Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 列王紀上 8 Bible Online

列王紀上 8 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

列王紀上 8

¹Hit時所羅門聚集以色列ê長老，kap ta̍k支派ê首領，以及以色列人hiah-ê族長，到耶路撒冷所羅門王hia，beh將耶和華ê約櫃，tùi大衛城，就是錫安，運上來。

²Í-tha-liām月，就是七月，ê節期，以色列人lóng聚集到所羅門王hia。

³以色列ê長老lóng來，hiah-ê祭司扛約櫃。

⁴In就扛耶和華ê櫃，kap會幕，以及布棚內一切聖ê器具上來；祭司kap利未人lóng 扛伊上來。

⁵所羅門王kap聚集到伊hia以色列ê全會tī約櫃前獻羊、牛，做祭祀，chōe到bōe算得，也算bōe了。

⁶祭司扛耶和華ê約櫃到伊ê所在，入hit間厝ê後殿，到至聖所，hē tī ki-lō͘兵ê翼下。

⁷因為ki-lō͘兵thí開in ê翼，tī櫃ê所在ê頂面；koh ki-lō͘兵tī hit頂面遮蓋櫃，kap伊ê kǹg。

⁸Hiah-ê kǹg真長，kǹg尾tī後殿前ê聖所thang看見，tī外面就bōe看見；到今á日iáu tī-hia。

⁹櫃內只有兩塊石碑，就是以色列人出埃及地，耶和華kap in立約ê時，摩西tī何烈山所hē-ê；這以外無別項物。

¹⁰當祭司tùi聖所出來ê時，有雲充滿耶和華ê殿；

¹¹致到祭司為tio̍h雲ê緣故bōe能khiā-teh服事；因為耶和華ê榮光充滿耶和華ê殿。

¹²Hit時所羅門講，耶和華bat講伊beh tiàm tī烏烏暗暗ê所在。

¹³我已經起chit間殿hō͘你khiā起，做你永遠tòa ê所在。

¹⁴王oa̍t-tńg伊ê面祝福以色列會眾；以色列會眾lóng khiā起來。

¹⁵伊講；耶和華以色列ê上帝是應該o-ló ê，因為祂親嘴tùi我ê父大衛所應允ê，也親手應驗伊，講，

¹⁶Tùi我chhōa我ê百姓以色列出埃及以來，我bē-bat tī以色列眾支派中揀一個城，起殿hō͘我ê名tī-hia；獨獨揀大衛治理我ê百姓以色列。

¹⁷我ê父大衛心內有意思，beh為耶和華以色列ê上帝ê名起殿。

¹⁸總是耶和華對我ê父大衛講，你ê心有意思beh為我ê名起殿，你chit-ê意思真好；

¹⁹獨獨你m̄-thang起殿；你所親生ê kiáⁿ beh為我ê名起殿。

²⁰Taⁿ耶和華應驗祂所講ê話；我照耶和華ê話起來續接我ê父大衛，坐以色列ê國位；koh為耶和華以色列上帝ê名起殿。

²¹我也tī-hia為約櫃備辦一所在，櫃內有耶和華ê約，就是祂chhōa咱ê列祖出埃及ê時，kap in所立ê約。

²²所羅門當以色列會眾ê面前，khiā tī耶和華ê壇前，kia̍h起手ǹg天，講，

²³耶和華以色列ê上帝ah，tī天頂，tī地下，無有上帝親像你守約行仁愛tī你hiah-ê奴僕，就是盡心行tī你ê面前ê。

²⁴你tùi你ê奴僕我ê父大衛所應允ê，你有守伊；你親嘴講ê，親手應驗伊，照今á日ê款。

²⁵耶和華以色列ê上帝ah，你所應允你ê奴僕我ê父大衛講，你ê kiáⁿ孫若謹慎in ê所做，行tī我ê面前，親像你行tī我ê面前，就屬tī你ê beh tī我ê面前坐以色列ê國位永無斷；taⁿ求你應驗伊。

²⁶以色列ê上帝ah，祢對祢ê奴僕我ê父大衛所講ê，求祢hō͘伊成做實事。

²⁷上帝真正beh khiā起地上mah？看ah，天kap chiah-ê天ê天尚且無夠額hō͘你khiā起，何況我所起chit間殿ah？

²⁸耶和華我ê上帝ah，願你àⁿ落siàu念你ê奴僕ê祈禱懇求，來聽你ê奴僕今á日所祈禱tī你面前ê求叫祈禱。

²⁹願你日暝看顧chit-ê殿，就是你所講起我ê名beh tī-hia ê所在，來聽。你ê奴僕所beh ǹg chit所在祈禱ê祈禱。

³⁰你ê奴僕kap你ê百姓以色列ǹg chit所在祈禱ê時，願你聽in ê祈求；願你tī天裡，你khiā起ê所在，來聽in；你聽見ê時，就赦免。

³¹人若得罪伊ê厝邊，也有人用一個chiù-chōa kah伊chiù-chōa，伊若來chit間殿，tī你ê壇前chiù-chōa；

³²求你tī天裡聽來辨理伊，審判你chiah-ê奴僕，定pháiⁿ人ê罪，照伊所行ê，報應tī伊ê頭殼；定義人做義，照伊ê義來hō͘伊。

³³設使你ê百姓以色列，因為得罪你，chiah thâi輸tī對敵ê面前，in若歸向你，認你ê名，koh tī chit間殿祈禱懇求你；

³⁴求你tī天裡聽in，來赦免你ê百姓以色列ê罪，hō͘ in tò來你所賞賜in ê列祖ê地。

³⁵設使in得罪你，致到天關密，無落雨；你刑罰in ê時，in若ǹg chit所在祈禱，認你ê名，離開in ê罪；

³⁶求你tī天裡聽in，赦免你ê奴僕kap你ê百姓以色列ê罪，tī你教示in所tio̍h行ê好路ê時，koh落雨tī你ê地，就是你賞賜你ê百姓做業ê。

³⁷Chit-ê地若有飢荒、瘟疫、枯焦、朽爛、草蜢、剪蟲，á是in ê對敵tī in hiah-ê城ê地圍困in，無論有甚麼災厄，甚麼破病；

³⁸或是一人，或是你ê百姓以色列ê眾人，ta̍k-ê知家己心內ê災厄，ǹg chit間殿kia̍h起手，無論怎樣懇求，怎樣祈禱；

³⁹願你tī天裡，你所khiā起ê所在，來聽伊，來赦免，來施行；你知in ê心，照in ta̍k人ê行做來款待in，(因為世間ta̍k人ê心，只有你知) ；

⁴⁰Hō͘ in tī你賞賜阮列祖ê地，一世人敬畏你。

⁴¹論到外邦人，m̄是屬你ê百姓以色列，伊為tio̍h你ê名tùi遠遠ê所在來ê，

⁴²(因為in聽見你ê大名，大權能ê手，伸出ê手；) 若來ǹg chit-ê殿祈禱，

⁴³願你tī天裡，你khiā起ê所在，來聽in，照外邦人一切所tùi你求ê來行；hō͘天下bān百姓lóng bat你ê名，敬畏你，親像你ê百姓以色列一樣；koh hō͘ in知我所起chit間殿是用你ê名來稱ê。

⁴⁴你ê百姓若出去你所差in去ê路，kap對敵交戰，也ǹg你所揀ê城，kap我為tio̍h你ê名所起ê殿，來祈禱耶和華；

⁴⁵願你tī天裡來聽in ê祈禱懇求，來kā in判斷。

⁴⁶你ê百姓若得罪你，(因為無有無犯罪ê人，) 你受氣in，將in交hō͘對敵，致到對敵掠in到對敵ê地，或是遠或是近；

⁴⁷in若tī所掠去ê地，心內倒tńg想，來反悔；koh tī掠in ê人ê地，懇求你講，阮有罪，阮有悖逆，阮有做pháiⁿ；

⁴⁸in若tī受掠去ê地，就是對敵掠in去ê地，盡心盡性歸服你，koh ǹg本地，就是你賞賜in列祖ê地，kap你所揀ê城，以及我為tio̍h你ê名所起ê殿，來祈禱你；

⁴⁹願你tī天裡，你所khiā起ê所在，聽in ê祈禱懇求，kā in判斷；

⁵⁰koh赦免你ê百姓得罪你ê，以及in一切得罪你ê罪過，hō͘ in得tio̍h憐憫tī掠in ê人ê面前，致到掠in ê人憐憫in。

⁵¹因為in是你ê百姓，你ê產業，是你chhōa in出埃及，tùi鑄鐵ê爐中出來ê。

⁵²願你ê目睭開看顧你ê奴僕ê祈禱，kap你ê百姓以色列ê祈禱，來聽in一切對你求ê。

⁵³主耶和華ah，因為你bat tùi地上眾百姓ê中間分別in，來做你ê產業，是照你chhōa阮ê列祖出埃及ê時，託你ê奴僕摩西所講ê。

⁵⁴所羅門tī耶和華ê壇前腳頭u跪teh，手伸ǹg天，所tùi耶和華祈禱懇求ê已經祈禱明白，就起來；

⁵⁵伊就khiā-teh，大聲祝福以色列全會眾，講，

⁵⁶耶和華是應該tio̍h o-ló-ê，因為伊一切所應允ê，賞賜平安hō͘伊ê百姓以色列，見若託伊ê奴僕摩西所應允ê好話，無一句落空。

⁵⁷願耶和華咱ê上帝kap咱tī-teh，親像伊kap咱ê列祖tī-teh一樣；願伊無離開咱，無放sak咱；

⁵⁸Hō͘咱ê心歸向伊，來行伊一切ê道路，守伊所命令咱ê列祖ê誡命，伊ê律例，伊ê法度。

⁵⁹我taⁿ tī耶和華ê面前所祈求chiah-ê話，願chiah-ê話日暝近tī咱ê上帝耶和華；koh日日照tāi-chì所合宜ê為祂ê奴僕判斷，kap祂ê百姓以色列判斷。

⁶⁰Hō͘地上萬百姓知耶和華是上帝，伊以外無別ê。

⁶¹所以lín ê心tio̍h純全ǹg耶和華咱ê上帝，遵thàn伊ê律例，守伊ê誡命，親像今á日ê款。

⁶²王kap以色列眾百姓相kap tī耶和華ê面前獻祭。

⁶³所羅門獻謝恩ê祭，就是獻hō͘耶和華ê，牛兩萬兩千隻，羊十二萬隻。Án-ni，王kap以色列眾百姓，為耶和華ê殿行獻殿ê禮。

⁶⁴當hit日，王分別耶和華殿前院中ê所在，tī-hia獻燒祭，素祭，kap謝恩祭ê油，因為耶和華頭前ê銅壇siuⁿ細，bōe容允得hiah-ê燒祭、素祭，kap謝恩祭ê油。

⁶⁵Hit時所羅門kap以色列眾人，就是tùi Hap-má ê路口到埃及ê溪，lóng kap伊聚集做大會，tī耶和華咱上帝ê面前守節筵七日，koh七日，共十四日。

⁶⁶第八日王差百姓去；in就kā王祝福；因為耶和華對伊ê奴僕大衛kap伊ê百姓以色列所施出一切ê恩惠，就歡喜，心內快樂，ta̍k-ê tò去in ê布棚。