi nadaanoan modungol doi tano Filistin.

¹²Bai Akhis anggayo Daud tukon pikikene doi noano lalomo, “Yana minosikiton tuuno luwedoi nabangsa susuungo, tobikon yana tapakisaa teali kuata pomatekon.”