Read Banggai 1 SAMUEL 28 Bible Online

1 SAMUEL 28 - Banggai bible

1 SAMUEL 28

¹Bubula kotempo doibundu ko Filistin miano atule kona suludadu tuuk lobosio ko Israel, tukon akhis bantile doi Daud, “Tantu ikoo mangalati baikon doi tempo polobosian ikoo tukon komu suludadu sio naala doiyaku.”

²Daud timbiliyo, “Tantumokai, Tuan naikon kitayo susuungo oila komo moola ata lakukanggene.” Maka Akhis bantile, “Monondok! Ikoo yaku odudukon teali kupadagai motataap.”

³ Salataa Samuel matemo tukon sasaibino ko Israel miano kokiiliyo yana doi tempo nakinibulan doi Rama, nakota susuungo. Bubula kotempo motoliiso Saul siikayomo luwedoi Israel sasaibino kopatanggal tukon tolosupa mouange koroh-roh molokis.

⁴Maka salataa ko Filistin nasuludadu pototongi tukon basandung loolani kokota Sunem, Saulkai pototongikene ko Israel miano, tukon yanila basandung doi Gilboa bunggulo.

⁵Salataa Saul kitayo do Filistinoo nasuludadu, yana matakuto tuuno.

⁶ Maka yana makabi potudoikon doi TEMENENO bai ko TEMENENO aki natimbiliyo, mau doi monii lalomo maukai tukon doi napinakean ko Urim tukon Tumim maukai nalolo doi sasaibino konabi.

⁷Tobikon doiya Saul bantile doi sasaibino konapagawe, “Pomoumboliikai meeng kotolosupa boine ponguang roh-roh, yaku naikon taus doi yana tuuk mangkabi potudoikon.” Yanila timbiliyo, “Doi En-Dor daano kotolosupa boine bunodoiya.”

⁸Maka Saul bapialung buno mian biasa sulano komian naaki natingoniiyo. Tukon lua komalane mololainge, tukon yana lenggeto tukon yana polongo doi tolosupadoo nabonua doi tempo popook. Maka Saul bantile, “Uangemo domianoo uliko yaku naikon mobantile kosambuno, tukon kabiyomokai sulano natanggale oilamo naikon komo teali.”

⁹Boinedoo timbiliyo, “Tantu Tuan kai toiyo baikon Tomundo Saul lapamo siikayo luwedoi Israel sasaibino kopatanggal tukon tolosupa mouange koulik. Bulaando Tuan mosobaaku sulano kusilaka tukon kuinakate?”

¹⁰Maka Saul batotopi konabantilano, “Tolongo TEMENENO motubo, yaku paladandi baikon ikoo aki naikon muinukum sabab lakukanggene nalangge nia.”

¹¹Boinedoo masadai, “Indeekai uliko daku inuangoo tuuk doi Tuan?” Saul timbiliyo, “Samuel uliko.”

¹²Salataa boinedoo kitayo Samuel, yana wookon tukon bantile doi Saul, “Bulaando Tuan moakakene ata? Ikoo daku Tuan inai-inaikenekai Tomundo Saul!”

¹³Tomundo timbiliyo, “Inai momatakut! Bantilemokai oila komu kinita!” Boinedoo timbiliyo, “Ata kitayo koroh mosumbot luwedoi dunia.”

¹⁴Saul masadai, “Bulaando kotambongo?” Yana timbiliyo, “Meeng komalane momotuamo. Yana sumbot tukon mapake jubah.” Maka Saul toiyomo baikon doiya Samuel, tukon yana somba moodotiiyo.

¹⁵Salataa lapa doiya Samuel bantile doi Saul, “Bulaando ikoo monggabutaku? Bulaando ikoo mouangaku abali?” Saul timbiliyo, “Yaku bingung tuuno sabab ko Filistin miano lobosiakumo, bai ko Mian Bisa otinggalakumo. Tukon koidan akimo natimbiliyaku, maunalolo doi sasaibino konabi, maukai natukon lolo doi olumon. Tobikon doiya kukabiyo doi Tama, nabontiikanaku oila daku linakukon.”

¹⁶Maka Samuel bantile, “Oila kotakoso ikoo mouange yaku sabeakai ko TEMENENO lapamo otinggalon tukon teali mumusuh?

¹⁷ Ko TEMENENO lapamo lakukanggene doi komuyu buno molapamo bontiikene lolo doi yaku. Ko TEMENENO alayomo ko Israel luwedoikoo tukon beekene doi Daud.

¹⁸ Ikoo lapamo lawane ko TEMENENO naparentah tukon akimo muyase molopuwo kabus ko Amalek miano tukon sasaibino konapoo langge. Doiyamo kosababpo diabudodoo ikoo TEMENENO bunokonggon nia.

¹⁹Ikoo tukon ko Israel miano naikon sinalakanggon doi Filistin miano. Namodoa ikoo tukon mumala-malane naikon pototongi tukon yaku; tukon koidan sasaibino ko Israel miano nasuludadu naikon TEMENENO salakanggene doi Filistin miano.”

²⁰Doi tempodoo koidan, Saul tolubang tekeleos doi buta buno selese molupayo, sabab yana ngginggim tuuno mondongoliiyo Samuel nabantilan-bantilanoo. Koidankai yana miuko tuuno, sabab aki namakaan oioila meeng kooloyo meeng kopopook.

²¹Dotolosupadoo koolaniyo Saul tukon kitayo baikon yana bingungo tuuno; tobikon doiya boinedoo bantile doi yana, “Ikoo daku Tuan, ata kakaatemo sulano kulakukene oila komo lapamo Tuan kabiyo.

²²Jadi, ikoo daku Tuan siokai mudaanokene ata nakakabi; makaano soisik kokinaan naikon ata mosidakemo sulano Tuan namoola banggadudukene Tuan naampakonan.”

²³Saul tolake tukon bantile baikon yana aki naiyase kaan. Bai salataa konapagawe-pagawe desaake koidan, yana tulutiyomo. Yana kokondong luwedoi buta tukon osulang doi dego-dego.

²⁴Tukon boinedoo basenggetikono mokelete konasaapi pauno momalanak tukon mangala tarigu tukon pokobuikene, maka nakubaiyo teali roti moakiyo ragino.

²⁵Salataa lapa kubaiyo doiya kinaanoo sinidokiikono doi Saul tukon kona pagawe-pagawe maka yanila kaano. Doibundu yanilakai tauso doipopookoo koidan.