Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 列王紀下 14 Bible Online

列王紀下 14 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

列王紀下 14

¹以色列王Iok-hap-su ê kiáⁿ Iok-a-si第二年，猶大王Iok-a-si ê kiáⁿ A-má-siā坐位。

²伊坐位ê時，二十五歲；tī耶路撒冷做王共二十九年；伊ê老母名叫Iok-iâ-tàn，是耶路撒冷人。

³A-má-siā行耶和華看做好ê事；總是無親像伊ê祖大衛，就是照伊ê老父Iok-a-si一切所行ê去行。

⁴總是山頭壇iáu未廢無；百姓猶原獻祭燒香tī山頭壇。

⁵前hiah-ê人臣thâi死伊ê老父，猶大王，taⁿ國權一下堅固，就kā in thâi死。

⁶總是無thâi死in ê kiáⁿ，照摩西律法ê冊所記載，耶和華命令講，M̄-thang因為kiáⁿ來thâi死老父，也m̄-thang因為老父來thâi死kiáⁿ；ta̍k人tio̍k因為本身ê罪來死。

⁷A-má-siā tī鹽ê山谷thâi死伊2-tong人一萬，koh攻取Se-la̍h，改名叫Iok-thiap，到今á日。

⁸Hit時A-má-siā差使者去見Iâ-hō͘ ê孫，Iok-hap-su ê kiáⁿ，以色列王Iok-a-si，講，來ah，咱兩人相見面tī戰場。

⁹以色列王Iok-a-si差使者去見猶大王A-má-siā講，黎巴嫩ê草刺差使者去見黎巴嫩ê柏香樹，講，用你ê cha-bó͘-kiáⁿ hō͘我ê kiáⁿ做bó͘；後來黎巴嫩有一隻野獸經過，thún踏hit-ê草刺。

¹⁰你已經phah贏Í-tong，心就驕傲；你掠chit-ê做榮光，tī家內安然khiā起就好；啥事起事惹災厄，hō͘本身kap猶大國相kap倒壞ah？

¹¹總是A-má-siā m̄肯聽。Tùi án-ni，以色列王Iok-a-si上來；tī猶大ê Pek-sī-be̍k kap猶大王A-má-siā相見面tī戰場。

¹²猶大thâi輸tī以色列ê面前；ta̍k人走tò去in ê布棚。

¹³以色列王Iok-a-si tī Pek-sī-be̍k掠tio̍h A-hap-siā ê孫，Iok-a-si ê kiáⁿ，猶大王A-má-siā，就來到耶路撒冷，拆毀耶路撒冷ê城牆，tùi Í-hoat-liân門到角門，共四百肘；

¹⁴koh將耶和華殿內kap王宮府庫所有ê金銀kap器具，lóng the̍h去；koh帶人去做準當，就tò去撒馬利亞。

¹⁵Iok-a-si其餘ê事，見伊所行ê，kap伊ê能力，以及kap猶大王A-má-siā交戰ê事，kiám無lóng記tī以色列chiah-ê王ê記錄mah？

¹⁶Iok-a-si kap伊ê列祖同睏，kap以色列chiah-ê王相kap葬tī撒馬利亞；伊ê kiáⁿ Iâ-lô-phò-àm續接伊做王。

¹⁷以色列王Iok-hap-su ê kiáⁿ Iok-a-si死了，猶大王Iok-a-si ê kiáⁿ A-má-siā iáu活十五年。

¹⁸A-má-siā其餘ê事，kiám無lóng記tī猶大列王ê記錄mah？Tī耶路撒冷有人結黨beh害A-má-siā。

¹⁹伊就走到拉結，in差人jip伊到拉結，thâi死伊tī-hia。

²⁰人就用馬載伊到耶路撒冷，kap伊ê列祖葬tī大衛ê城。

²¹猶大眾百姓設立A-sat-lī-ngá續接伊ê老父A-má-siā做王。Hit時伊十六歲。

²²A-má-siā王kap伊ê列祖同睏了後，A-sat-lī-ngá起Í-la̍h-tha，hō͘伊猶原kui猶大國管轄。

²³猶大王Iok-a-si ê kiáⁿ A-má-siā十五年，以色列王Iok-a-si ê kiáⁿ Iâ-lô-phò-am3ti7撒馬利亞坐位，共做王四十一年。

²⁴伊行耶和華看做pháiⁿ ê事，無離開Nî-pat ê kiáⁿ Iâ-lô-phò-àm hō͘以色列犯罪ê。

²⁵伊恢復以色列交界ê地，tùi Hap-má-kháu到A-la̍h-pa海，照耶和華以色列ê上帝託伊ê奴僕Ka-te̍k-hi-hut人，A-bí-thài ê kiáⁿ，先知約拿所講ê話。

²⁶因為耶和華看見以色列人真艱苦，無論受拘束ê，自由ê，lóng無lah，也無人幫贊以色列。

²⁷耶和華bē-bat講beh擦消以色列ê名tī天下；就託Iok-a-si ê kiáⁿ Iâ-lô-phò-àm ê手來救in。

²⁸Iâ-lô-phò-àm其餘ê事，見伊所行ê，kap伊ê能力，伊怎樣交戰，怎樣復到大馬色kap Hap-má，就是前屬猶大ê，hō͘ in koh 歸以色列，kiám無lóng記tī以色列chiah-ê王ê記錄mah？

²⁹Iâ-lô-phò-àm kap伊ê列祖以色列chiah-ê王同睏；伊ê kiáⁿ Sat-ka-lī-ngá續接伊做王。