Read Banggai 1 SAMUEL 8 Bible Online

1 SAMUEL 8 - Banggai bible

1 SAMUEL 8

¹Salataa Samuel motuamo, yana oduduke konapau-pau teali hakim doi Israel.

²Konapau langgongo kosambuno Yoel tukon kokoluano Abia. Yanila teali hakim doi Bersyeba.

³Bai yanila aki naloingiyo kotamano nakokubai, bai tolongo moumbolii kokauntungan susuungo. Yanila matalima doy sogok tukon hakimiyo korayat tukon aki naadil.

⁴Tobikon doiya sasaibino ko Israel katuano pototongi, maka yanila mangadap Samuel doi Rama,

⁵ tukon bantile doi yana, “Ndongoliiyo Pau, tama motuamo tukon tama napau-pau aki naloingiyo tama nakokubai. Jadi konamonondokan tama oduduke komeeng kotomundo sulano nadaano komai tomundo nabuno bangsa-bangsa bailon.”

⁶Bai Samuel aki nasanaang tukon doi yaniladoo nausul. Maka yana sambeang doi TEMENENO,

⁷tukon TEMENENO bantile, “Daanokenekai sasaibino dobangsadoo nakakabi doi koo. Sabab bolikono ikoo konapoo tinolak, bai yaku. Yanila akimo naiyase yaku koidan salaku napoo tomundo.

⁸Tambuun kubabaano yanila tobuat luwedoi Mesir, yanila akimo naanggayo yaku tukon sosubaiyo koilah-ilah, tukon oila diabudodoo konapoo linakukon doikoo, doiyamo komo lapamo yanila lakukene doi yaku.

⁹Tobikon doiya daanokenemo konapoo kakabi; bai ingotiikene yanila tukon tutuu, tukon bontiikene bulaando kotomundo naikon nakubaiyano yanila.”

¹⁰Sasaibino ko TEMENENO nabantilanoo Samuel pelenggene doi mian-mian momakabi meeng kotomundo doi yana, konabantilano,

¹¹“Bunonaiyamo koidan mutomundo naikon nakubaiyano komuyu,” bunomokai doiya Samuel nasalitaano. “Yana naikon pakisaayo mupau-pau nausok suludadu; songobos luwedoi yanila salaku suludadu molokiti kereta, kosongobos salaku suludadu momolokiti adalan, tukon kobailonggon salaku suludadu moampakon aiyai.

¹²Kosoobos inoduduk teali suludadu kapalano doi nasoolonan komian, tukon kosoobos bailonggon doi nalima kolonoan komian. Tomundodoo naikon pakisaayo mupau-pau mo badunge kona asi, pototongikene kona bapupuiyan hasilo, kubaiyo kona sinapan-sinapan, tukon nakereta polobosian pakakaso.

¹³Mupau-pau moluko naikon sinumbolii mokubai lisison babangi tuuk doi yana tukon balimang salaku tolosaang tukon tukang pokubai roti.

¹⁴Yana naikon alayo komuasi, muanggul asino, tukon muzaitun asino momonondok tuuno tukon beekene doi sasaibino konapagawe.

¹⁵Asi tukon komu anggur asino naikon kinonoi lulu meeng koobos luwedoi songulo koobos kohasil, maka naikon bineekon doi sasaibino kosuludadu kapalano tukon sasaibino kona pagawe.

¹⁶Yana naikon alayo komuata, muiyayon piniala momonondok tukon mukeledai tukon pakeo tuuk nabalimangan.

¹⁷Komeeng koobos luwedoi songulo koobos komumbembe mudomba tambuno naikon yana alayo. Tukon komuyu nokon naikon teali naata.

¹⁸Kalu tempodoo lubato, komuyu naikon poloon sabab tomundo komuyu mopiliyodoo, bai ko TEMENENO aki naiyase mondongoliiyo komu pinoloonggonoo.”

¹⁹Bai dobangsadoo aki namopusinggon Samuel nabantilan, tolongo yanila bantile, “Batadikenemo! Mauna bulaandomo kai komoteali kami mapalaluu tomundo.

²⁰Ikami yase pokakana kobangsa-bangsa bailon, komai tomundo sio naparentahyo kami tukon katuaiyo kami doi polobosian lalomo.”

²¹Salataa Samuel lengele sasaibino donapoo bantilanoo, yana pelenggene doiya doi TEMENENO.

²²Ko TEMENENO timbiliyo, “Loingiyomo tolong konapoo mongiasan tukon mongoduduko meeng kotomundo tuuk doi yanila.” Doibundu Samuel sumboliiyo ko Israel miano namule doi nabonua suwe-suwele.