Read Banggai 1 SAMUEL 30 Bible Online

1 SAMUEL 30 - Banggai bible

1 SAMUEL 30

¹ Lua kooloyo doibundu, Daud tukon nasuludadu abali doi kota Ziklag. Salataa polong indaa, yanila laate baikon ko Amalek miano lapamo lobosio kotano Yehuda taalikon lalom tukon lobosio ko Ziklag. Yanila aki namangakate mau meeng komian. Bai yanila suayo kabus dokotadoo tukon banggadudukene konapoo ampakonan tukon babayo polaing sasaibino koboine, pau-pau tukon tumbuno bailon. Yanila koidan lapamo lakoyo Daud nakaluargaa tukon nasuludadu nakaluargaa, tongusokon Daud naboloki lua, Ahinoam tukon Abigail. Daud tukon nasuludadu susah tuuno, tobikon doiya yanila tambuunemo konakokiilan aki natade-tade polong pomuyukon kobukuno.

⁶Daud nasuludadu susahmo tuuno sabab konapoo pau tukon konapoo boloki akiyono. Tobikon doiya yanila iyasemo mosakule Daud tukon batu. Jadi Daud daano doi susaan lalomo mobabasal, bai ko TEMENENO Mian Bisa kabukuanggene konoano koidan.

⁷ Maka Daud bantile doi Imam Abyatar Ahimelekh napau, “Babayomo doisumai do Efodtoo!” Maka Abyatar babayo do Efodtoo doi yana.

⁸Doibundu Daud masadai doi TEMENENO, “Kai sio kulelenggene dogorombolanoo momolobosi? Kai moola ktuuduwo yanila?” Ko TEMENENO timbiliyo, “Oode, lelenggenemokai; ikoo naikon tunduwe yanila tukon sodiiyo sasaibino komo tinawan.”

⁹Maka Daud ampakono polaing-laing tukon konoom kosakato kosuludadu. Salataa yanila polong doi Besor Paisunobatango, Daud banggadudukene kona ampakonan polaing-laing tukon 400 komian; bai ko 200 komian bailonggon dungol idoo. Sabab todudulo pakadak tukon akimo namoola pintosiiyo ko Besor Paisunobatango.

¹¹Doi ampakonanoo lalomo Daud nasuludadu pososuung tukon meeng komala-malane doi padang lalomo Mesir miano, maka nabinaba doi Daud. Yana binee kaan tukon monginum,

¹²koidan ara saono kukiso, tukon lua koanggur pokooti motuul. Sambuno yana kaane, abalimo konabukuanan koidan; tokita tolumo kooloyo yana akimo nakaan tukon aki namonginum!

¹³Doibundu Daud masadai doi yana, “Indee komutuan, tukon doiyaa komu luwean?” Dopaudoo timbiliyo, “Yaku Mesir miano meeng ko Amalek miano naata. Dakutuan otinggalaku toludoo kooloyo molapa sabab yaku masakit.

¹⁴Ikami lobosiyomo ko Kreti miano nalipu tambikon lalom doi Yehuda tukon Kaleb pulino nalipu, tukon ikami suayomo kabus kokota Ziklag.”

¹⁵Maka Daud sadaiyo doi yana, “Ikoo yase antokanaku doi gorombolanoo nalipu dungolan?” Yana timbiliyo, “Yaku yase, kalu Tuan paladandi doiyaku tolongo Mian Bisa sambuno baikon Tuan aki naakateaku kai Tuan salakangganaku doi kutuan.”

¹⁶Maka yana antekene yanila doi gorombolannoo nadungolan. Doi tempodoo dogorombolannoo poala-alaas posaapon dotampatoo, maka yanila kaan tukon balamean babasal sabab badaang kobarang molinambas yanila mobabayomo luwedoi tano Filistin tukon Yehuda.

¹⁷Sodo benggel kotimbu lolanimo komodoa, Daud lobosiomo yanila, tukon dopolobosianoo banggadudul posopokon kooloyo polong popook. Kobailon moluwedoi sangkap kosakatdoo komian momongula modampasene kobutongo tukon molokiti unta, akiyo komeeng komiankai luwedoi musuh momoola lolos.

¹⁸Daud moola olupute koidan sasaibino kolangge Amalek miano molambasemo, talalaing konaboloki lua;

¹⁹akiyo kolobomeeng molapus. Sasaibino pau mala-malane tukon moluko tukon sasaibino kolangge molinambas molapamo Amalek miano alayo, Daud alayo koidan.

²⁰Bai koidan Daud lambase sasaibino kodomba tukon iyayon piniala. Doiyayon-iyayonoo Daud nasuludadu babayomo doi muka, tangalaas luwedoi sasaibino kolangge bailon molinambas tukon yanila bantile, “Naiya tuuk Daud naobos!”

²¹Sambuno lapa doiya Daud abali doi lua kosakato komian motodudulo konapakadakan sulano tuuduwo yana, tukon motininggalo doi Besor Paisunobatango bibilo. Yanila lolobotiyo Daud tukon nasuludadu, tukon Daud koolaniyo tukon beena salam doi yanila.

²²Bai doi antara Daud nasuludadu mopolaing-laing tunduwo yana, daano komolokis tukon momodoko. Yanila bantile, “Komian badaangia aki namalaing; jadi yanila akiyo konahaak momalaat oioila luwedoi langge-langge molinambasoo. Yanila tolongo moola alayo konapoo pau tukon naboloki, maka napoo taus.”

²³Bai Daud timbiliyo, “Utus-utusonggu, inaikai pokubaiyo kokokubai mobunodoiya tukon oila komo lapamo TEMENENO beekene doi kita! Bolikonkai naikita nia komo lapamo yana lindungiyo tukon beena kamanaangan doi gorombolan pondikukoo?

²⁴Jadi akiyokai komeeng komian momoola satujuiyo dousullo! Sasaibino sio namalaat obos mopokakana konakadaang; komian modungol sulano nadagaiyo kololonggu sio namalaat obos mopokakana buno mian momaju polobosi.”

²⁵Doibundu dolanggedoo Daud kubaiyo meeng koparaturan, tukon tinaati doi Israel polong diabudodoo nia.

²⁶Salataa Daud polong doi Ziklag, yana kapatuwo kosoobos moluwedoi lolonggudoo molinambas doi sasaibino kokatua kota-kota Yehuda molapamo dukunge yana, konabantilano, “Naiyamo kopalaseeng motuuk doikoo luwedoi lolonggu kami molambase luwedoi TEMENENO namusuh.”

²⁷Dokota-kotadoo doiyamo; Betel tukon Rama taalikon doi lalom ko Yehuda, Yatir, Aroer, Sifmot, Estemoa, Rakhal, tukon koidan Yerameel miano nakota-kota, Keni miano nakota-kota, Horma, Bor-Asan, Atakh tukon Hebron. Sasaibino kokota doi Daud tukon nasuludadu nabiasaan balausala, yana kopotuiyo dopalaseengoo.