Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 列王紀下 1 Bible Online

列王紀下 1 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

列王紀下 1

¹A-hap死了，Mô͘-ap背叛以色列。

²A-hap-siā tùi撒馬利亞ê樓頂ê欗杆跋落來，致病；就差使者，kā in講，lín去問Í-kek-lûn ê上帝Pa-le̍k-se-pok，我chit-ê病會好á-bōe。

³總是耶和華ê使者kā Thê-su-pí人以利亞講，你起來，上去chih撒馬利亞王ê使者，kā in講，lín去問Í-KEK-lûn ê上帝Pa-le̍k-se-pok，是因為以色列中無上帝mah？

⁴所以耶和華án-ni講，你bōe會koh落去你所上去ê眠床，的確會死。以利亞就去。

⁵使者tò來見王，王問in講，Lín為甚麼tò來？

⁶使者應伊講，有一人tú-tio̍h阮，kā阮講，去ah，lín tò去見差lín ê王，kā伊講，耶和華án-ni講，你差人去問Í-kek-lûn ê上帝Pa-le̍k-se-pok，是因為以色列中無上帝mah？所以你bōe koh落去你所上去ê眠床，的確會死。

⁷王問in講，上來tú-tio̍h lín，kā lín講chiah-ê話ê，伊ê形狀啥款？

⁸應講，伊穿有毛ê衫，腰hâ皮帶。王講，這是Thê-su-pí人以利亞。

⁹王就差五十夫長chhōa伊hit五十人去以利亞hia，伊上去伊hia；看ah，以利亞坐tī山頂。五十夫長kā伊講，上帝ê奴僕ah，王講，你tio̍h落來。

¹⁰以利亞ìn五十夫長講，我若是上帝ê奴僕，願火tùi天落來，燒你kap你hit五十人；就有火tùi天落來燒伊kap伊hit五十人。

¹¹王koh 差一個五十夫長，chhōa伊hit五十人，去以利亞hia；伊就kā伊講，上帝ê奴僕ah，王講，你緊緊落來。

¹²以利亞應in講，我若是上帝ê奴僕，願火tùi天落來，燒你kap你hit五十人；就有上帝ê火tùi天落來，燒伊kap伊hit五十人。

¹³王koh 差第三隊ê五十夫長chhōa伊hit五十人；hit-ê第三隊ê五十夫長上去跪tī以利亞ê面前，懇求伊講，上帝ê奴僕ah，求你掠我ê性命kap你chit五十ê奴僕ê性命做寶貝。

¹⁴看ah，已經有火tùi天落來燒死以前兩個五十夫長，kap伊ta̍k-ê五十人；taⁿ求你看我ê性命做寶貝。

¹⁵耶和華ê使者kā以利亞講，你kap伊落去m̄免驚伊。

¹⁶以利亞就起來，kap伊落去見王；kā伊講，耶和華án-ni講，你差人去問Í-kek-lûn ê上帝Pa-le̍k-se-pok，是因為以色列中無上帝hō͘你問伊ê話mah？所以你bōe koh落來你所上去ê眠床，的確tio̍h死。

¹⁷王就死，照以利亞所傳耶和華ê話；王無kiáⁿ，Iâ-hô-lâm續接位，tī猶大王Iok-sa-hoat ê kiáⁿ Iâ-hô-lâm第二年。

¹⁸A-hap-siā其餘ê事，kiám無記tī以色列chiah-ê王ê記錄mah？