Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 約伯記 33 Bible Online

約伯記 33 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

約伯記 33

¹約伯ah，taⁿ請你聽我ê話，留心聽我一切ê言語。

²看ah，我taⁿ開我ê嘴，我ê舌tī嘴內teh講。

³我ê話beh講出我心內ê正直，我ê嘴唇beh老實講出所知ê。

⁴上帝ê神創造我；全能ê ê氣hō͘我得tio̍h活。

⁵你若會，就tio̍h應我，起來khiā排列tī我ê面前。

⁶看ah，我tī上帝ê面前kap你一樣，也是用土ni̍h成ê。

⁷看ah，我無用威嚴hō͘你驚，也無用我ê勢力teh你。

⁸你所講ê，我實在有聽見，也有聽見你ê話ê聲，講，

⁹我是清氣，無過失，我是清白，tī我心內也無罪。

¹⁰看ah，伊chhē空隙來攻擊我，掠我做伊ê對敵。

¹¹伊用腳銬哭我ê腳，致意看我一切ê路。

¹²看ah，講到這，你是不義，我beh應你；因為上帝比人khah大。

¹³你啥事kap伊相爭？因為伊ê事伊lóng無解明。

¹⁴因為上帝講一pái，也兩pái，總是人無致意。

¹⁵人倒tī眠床睏，到伊睏重眠ê時，tī眠夢中，暝時ê異象，

¹⁶伊開in ê耳孔，蓋印tī in所受ê教示。

¹⁷Beh hō͘人改換所計畫ê事，遏(at)止人ê驕傲。

¹⁸阻止伊ê活命無落深坑，也伊ê性命無tùi刀劍來死。

¹⁹人tī眠床裡受痛疼ê警戒；tī伊ê骨內親像交戰無soah。

²⁰致到伊ê活命厭賤食物，伊ê心神厭惡好味。

²¹伊ê肉消瘦，無thang看見；平素無看見ê骨，taⁿ lóng thóng出。

²²伊ê性命近tī深坑；伊ê活命近tī hiah-ê滅無性命ê。

²³若有一個使者kap伊tī-teh，就是一千中ê一個，替伊講話ê，將人所tio̍h做ê指示伊；

²⁴伊就施恩hō͘伊，講，救伊免得落深坑，我已經chhē-tio̍h贖回伊ê。

²⁵伊ê肉比gín-ná ê肉khah幼軟；伊beh復到少年ê日子。

²⁶伊beh祈禱上帝，上帝歡喜伊；見tio̍h伊ê面來歡喜；伊koh算hit人做義。

²⁷伊tī人ê面前唱歌講，我有犯罪，顛倒是非，無利益我。

²⁸伊救贖我ê性命，免落深坑；我ê活命也beh看見光。

²⁹看ah，chiah-ê一切ê事上帝行tī人，兩pái，三pái。

³⁰為tio̍h beh tùi深坑救伊ê性命倒tńg，hō͘伊得tio̍h活命ê光照伊。

³¹約伯ah，你tio̍h àⁿ耳孔聽我ê話，tio̍h靜靜，我就beh講。

³²你若有話thang講，就應我；做你講，因為我ài掠你做義。

³³若無，你tio̍h聽我講，你tio̍h靜靜，我beh教你智慧。