Read Banggai 1 SAMUEL 9 Bible Online

1 SAMUEL 9 - Banggai bible

1 SAMUEL 9

¹Daano komeeng komian mo kaasa tukon tambongan luwedoi Benyamin nabenseno, Kish kosambuno. Yana anggota kalualgaa Bekhorat, luwedoi Afiah nakatulunan pangano. Kotamano Abiel tukon nataate Zerol

²Kish daano konapau mala-malane, kosambuno Saul, meeng kopamuda mo tambongan tukon bukuan. Akiyo komeeng komiankai doi posaapon ko Israel moliise konatambonganan luwedoi yana. Kobutongo koidan lobian tatandak; ko Israel miano pokakana kona kotandak tolongo polong doi bengeno.

³Daano kooloyo meeng bubula Kish nakeledai lapus. Tobikon doiya Kish bantile doi Saul, “Babayomo koidan komeeng kopeleleani, tukon unggoliiyokai dokeledai-keledaidoo.”

⁴Maka Saul tukon napeleleani dadangiyo ko daerah Efraim bunggulo tukon buta Salisa, bai aki napososuunggene do iyayon-iyayonoo. Doi bundu yanila ampakon banggadudul doi buta Saharim, bai dokeledai-keledaidoo akiyono koidan idoo. Yanila unggloiiyo koidan doi Benyamin nalipu, bai akiyo kolabano.

⁵Salataa yanila polong doi buta Zuf, Saul bantile doi napeleleani, “Maimo ndamule inai-inaikene tama nalobian susah mopikikene kita bainokai dokeledai-keledaidoo.”

⁶Dopeleleanidoo timbiliyo, “Totiilio looluk! Doikotania daano komeeng ko Mian Bisa napeleleani. Komian odotiiyo yana tutuuno sabab oila kona binantil sidutu bisa-bisa teali. Maimo nda taus doi yana, baanggokai yana moola bontiikene inaando dokeledai-keledaidoo.”

⁷Saul bantile, “Kalu kita taus pososuung yana, oilakai naikon konda bineekon yana? Ndamandu binaba kabuso, tukon kita akiyo konda oioila tuuk mobineekon doi Mian Bisa napeleleanidoo, bolikon?”

⁸Dopeleleanidoo timbiliyo, “Pokokonoi komo daano doiyaku meeng kodoy suasa. Doiya naikon kubeekene doi Mian Bisa napelelanidoo sulano naiyase bontiikene doi kita inaando dokeledai-keledaidoo.”

⁹“Monondoko!” Saul timbiliyo, “Maimo nda taus.” Maka yanila tauso doi kota, doi Mian Bisa napeleleanidoo natampat. Salataa yanila toliboiyo kobunggul mosasalaane dokotadoo, yanila pososuung tukon bubula koboine motaus mangauk paisu doi bubung. Maka yanila masadai doi boine-boinedoo, “Oilakai kotolosupa daano doi kota?” (Doilolukoo meeng konabi sinombuikon tolosupa, jadi kalukai meeng komian yase masadaikene komeeng kolobo doi Mian Bisa, yana bantile buno naiya, “Maimo nda taus doi tolosupa.”)

¹²“Oode, daano,” boi-boinedoo timbiliyo, “Sodokai yana ampakon matailukiyo komuyu. Kalu komuyu mosobit potunduwo, moola polaate. Yana sodo lubat doi kota sabab oloyo nia doi balabaan bunggono doi bunggul daano komososubakonan sosubakon tuuk doi rayat. Sasaibino komo kinolo aki naikon nakaan kalu akiyoon yana nalubat, sabab yana sio nabalakaatio dososubakonoo loluk. Kalu komuyu tauso diabudonia, komuyu naikon pososuunggene akiyoon yana natoliboiyo kobunggul tuuk mokaan.”

¹⁴Jadi Saul tukon napeleleani ampakon doi kota, tukon salataa yanila usok doi tataapon mobabasal, yanila polaing tukon Samuel modaano moampakon doi tampat bakaledaan doi bunggul.

¹⁵Kalubabikon kooloyono ko TEMENENO beena teteba doi Samuel buno nia,

¹⁶“Modoa dodoa uga-ugaate tempo mobuno naia, yaku naikon sumboliiyo komeeng komian luwedoi Benyamin benseno moposuung ikoo. Poodudukemo yana tukon bakolobokian pominokii sulano nateali tomundo doi Israel miano. Yana naikon salamatene dakumian luwedoi Filistin miano. Yaku lapamo kitayo daku mian nasusaan tukon lengelemo konapoo kokiilan makabi tulung.”

¹⁷Salataa Samuel kitayo Saul, ko TEMENENO bantile doi yana, “Naiyamo komianno kubinontiikon doi komuyu doo. Yana naikon palentayo daku mian.”

¹⁸Daanoon mobuno doiya Saul koolaniyo Samuel doi naloolanian kotataapon babasal, tukon masadai, “Tama, maaf, inaando dotolosupadoo nabonua?”

¹⁹Samuel timbiliyo, “Yakumo dotolosupadoo. Tauso loolukon doi tampat bakaledaan doi bunggul, sabab oloyo nia komuyu naikon kaan polaing yaku. Namodoa dodoa sasaibino domuminasadaikonoo naikon yaku timbiliyo, lapa doiya moolamo pomule.

²⁰Tentang mukeledai-keledai molapus toludoo kooloyo molapa, inai momolili, sabab lapamo pinosuunggon. Koidankai, modaano koanggano tuuno doi posaapon ko Israel naikon bineekon doi komuyu tukon tamamu nakaluargaa.”

²¹Saul timbiliyo, “Yaku nia luwedoi Benyamin Nabenseno, benseno mo poipoisik tuuno doi Israel, tukon koidan kukaluargaa komo akiyo koalatino tuuno doi bensenodoo lalomo. Jadi bulaando Tama mobantile bunodoiya doi yaku?”

²²Doibundu Samuel tobiyo Saul tukon napeleleani usok doi bonua lalomo babasal, maka yana beena tampat mopenting yanila doi sasaibino komo kinolo salaano konakadaang uga-ugaat tolukolono komian.

²³Banggadudul Samuel bantile doi tolosaang, “Sidokiikenemo kosail mobudodoo yaku moabese doi komuyudoo.”

²⁴Doibundu dotolosaangoo mangala obos molinilik luwedoi banano sailo, maka sinidokiikon doi Saul salaano. Samuel bantile, “Naiya obos yaku moabese tuuk ikoo sulano moola mukaane doi tempo nia polaing tukon tamu-tamu bailon. Pokaano.” Maka Saul kaano. Jadi doi oloyodoo Saul kaan polaing tukon Samuel.

²⁵Lapa doiya yanila loboson luwedoi tampat bakaledaanoo tukon usok doi kota. Saul binee tampat mooloan doi bonua bungguno,

²⁶maka yana moolo. Salataa dodoa soono, Samuel uange Saul modaano doi atodoo lotengoo, konabantilano, “Banguno, mai kuantokonggon mutaus.” Saul bangun, maka lengget polaing-laing Samuel.

²⁷Salataa yanila polong doi kotadoo bibilo, Samuel bantil doi Saul, “Sumboliiyo dopeleleanidoo naampakon matailukiyo kita.” Maka tauso dopeleleanidoo, tukon Samuel bantil koidan, “Tademo naimbaa soisiken, yaku naikon popitoikene ko Mian Bisa nateteba doikoo.”