Read Banggai 1 SAMUEL 4 Bible Online

1 SAMUEL 4 - Banggai bible

1 SAMUEL 4

¹Doi tempodoo ko Filistin miano bintekene sasaibino kona suludadu sulano nalobosio ko Israel; tobikon doiya ko Israel nasuludadu maju doi polobosian lalomo; yanila basandung loolani ko Eben-Haezer, bai ko Filistin nasuludadu basandung doi Afek.

²Ko Filistin nasuludadu tambuun momolobosi tukon lapa kopolobosian mo hebat, ko Israel nasuludadu kalah tukon uga-ugaate sangkap koloon komian mo mate doi polobosianoo lalomo.

³Salataa suludadu labino mokalah abalimo doi nabasandungan sasaibino ko Israel katuano bantile, “Oila kosababpo ko TEMENENO mosodiikene ko Filistin miano nakalayo kita doi oloyo nia? Maimo nda alayo ko TEMENENO na Peti Perjanjian modano doi Silo, tukon kita babayo doisumai, sulano ko TEMENENO naiyase tulungiyo kita tukon salamatene kita luwedoi musuh.”

⁴ Maka yanila mobinotokon mian doi Silo sulano naalayo ko TEMENENO na Peti Perjanjian doiyamo ko TEMENENO Mo Babasal kona kuasa naosulangan. Eli napau lua, Hofni tukon Pinehas, Polainggene ko Peti Perjanjianoo.

⁵Salataa Peti Perjanjianoo polong doi basandungan kokuweis ko Israel miano tukon olaloila mobabasal, sampe lolondong kobuta.

⁶Ko Filistin mianokai lengele dokokuweisanoo nalalo maka yanila bantile, “Bulaando ko Ibrani miano daangodoo mokokuweis?” Bai salataa yanila toiyo baikon ko TEMENENO na Peti Perjanjian polongo doi Ibrani nabasandungan,

⁷yanila teali matakut, tukon bantile, “Daano koila molubat doi yanila nabasandungan! Silakamo kita! Akiyoon ndatoupiyo idan kolangge mobuno naiya!

⁸Silakamo tuuno! Indeekai komo moola salamatene kita luwedoi ila-iladoo mo bukuan? Bolikonokai ila-iladoo koidan molapamo akateo ko Mesir miano doi padang bone loolukoo?

⁹Baranikene konoamu, eh Filistin miano! Popolobosimo buno mala-malane, kalu aki, ko Ibrani miano naikon tealikene ata komuyu, buno yanila looluk tealiekene komuyu naata. Tobikon doiya polobosiomo tukon pobarani pokokobukuan!”

¹⁰Doibundu polobosimo ko Filistin miano tukon hebat tuuno tukon ko Israel nasuludadu kalah. Ko Israel miano obulen doi nasandung suwe-suwele. Babasal tuuno konapoo kalaanoo: 30.000 ko Israel nasuludadu mo mate.

¹¹Ko Mian Bisa na Peti Perjanjian Israel namusu lambase, tukon Eli napau lua, Hofni tukon Pinehas, mate.

¹²Meeng komian moluwedoi Benyamin nabenseno dampas luwedoi polobosian lalomo taus doi Silo tukon polong idoo doi oloyodoo koidan. Salaku paloosan susaan, lapamo bendi-bendinge konapakean tukon obosiyo buta doi oluno.

¹³Eli, mosusah tuuno mo pikikene ko TEMENENO na Peti Perjanjian nakasalamatan, daano moosulang doi kadela doi loloon bibilo, tukon susah. Salataa domianoo pailukene kobilita Israel mokalomo, sasaibino kokota tumbuno mandaunggene tukon bulungan.

¹⁴Eli lengele domandaunganoo, maka masadaikene, “Oilakai domo pinelekonoo?” Daanoon domianoo budoo obulen dombalaa Eli; salataa polong, yana popitoikene dobilita molokisoo.

¹⁵Eli naumur siokolonomo alu kotaun tukon yana adukono nggalung.

¹⁶Domianoo bantile doi Eli, “Yaku dampas oloyo nia luwedoi polobosian lalomo tukon sodokai kupolong.” Eli masadai doi yana, “Bulaandomo kobilitano, ikoo dakupau?”

¹⁷Mo babayo dobilitadoo timbiliyo, “Ko Israel dampas luwedoi Filistin miano. Kita motoupimo kakalahan mobabasal tuuno. Badaang komian mo mate, koidan Tama napau lua, Hofni tukon Pinehas. Tukon ko Mian Bisa na Peti Perjanjian musuh lambasemo!”

¹⁸Salataa domianoo babilitakene kaliangano Peti Perjanjianoo, Eli tuwong tetelengan luwedoi nakulusii taalikon doi tataaponoo babasal. Yana motuamo tukon malanak tobikon tempo natuwongan moloto kobulungo, tukon yana mate. Yana katuaiyo ko Israel miano sangkapolono kotaun konakalumbit.

¹⁹Doi tempodoo, Eli namonianan doiyamo Pinehas naboloki; daanoon motianan, tukon loolanimo kona tempo mosuungan. Salataa yana lengele baikon ko Mian Bisa na Peti Perjanjian linambaso, tukon baikon kona monianan tukon nalakai matemo, sosinggot yana nemiiyo konapau mangakato, maka aki namalumbit doimbaa yana mosuungo.

²⁰Salataa yana kabimo namate, sasaibino koboine motulungiyo yana bantile, “Kindeke konoamu! Komupau mala-malane!” Baikai yana aki natimbiliyo kai palahatikanggene yanila.

²¹Dopaudoo sinombuikon Ikabot, nabantilano, “Ko Mian Bisa nadaanoan Mo Moliyous lapuso luwedoi Israel.” Komo minakasuud doiyamo baikon Peti Perjanjian linambaso tukon namonianan polaing konalakai matemo. Tobikon doiya yana bantile, “Ko Mian Bisa nadaanoan Mo Moliyous lapuso luwedoi Israel, sabab ko Mian Bisa na Peti Perjanjian linambaso.”