Read Banggai 1 SAMUEL 6 Bible Online

1 SAMUEL 6 - Banggai bible

1 SAMUEL 6

¹Sambuno lapa ko TEMENENO na Peti Perjanjian daano doi Filistin pitu kobituwon konakalumbit,

²ko Filistin miano uange sasaibino koimam tukon sasaibino kotolosupa maka masadai, “Ko TEMENENO na Peti Perjanjianoo sio nda bulandekene? Kalu kita abalinggene doi natangabosan, bulaando kokubaiyano?”

³Maka yanila timbiliyo, “Ko Israel na Mian Bisa na Peti Perjanjianoo inai poabalinggene bunodoiya tolong, bai sio napinolainggon kotambono tuuk potolos mulalim. Tukon kalu bunomo doiya komuyu naikon innalino tukon komuyu naikon toiyo bulaa ko Israel na Mian Bisadoo mohukume komuyu posidutukon.”

⁴“Potolos oila mosio ndabeekene doi yana?” Do Miannoo masadai. Sasaibino doimamoo timbiliyo, “Lima kopatikuno komosoni lima kobukoti timbalango mokinubai luwedoi mosoni, pokakana tukon kona kadaang kotomundo-tomundo Filistin. Bolikonkai silakaan mobuno bobonganan tukon bukoti koidan molapamo silakaiyo komuyu sasaibino, mau rayat maukai tomundo?

⁵Jadi, komuyu siopo mokubai contoh buno luwedoi mobobongan-bobongan tukon luwedoi bukoti modaano monggimal doi mulipu. Tukon buno doiya komuyu beena pongodotii doi Israel na Mian Bisa. Tantu yana naikon tade mohukume komuyu tukon ilah-ilah tukon mubuta.

⁶Oila komanano komuyu mootikase konoamuyu buno tomundo tukon Mesir miano looluk? Inai motoliminggene bulaando ko Mian Bisa namae-maengganano yanila, polong yanila aki nabarani tukon Israel mianodoo yanila sodiikene natinggale ko Mesir.

⁷Tobikon doiya, sadiayomo meeng koloda mo boolu tukon lua kosaapi mosusuwo konapau, tukon mo akiyoon napinake tuuk motandane koloda. Paasemo dosapidoo molua doi loda, tukon apete dosaapidoo napau-pau naabali doi nakandang lalomo.

⁸Doibundu alayomo ko TEMENENO na Peti Perjanjian libakene doi lodadoo bunggono, tukon abese doi kotakkoo bibilo mo tinotui lobo-lobo mosoni sio pososubakene doi yana salaku potolos mulalim. Sodiiyomo koloda tukon dosapidoo naampakon susuungo.

⁹Palahatikanggene konaloloon; kalu Peti Perjanjianoo binaba doi nalipu susuungo, doiyamo kota Bet-Semes, doiya koalatino baikon ko Israel miano na Mian Bisa lapamo lubatene kosilakaan mo hebat tuuno doi kita. Bai kalu dolodadoo aki nadombalaakon, kita naikon toiyo baikon dosilakaanoo bolikon luwedoi Israel na Mian Bisa, baikai tongo napodduangan.”

¹⁰Domian-mianoo loingiyo; yanila mangala lua kosaapi modaano mosusuiyo konapau, maka pinaas doi loda baikai dosaapidoo napau-pau kinulung doi kandang lalomo.

¹¹Maka do Peti Perjanjianoo linibakon doi lodadoo bungguno, koidan kotak motinotui bukoti mosoni tukon bobongananoo contohno.

¹²Saapi-saapidoo ampakon banggadudul doi Bet-Semes; doiayonoo ngangaaton tukon ampakon banggadudul, aki nalias doi bobo kai doi bakalinga luwedoi loloon babasal. Lima kotomundo Filistinoo banggadudul lolainge polong doi Bet-Semes kalalatano.

¹³Doi tempodoo modungoliyo ko Bet-Semes tumbuno daanoon mopupuiyo kona gandum doi pepelakon. Salataa yanila kitayo do Peti Perjanjianoo, tukon sanaang yanila mololobotio.

¹⁴Do lodadoo tade loolani komeeng kobatu babasal doi Yosua naasi, meeng komian modungoliyo ko Bet-Semes. Kotadoo tumbuno bata-batayo dolodadoo kayungo maka kelete saapidoo molua teali sosubakon mosinua doi TEMENENO.

¹⁵Doibundu Lewi mian-miano obulusene do TEMENENO doo na Peti Perjanjian tukon kotak motinotui lobo-lobo mosonidoo, maka abese doi batu babasaloo bunggono. Lapa doiya modungoliyo ko Bet-Semes tumbuno sosubakene kona sosubakon mosinua tukon sosubakon-sosubakon bailonggon doi TEMENENO.

¹⁶Salataa dotomundo Filistin molima kitayo sasaibinodoo yanila mulemo doi Ekron doi oloyodoo koidan.

¹⁷Tukon buno doiya ko Filistin miano lapamo kapatuwe doi TEMENENO kososubakon potolos lalim tuuk modungoliyo dokotadoo lima kotomundo Filistin nabapamarentaan. Dokota-kotadoo doiyamo: Asdod, Gaza, Askelon, Gat tukon Ekron. Doi antara kota-kotadoo daanomo komo daano konabenteng daano komo akiyoon. Sasamba dokotadoo makapatu meeng komosoni patikuno tukon meeng kobukoti mosoni. Bukutii luwedoi kadadianoo doiyamo kota babasal tampat napo abosano ko TEMENENO na Peti Perjanjian. Polong oloyo nia dobatudoo daano doi Yosua naasi, Bet-Semes mianodoo.

¹⁹Bai sabab Bet-Semes mian-miano daangodoo monunui doi TEMENENO na Peti Perjanjianoo lalomo, pitu kolono komian doi yaniladoo TEMENENO akateo. Maka Susahmo korayat sabab ko TEMENENO molubatene doi yanila kosilakaan mo babasal tuuno.

²⁰Maka modungoliyo ko Bet-Semes mianno bantile, “Indeekai komo moola bataanggon doi TEMENENO salaano, Mian Bisa Momoliyousoo? Doiyaando kanda antokanano do Petidoo sulano namodoon doi kita?”

²¹Maka yanila makapatu bito-bito doi Kiryat-Yearim miano tukon teteba buno nia, “Ko Filistin miano lapamo abalinggene ko TEMENENO na Peti Perjanjian. Polubatokai tukon pobabayomo dopetidoo doi mutampat.”