Read Banggai 1 SAMUEL 31 Bible Online

1 SAMUEL 31 - Banggai bible

1 SAMUEL 31

¹Ko Filistin miano daano momolobosi lawane ko Israel miano doi Gibea bunggulo. Badaang ko Israel miano momate idoo, tukon kobailonggon, tongusokon Saul tukon namala-malane dampasene kobutongo.

²Bai ko Filistin miano tuunduwo yanila tukon tolu komian doi antara Saul namala-malane mate inakate; doiyamo Yonathan, Abinadab, tukon Malkisua.

³Dopolobosiannoo hebat tuuno potikunggon Saul, tukon yana susuungo kanakon musuh napanah tobikon yana pokolon babasal.

⁴Maka Saul bantile doi pamuda mo babayo konasinapan, “Bubute komusabel tukon tobokakumo, sulano naaki kominae-maenggon doi mian mo aki natingoniiyo ko TEMENENO naakateaku.” Bai dopamudadoo aki naiyase motebeke, sabab yana odotiiyo tuuno Saul. Tobikon doiya Saul alayo konasabel maka lubanggene kobutongo doi sabeloo mangano.

⁵Salataa dopamudadoo kitayo baikon Saul momatemo, yana koidan lubabanggene kobutongo doi sabeloo matano maka namate doi Saul bibilo.

⁶Bunomokai doiya Saul polaing konamalane tolu, tukon sasaibino konasuludadu tukon dopamudadoo mate doi meeng kooloyodoo.

⁷Salataa ko Israel miano mo dungol doi Yizreel peako sembeleng tukon doi Yordan Paisunobatango tambikon tolopot lengele baikon ko Israel nasuludadu dambasenemo kobutongo, tukon baikon Saul tukon namala-malane momatemo, yanila dampas tinggalemo konapoo kota-kota. Doibundu ko Filistin miano dungoliyomo dokota-kotadoo.

⁸Modoakon salataa Filistin miano lubat sulano napoo ndikuke kobajan-bajano, yanila pososuunggene Saul tukon tolu konamalane momatemo doi Gibea bunggulo.

⁹Yanila patele Saul oluno tukon alayo konakalambi polobosian, maka Filistin miano utuse konautusan doi posaapon kotano Filistin sulano napelenggene dobilita monondokoo doi rayat tukon doi napoo ilah.

¹⁰Doibundu Saul nakalambi polobosianoo inabos doi bonua molious ilah Asytoret, tukon kobutongo pinakukondoi kota Bet-Sean betoono.

¹¹Bai ko Yebesh tumbuno doi Gilead lengele oila komo lapamo Filistin miano lakukene doi Saul,

¹²maka komian badaang mobarani tuuno ampakon luwe idoo tukon ampakon pobanggamodoakon doi Bet-Sean. Yanila obulusene Saul bajano tukon namala-malane bajano luwedoi kotadoo betoono maka yanila babayo doi Yabesh, tukon yanila suayo.

¹³Sasaibino kobuku-bukuno pinototongikon tukon kinibul doi tamariska batango adeno doi kotadoo, doibundu yanila bangapataimo pitu kooloyo konakalumbit.