Read Banggai 1 SAMUEL 5 Bible Online

1 SAMUEL 5 - Banggai bible

1 SAMUEL 5

¹Salataa lapa ko Filistin miano lambase ko Mian Bisa na Peti Perjanjian yanila babayo luwedoi Eben-Haezer doinapoo kota, Asdod.

²Idoo dopetidoo binaba usok doi napoo bonua bapulian Dagon tukon, inabos doi ilahdoo timbalango bibilo.

³Salataa modungoliyo ko Asdod modoa dodoa lubat doi bonua bapulianoo, yanila kitayo baikon ko Dagon timbalango tuwong tanganggalaup doibuta doi TEMENENO na Peti Perjanjian salaano! Yanila bingkate dotimbalangoo tukon abalinggene doi natangabosan.

⁴Bai modoa kooloyono, dodoa, yanila kitayo baikon dotimbalangoo tuwongo koidan doi Peti Perjanjianoo salaano. Idan nia dotimbalangoo oluno tukon loluakon kobotokono topotoli tukon tangabos doi tataaponoo salaano tolongo dotimbalangoo butongo komo daano monondok. (

⁵Doiyamo kosababpo, polong doi oloyo nia sasaibino ko ilah Dagon naimam tukon sasaibino komo sosubaiyo doi Asdod lumbaiyo ko bonua Dagon tataapono salaano tukon aki natudange.)

⁶Doibundu ko TEMENENO ukume ko Asdod tumbuno tukon posaapon kolipu tukon bobongan-bobongan doi yanila butongo.

⁷Salataa yanila kitayo oila komo teali doi yaniladoo, yanila bantile, “Ko Israel na Mian Bisa hukume kita tukon nda ilah Dagon. Kita aki nda moola batadikene kona Peti Perjanjian nadungol dimbaa lobian malumbit koidan.”

⁸Tobikon doiya yanila koloyo kolima kotomundo Filistin sulano napototongi, maka masadai, “Sio nda bulaandekene ko Israel na Mian Bisa na Peti Perjanjianoo?” Dotomundo-tomundodoo timbiliyo, “Bielemo doi kota Gat.” Jadi, do Petidoo biniol doi kota Gat, meeng kokota bailon doi Filistin.

⁹Bai lapa Petidoo polong idoo, ko TEMENENO hukume dokotadoo koidan tukon olubatene konggalanggabutan mo babasal tuuno. Modungoliyo dokotadoo, mau motabokon maukai momotua hinukum tukon boboongan komo daano doi yanila butongo.

¹⁰Maka do Peti Perjanjianoo inantokon doi Ekron, kota Filistin bailon. Petidoo polong idoo, komo dungoliyo wookon, bantile, “Ko Israel na Mian Bisa na Peti Perjanjianoo binabamo doisumai tuuk akateo kita sasaibino.”

¹¹Tobikon doiya yanila uange sasaibino kotomundo Filistin sulano napototongi, maka bantile, “Abalinggenemo do Israeldoo na Mian Bisa na Peti Perjanjian doi natangabosan tumbeno sulano naaki ndainakate tukon ndakaluargaa.” Posaapon kokota teali nggalanggabut sabab ko Mian Bisa hukume dokotado tumbuno tukon babalat tuuno.

¹²Komian daango mo aki namate, kanakon panakit mo bobongan kobutongoila, sampe dokotadoo tumbuno wookon doi yanila nailah-ilah, makabi tulung.