Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 出埃及記 16 Bible Online

出埃及記 16 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

出埃及記 16

¹In tùi Í-lîm起身，tī出埃及地以後，第二月十五日，以色列人全會到Í-lîm kap Se-nái ê中間，Sìn ê曠野。

²以色列人全會tī曠野哀怨摩西、亞倫。

³以色列人對in講：M̄值tio̍h阮tī埃及地死tī耶和華ê手。Hit時阮有肉滿鼎，有餅thang食到飽；lín chhōa阮出來到chit-ê曠野，是beh hō͘ chit-ê全會lóng餓死。

⁴耶和華對摩西講：看ah，我beh tùi天落米糧hō͘ lín；百姓tio̍h出去，ta̍k日拾ta̍k日ê額；我thang試驗in，看in beh thàn我ê法度á m̄。

⁵到第六日，in tio̍h將所拾入來ê，備辦好勢，比ta̍k日所拾ê重倍chōe。

⁶摩西、亞倫對以色列眾人講：到ê-hng lín beh知，chhōa lín出埃及地ê是耶和華。

⁷明á早起lín beh看見耶和華ê榮光；因為耶和華聽見lín哀怨伊；阮算甚麼，lín竟然哀怨阮？

⁸摩西koh講：耶和華ê-hng時beh hō͘ lín食肉，早起時beh hō͘ lín食餅到飽；因為lín哀怨耶和華，伊lóng聽見；阮算甚麼？lín m̄是哀怨阮，是哀怨耶和華。

⁹摩西對亞倫講：你tio̍h kā以色列人全會講：Lín tio̍h就近耶和華ê面前；因為伊已經聽見lín ê哀怨lah。

¹⁰亞倫tú-tú對以色列人全會講話ê時，in ǹg曠野teh看，看ah，耶和華ê榮光tī雲中顯現。

¹¹耶和華對摩西講：

¹²我已經聽見以色列人ê哀怨；你tio̍h kā in講：到黃昏ê時，lín beh食肉，早起beh有餅thang食飽；lín就知我是耶和華lín ê上帝。

¹³到ê-hng有鵪鶉飛來，遮蓋營盤；天光早tī營盤四圍ê地面，有一重(têng)ê露水。

¹⁴露水乾ê時，看ah，曠野ê地面有細細圓圓ê物；細到親像霜。

¹⁵以色列人看見，m̄知是甚麼，大家相kap講：這是甚麼ah？摩西kā in講：這就是耶和華hō͘ lín食ê餅。

¹⁶耶和華所吩咐ê是án-ni；lín tio̍h照ta̍k人所能食ê量來拾，ta̍k人為伊布棚內ê人，照伊ê人額來拾，一人一gô-mûi-jíⁿ。

¹⁷以色列人照án-ni行，有ê拾chōe，有ê拾少。

¹⁸到用gô-mûi-jíⁿ量(niû)伊，拾chōe-ê無chhun，拾少ê也無欠；ta̍k人照in能食ê量來拾伊。

¹⁹摩西kā in講：人m̄-thang將所chhun-ê留到隔早起。

²⁰總是in無聽摩西ê話，有人留到隔早起，就生蟲臭味；摩西受氣in。

²¹In ta̍k早起，照ta̍k人ōe食ê量拾伊；日頭一下曝，就熔去。

²²到第六日，in拾重倍ê額，ta̍k人兩gô-mûi-jíⁿ；全會hiah-ê頭人來kā摩西講。

²³摩西kā in講：耶和華án-ni講：明á日是重要ê安歇，就是服事耶和華聖ê安歇日；lín ài pek-ê就pek伊，ài煮ê就煮伊；所chhun-ê，tio̍h家己收teh，留到隔早起。

²⁴In就照摩西所吩咐收teh留到隔早起，也無臭味，內面也無蟲。

²⁵摩西講：Lín今á日食chit-ê，因為今á日是服事耶和華ê安歇日；lín tī田野，今á日的確chhē無。

²⁶六日間thang拾，第七日是安歇日，hit日就無。

²⁷第七日百姓中有人出去拾，也chhē無。

²⁸耶和華對摩西講：Lín m̄肯守我ê命令，我ê律法，beh到tī時ah？

²⁹Lín tio̍h看，耶和華已經將安歇日賞賜lín，所以第六日伊hō͘ lín兩日ê米糧，第七日ta̍k人tio̍h tiàm家己ê所在，lóng m̄-thang出去。

³⁰Tùi án-ni，百姓就tī第七日安歇。

³¹Chit-ê物，以色列家叫伊做má-ná；款式親像oân-sui仁，色緻是白ê，滋味親像chham蜜ê餅。

³²摩西講：耶和華án-ni吩咐，tio̍h將一gô-mûi-jíⁿ tīⁿ-tīⁿ ê má-ná，留到lín ê後代，hō͘ in看我當日chhōa lín出埃及地，tī曠野所hō͘ lín食ê餅。

³³摩西kā亞倫講：你the̍h一個器具，tóe一gô-mûi-jíⁿ tīⁿ-tīⁿ ê má-ná，khǹg tī耶和華ê面前，留到lín ê後代。

³⁴亞倫照耶和華所吩咐摩西ê，將má-ná hē tī干證ê約櫃前留teh。

³⁵以色列人食má-ná共四十年久，直到in到tī有人khiā起ê地。 In食má-ná，直到in到迦南ê境界。

³⁶一gô-mûi-jíⁿ就是i-hoat ê十份一。