Read Banggai 1 SAMUEL 29 Bible Online

1 SAMUEL 29 - Banggai bible

1 SAMUEL 29

¹Ko Filistin miano pototongikene sasaibino konasuludadu doi Afek, bai ko Israel miano basandung lolani ko paisu matano doi Yizreel Pepelako.

²Lima kotomundo Filistin maju babaris tukon pomeenggonan-pomeenggonan mosusuele tongobos-obos daano komo sakat tukon daano komo sololoon komian; Daud tukon nasuludadu babaris doibundu polaing-laing tukon Tomundo Akhis.

³Sasaibino ko Filistin miano nasuludadu talengano kitayo yanila maka masadaikene, “Do Ibranidoo miano mo badaang tuuk oila dimbaa?” Akhis timbiliyo, “Naiya Daud, Tomundo Saul napagawe looluk luwedoi Israel. Yana adukono malumbit konadungolan doiyaku. Salataa nalubatan doiyaku polong oloyo nia, akiyoon kulaate yana modaano konasalah.”

⁴Bai sasaibino do Filistin talengadoo nggimoliiyo doi Akhis tukon bantile doi yana, “Sumboliiyo domianoo namule doikota molapamo ikoo beekene doi yana. Yana aki namoola polobosi polaing-laing tukon kita; inai-inaikene naikon nakulokisanggene kita, doi polobosian tanga-tangano. Bolikonkai naiyamo kotodanan momonondok tuuno doi yana sulano namangala noa doi natomundo tukon loloon moakateo kondasuludadu?

⁵ Yanakai Daud? Tuuk yanamokai sasaibino koboine looluk osu-osuleng tukon manani bunonaiya, ‘Saul lapamo mangakate doi loloono komusuh, bai Daud doi nasou-songuloan koloono.’ ”

⁶Maka Akhis uange Daud tukon bantile doi yana, “Yaku mangangga tongo TEMENENO motubo, baikon ikoo setia doiyaku. Yaku sanaang kalu ikoo moola loolaingaku doi polobosian lalomo nia. Sabab salataa komu lubatan doiyaku polong diabudoo nia, aki kulaate komukasalahan. Bai kotomundo-tomundo mobailongoo aki naiyase doikoo.

⁷Tobikon doiya mulemo tukon salamat, tukon inaimo momokubai lobo mo lubatene konapoo nggimalan.”

⁸Daud timbiliyo, “Oila kosalano molapamo ata kubaiyo, Tuan? Kalu buno Tuan nabantilano, Tuan aki nalaate oila ata nakasalahannoo luwe ata natambuunan moleleaniyo Tomundo polong diabudodoo nia, bulaando ata moaki napinataikon polobosi molawane Tuan namusuh?”

⁹Akhis timbiliyo, “Ikoo toiyo baikon yaku anggene ikoo setia buno Mian Bisa namalaekat. Bai sasaibino dotalengadoo lapamo putuse baikon ikoo aki namoola malaing polobosi polaing-laing tukon kami.

¹⁰Tobikon doiya Daud, namodowa komuyu sasaibino molapamo tinggale Saul tukon lubat doiyaku, siopo bangun dodowa tukon pobasenggetikon lengget salataa sumboto kooloyo matano.”

¹¹Tobikon doiya modoakon dodoa, Daud luwemo tukon nasuludadu mule doi tano Filistin, bai ko Filistin nasuludadu luwe taus doi Yizreel.