Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 創世記 11 Bible Online

創世記 11 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

創世記 11

¹Hit時天下ê口音、言語，lóng一樣。

²In徙去東勢ê時chūn，tī Sī-ná地tú-tio̍h一片ê平洋，就tòa tī-hia。

³In大家參詳講，來ah，咱tio̍h做磚，燒hō͘伊熟。In有磚thang替石，koh有石油thang替灰土。

⁴Koh講，來ah，咱tio̍h起城kap塔，塔頂抵天，為咱立一個名，免得咱四散tī全地。

⁵耶和華降臨，beh看世間人所起ê城kap塔。

⁶耶和華講，看ah，chiah-ê百姓lóng合一，言語亦一樣；現今已經起手做chit-ê事；以後in所beh做ê，無一項能禁止。

⁷來ah，咱落來去，tī-hia phah亂in ê口音，hō͘ in ê言語大家bōe相通。

⁸Tùi án-ni，耶和華hō͘ in tùi-hia四散tī全地；in就停工，無起hit-ê城。

⁹所以hit-ê城名叫巴別，因為耶和華tī-hia phah亂天下ê言語；耶和華hō͘人tùi-hia四散tī全地上。

¹⁰閃ê世系記tī下底：閃一百歲，大水以後兩年生A-hoat-sat。

¹¹閃生A-hoat-sat了後，iáu活五百年，koh有生kiáⁿ cha-bó͘-kiáⁿ。

¹²A-hoat-sat三十五歲生Sa-la̍h。

¹³A-hoat-sat生Sa-la̍h了後，iáu活四百連三年，koh有生kiáⁿ cha-bó͘-kiáⁿ。

¹⁴Sa-la̍h三十歲生Hi-pek。

¹⁵Sa-la̍h生Hi-pek了後，iáu活四百連三年，koh有生kiáⁿ cha-bó͘-kiáⁿ。

¹⁶Hi-pek三十四歲生Hoat-le̍k。

¹⁷Hi-pek生Hoat-le̍k了後，iáu活四百三十年，koh有生kiáⁿ cha-bó͘-kiáⁿ。

¹⁸Hoat-le̍k三十歲生La̍h-ngô͘。

¹⁹Hoat-le̍k生La̍h-ngô͘了後，iáu活兩百連九年，koh有生kiáⁿ cha-bó͘-kiáⁿ。

²⁰La̍h-ngô͘三十二歲生Se-lo̍k。

²¹La̍h-ngô͘生Se-lo̍k了後，iáu活兩百連七年，koh有生kiáⁿ cha-bó͘-kiáⁿ。

²²Se-lo̍k三十歲生Ná-ho̍k。

²³Se-lo̍k生Ná-ho̍k了後，iáu活兩百年，koh有生kiáⁿ cha-bó͘-kiáⁿ。

²⁴Ná-ho̍k二十九歲生Tha-la̍h。

²⁵Ná-ho̍k生Tha-la̍h了後，iáu活一百十九年，koh有生kiáⁿ cha-bó͘-kiáⁿ。

²⁶Tha-la̍h七十歲生亞伯蘭、Ná-ho̍k、哈蘭。

²⁷Tha-la̍h ê世系記tī下底：Tha-la̍h生亞伯蘭、Ná-ho̍k、哈蘭；哈蘭生羅得。

²⁸哈蘭死tī伊ê老父Tha-la̍h ê面前，tī伊ê本地Ka-le̍k-tí ê Jíⁿ城。

²⁹亞伯蘭、Ná-ho̍k，各有娶bó͘。亞伯蘭ê bó͘名叫撒萊；Ná-ho̍k ê bó͘名叫Bi̍t-ka，是哈蘭ê cha-bó͘-kiáⁿ；哈蘭是Bi̍t-ka ê老父，亦是Í-sū-ka ê老父。

³⁰撒萊無懷孕，無kiáⁿ。

³¹Tha-la̍h chhōa伊ê kiáⁿ亞伯蘭，kap伊ê孫羅得，就是哈蘭ê kiáⁿ，以及伊ê新婦撒萊，就是伊ê kiáⁿ亞伯蘭ê bó͘，in相kap出Ka-le̍k-tí ê Jíⁿ城；beh去迦南地；in到哈蘭就tòa tī-hia。

³²Tha-la̍h享受兩百連五歲；Tha-la̍h死tī哈蘭。