Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 歷代志上 12 Bible Online

歷代志上 12 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

歷代志上 12

¹大衛因為驚Ki-sū ê kiáⁿ掃羅，守teh m̄敢出去ê時，有chiah-ê勇士來到Sé-kek-la̍h chhē伊，幫贊伊交戰。

²In gâu開弓，能用tò手chiàⁿ手hiat石頭射箭；lóng是便雅憫人掃羅ê同族。

³頭一個是A-hi-í-siā，koh有Iok-a-si，lóng是Ki-pí-a人Sī-má ê kiáⁿ；koh有Iâ-siat kap Pí-le̍k，是A-su-má-ui ê kiáⁿ；koh有Pí-la̍h-ka kap A-ná-tu̍t人Iâ-hō͘；

⁴Ki-piàn人Í-si̍t-mái-ngá，tī三十人中是勇士，也teh管hit三十人。Koh有耶利米、Ngá-hap-sek、Iok-hap-lân，kap Ki-tek-la̍h人Iok-sat-poa̍t；

⁵I-lī-o͘-sài、Iâ-lī-mô͘、Pí-a-lī-ngá、Sī-má-lī-ngá，Hap-lu̍t-hut人Sī-hoat-thê-ngá；

⁶Khó-la̍h人Í-lī-ka-ná、Iâ-se-a、A-sat-lia̍t、Iok-í-siā、Ngá-sok-pan；

⁷Ki-to人Iâ-lô-hán ê kiáⁿ Iû-la̍h，kap Se-pa-tē-ngá。

⁸Ka-tek支派有kúi-nā人到曠野ê衛所，歸óa大衛；in lóng是勇士戰士，能出陣，giâ屏牌，kia̍h鎗，in ê面親像獅ê面，gâu走親像山裡ê鹿。

⁹頭一個Í-siat，第二Gô-pa-tí-ná，第三Í-lī-ap；

¹⁰第四Bî-si-má-ná，第五耶利米；

¹¹第六A-thài，第七Í-lī-gia̍p；

¹²第八Iok-hap-lân，第九 Í-lī-sat-pa；

¹³第十耶利米，第十一Boa̍t-pa-nāi。

¹⁴Chiah-ê lóng是Ka-tek人，也lóng是軍長；siōng-bōe-ê能抵擋一百人，siōng能ê能抵擋一千人。

¹⁵正月約旦河水漲滿雙pêng岸ê時，in過河，hō͘一切tiàm tī山谷ê人走東走西。

¹⁶Koh有便雅憫猶大人來到衛所，chhē大衛。

¹⁷大衛出去迎接in；對in講，Lín若是為tio̍h平安來幫贊我，我kap lín ê心就相契合；總是lín若beh將我無罪ê人，賣tī對敵ê手，願咱列祖ê上帝鑑察責罰。

¹⁸Hit時上帝ê神臨到chiah-ê將ê頭人A-má-sat，伊就講，大衛ah，阮是歸tī你ê，耶西ê kiáⁿ ah，阮是幫贊你ê；願你平平安安，願幫贊你ê，也得tio̍h平安；因為你ê上帝幫贊你。大衛就收留in，設立in做軍長。

¹⁹大衛從前kap腓利士出陣beh攻擊掃羅ê時，有Má-ná-se支派kúi-nā人來歸óa伊，總是到尾in無幫贊in，因為腓利士ê頭人有議論tio̍h hō͘伊tò去，講，伊的確歸伊ê主人掃羅，致到咱ê頭殼危險。

²⁰Hit時大衛去Sé-kek-la̍h，有Má-ná-se人ê千總，Ap-ná、Iok-sat-poa̍t、Iâ-tia̍p、Bí-ka-le̍k、Iok-sat-poa̍t、Í-lī-hō͘、Sé-le̍k-thài，lóng來歸óa伊。

²¹Chiah-ê人幫贊大衛攻擊土匪，in lóng是大氣力ê勇士，koh做軍長。

²²Hit時日日有人歸óa大衛，beh幫贊伊，就成做大軍隊，親像上帝ê軍隊一樣。

²³備辦交戰ê軍隊到Hi-pek-lûn見大衛，beh照耶和華ê話移徙掃羅ê國位hō͘大衛，in ê數額記tī下面。

²⁴猶大支派，giâ屏牌kia̍h鎗備辦交戰ê，有六千八百人。

²⁵西門ê支派，能出陣ê勇士，有七千一百人。

²⁶利未支派四千六百人。

²⁷Iâ-hô-iâ-tāi是亞倫ê家ê首領，tè伊ê有三千七百人。

²⁸Koh有少年人Sat-tok是大勇士，kap伊本家ê族長二十二人。

²⁹便雅憫ê支派，就是掃羅ê同族，三千人；因為到hit時，chit族大半iáu-kú擁護掃羅ê家。

³⁰Í-hoat-liân支派ê大勇士，tī本族出名ê，有兩萬連八百人。

³¹Má-ná-se半支派記名ê，共一萬八千，lóng來設立大衛做王。

³²Í-sat-ka支派有知識，bat時勢，知以色列所tio̍h行ê，in ê頭人有兩百；in ê兄弟lóng thàn in ê命令。

³³Se-pò͘-lûn有能出陣ê，lóng gâu交戰，能用ta̍k樣ê軍器ê，有五萬人；in能排隊伍，無兩樣心。

³⁴屬Ná-hut-tha-lī-ê，有一千ê軍長；giâ屏牌kia̍h鎗來tè in ê，有三萬七千人。

³⁵Tàn ê支派，能排陣ê，兩萬八千六百人。

³⁶屬A-siat-ê，能出軍排陣ê，有四萬人。

³⁷約旦河ê東pêng，Liû-piān人、Ka-tek人、Má-ná-se半支派ê人，kia̍h ta̍k樣ê軍器來交戰ê，有十二萬人。

³⁸Chiah-ê戰士lóng能排隊伍，誠實心到Hi-pek-lûn，beh設立大衛做以色列全國ê王；以色列其餘ê人，也同一樣ê心，beh設立大衛做王。

³⁹In tiàm hia三日久，kap大衛相kap tiàm，也lim也食，因為in ê兄弟kā in備辦便便。

⁴⁰óa近in ê人，直到Í-sat-ka、Se-pò͘-lûn、Ná-hut-tha-lī ê人，將驢、駱駝、騾、牛，載麵粉食物，kap無花果餅、葡萄干、酒、油，來hia；也有帶牛羊，lóng真chōe；因為tī以色列中有大歡喜。