Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 詩篇 119 Bible Online

詩篇 119 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

詩篇 119

¹所行完全，遵thàn耶和華律法ê，_x0009_Chit號人有福氣。

²遵守伊干證ê話，專心chhē伊ê，chit號人有福氣。

³In無做不義ê事；In遵thàn伊ê道路。

⁴你bat將你教示ê話吩咐阮；是ài阮慇勤遵守。

⁵願我ê趨向定tio̍h，來守你ê律例。

⁶我對重你一切ê誡命，就不致見笑。

⁷我學習你公義ê判斷，就beh用正直ê心感謝你。

⁸我beh守你ê律例；求你m̄-thang一盡放sak我。

⁹少年人tio̍h用甚麼來清氣伊ê所行？是tio̍h照你ê話來細膩行。

¹⁰我專心chhē你；求你m̄-thang hō͘我迷路離開你ê誡命。

¹¹我將你ê言語khǹg tī我ê心內，免得我得罪你。

¹²耶和華ah，你是應該受o-ló-ê；求你將你ê律例教示我。

¹³你所講一切ê判詞，我用嘴唇報揚伊。

¹⁴我歡喜你干證ê路，親像歡喜一切ê財物。

¹⁵我beh靜靜想你教示ê話，亦beh注重你ê道路。

¹⁶我beh tī你ê律例中家己快樂，我無bōe記得你ê話。

¹⁷求你用大恩款待你ê奴僕，hō͘我得tio̍h活；我就beh守你ê話。

¹⁸求你開我ê目睭，Hō͘我看出你律法中ê奇妙。

¹⁹我tī地上是做寄腳ê；求你m̄-thang對我隱密你ê誡命。

²⁰我ê心爆裂，因為時常切切欣慕你ê判詞。

²¹你責備驕傲受咒詛ê人，就是迷路離開你ê誡命ê人。

²²求你kā我除去凌辱kap看輕，因為我守你干證ê話。

²³貴族坐teh，lām-sám議論我；若是你ê奴僕靜靜想你ê律例。

²⁴你干證ê話是我所歡喜ê，是我ê謀士。

²⁵我ê性命kha̍h-tiâu tī土粉，求你，照你ê話，拯救我活。

²⁶我講起我所行ê路，你應我；求你將你ê律例教示我。

²⁷求你hō͘我明白你教示ê路，我就靜靜想你ê奇事。

²⁸我ê心神因為憂苦來消溶；求你，照你ê話，hō͘我勇健。

²⁹求你hō͘我離開奸詐ê路，將你ê律法恩賜我。

³⁰我有揀信實ê路，將你ê判詞hē tī我ê面前。

³¹我戀慕你干證ê話；耶和華ah，求你m̄-thang hō͘我見笑。

³²你開闊我ê心ê時，我就走tī你誡命ê路。

³³耶和華ah，求你將你律例ê路指示我；我beh徹底遵守。

³⁴求你hō͘我智慧，我就守你ê律法；Koh beh專心執守。

³⁵求你hō͘我行你誡命ê路，因為chit-ê路是我所歡喜ê。

³⁶求你hō͘我ê心ǹg你干證ê話，無ǹg不義ê錢財。

³⁷求你hō͘我ê目睭oa̍t走，無看虛假；Koh hō͘我tī你ê路中來活。

³⁸你ê奴僕敬畏你，求你為伊堅固你ê話。

³⁹求你hō͘我所kiaⁿ ê凌辱離開我；因為你ê判詞是好。

⁴⁰我欣慕你教示ê話；求你，tī你ê公義，hō͘我來活。

⁴¹耶和華ah，願你照你ê話，Hō͘你ê慈愛，就是你ê救恩，臨到我。

⁴²我就有ōe-thang應hit-ê凌辱我ê；因為我óa靠你ê話。

⁴³求你hō͘真理ê話無一盡離開我ê嘴；因為我ǹg望你ê判斷。

⁴⁴我beh常常守你ê律法，直到永遠。

⁴⁵我beh行tī寬闊ê所在，因為我有講究你教示ê話。

⁴⁶我亦beh tī君王ê面前講論你干證ê話，亦無致到見笑。

⁴⁷我beh tī你ê誡命中家己快樂；Chiah-ê誡命平素是我所疼惜ê。

⁴⁸我疼惜你ê誡命，我beh對伊kia̍h起手；你ê律例我亦beh靜靜想伊。

⁴⁹求你記得對你ê奴僕所應允ê話，因為你bat hō͘我有ǹg望。

⁵⁰你ê話將我救活，我tī患難中tùi這得tio̍h安慰。

⁵¹驕傲ê人盡在侮慢我；總是我bē-bat偏離你ê律法。

⁵²耶和華ah，我記念你tùi早以來ê判詞，就家己得tio̍h安慰。

⁵³我因為棄sak你ê律法ê pháiⁿ人，就大受氣，親像火to̍h。

⁵⁴我tī寄腳ê厝，平時用你ê律例做詩歌。

⁵⁵耶和華ah，我暝間記念你ê名，守你ê律法。

⁵⁶我得tio̍h án-ni，是因為我守你教示ê話。

⁵⁷耶和華是我ê基業，我bat講，我beh守你ê話。

⁵⁸我bat專心求你ê恩，願你照你ê話憐憫我。

⁵⁹我深深想我所行ê路，就oa̍t-tńg腳ǹg你干證ê話。

⁶⁰我守你ê誡命，趕緊無延chhiân。

⁶¹Pháiⁿ人ê索縛纏我；總是我無bōe記得你ê律法。

⁶²我因為你公義ê判斷，半暝beh起來感謝你。

⁶³見若敬畏你，kap守你ê教示ê人，我kap in做伴。

⁶⁴耶和華ah，你ê慈愛遍滿地面；求你將你ê律例教示我。

⁶⁵耶和華ah，你bat好款待你ê奴僕，是照你所講ê話。

⁶⁶求你將好ê聰明kap知識，教示我；因為我信你ê誡命。

⁶⁷我bē受苦以前，有行迷路；總是我taⁿ守你ê話。

⁶⁸你是好，所行亦是好；求你將你ê律例教示我。

⁶⁹驕傲ê人造作無影話，攻擊我；總是我beh專心守你ê教示。

⁷⁰In ê心鈍，親像油包密；總是我歡喜你ê律法。

⁷¹我有受苦，是做我ê利益；因為beh hō͘我學習你ê律例。

⁷²你所講ê律法是做我ê利益；贏過千萬ê金銀。

⁷³你ê手創造我，chhiâⁿ-tî我；求你hō͘我智慧，thang學習你ê誡命。

⁷⁴敬畏你ê人看見我就beh歡喜；因為tī你ê話，我有ǹg望。

⁷⁵耶和華ah，我知你ê判斷是公義；你hō͘我受苦是對tī信實。

⁷⁶求你用你ê慈愛安慰我；照你對你ê奴僕所講ê話。

⁷⁷願你ê慈悲臨到我，hō͘我活；因為你ê律法是我所歡喜ê。

⁷⁸願驕傲ê人受見笑，因為in無理由枉屈我；總是我beh靜靜想你ê教示。

⁷⁹願敬畏你ê人歸向我；In就知你干證ê話。

⁸⁰願我ê心完全守你ê律例，Hō͘我不致見笑。

⁸¹我ê心神欣慕你ê救恩到暈去；總是tī你ê話，我有ǹg望。

⁸²我因為ǹg望你ê話，目睭花，講，你甚麼時beh安慰我？

⁸³因為我親像tī火薰中ê皮袋；總是我無bōe記得你ê律例。

⁸⁴你ê奴僕ê日子有jōa-chōe ah？你beh tī時審判窘迫我ê人。

⁸⁵驕傲ê人，就是無thàn你ê律法-ê，掘陷坑，beh害我。

⁸⁶你ê誡命一盡誠實；in無因端窘迫我；求你幫贊我。

⁸⁷In險險滅無我tī世間；總是我無放sak你ê教示。

⁸⁸求你照你ê慈愛hō͘我活；我就beh守你ê嘴干證ê話。

⁸⁹耶和華ah，你ê話安定tī天裡，直到永遠。

⁹⁰你ê誠實船到萬代；你建立地，地就長長tī-teh。

⁹¹照你ê定例，in到taⁿ iáu tī-teh；因為萬物lóng是你ê差用。

⁹²我若m̄是歡喜你ê律法，就早早tī我ê苦難中滅無lah。

⁹³我永永無bōe記得你ê教示；因為你用這hō͘我活。

⁹⁴我是你ê，求你救我；因為我chhē你ê教示。

⁹⁵Pháiⁿ人當等我，beh滅無我，總是我beh講究你干證ê話。

⁹⁶我看所有ê完全，lóng是有限；獨獨你ê命令極其開闊。

⁹⁷我疼惜你ê律法到怎樣ah！我thong日靜靜想。

⁹⁸你ê誡命常常kap我tī-teh，Hō͘我比我ê對敵khah有智慧。

⁹⁹我比我lóng總ê先生khah通達；因為我靜靜想你干證ê話。

¹⁰⁰我比老人khah明白，因為我守你ê教示。

¹⁰¹我禁我ê腳，一切ê pháiⁿ路無行；Hō͘我thang守你ê話。

¹⁰²我無偏離你ê判斷；因為你有教示我。

¹⁰³你ê話tī我ê chiūⁿ-kiuⁿ到jōa甜！Tī我ê嘴，比蜜khah甜。

¹⁰⁴我tùi你ê教示得tio̍h明白；所以我怨恨一切ê斜路。

¹⁰⁵你ê話做我腳前ê燈，做我路上ê光。

¹⁰⁶你公義ê判斷，我bat chiù-chōa beh遵守；我決斷án-ni行。

¹⁰⁷我受苦到極；耶和華ah，求你照你ê話hō͘我活。

¹⁰⁸耶和華ah，求你監納我ê嘴所歡喜獻ê o-ló，Koh將你ê判詞教示我。

¹⁰⁹我ê性命常常tú-tio̍h危險；Iáu-kú我無bōe記得你ê律法。

¹¹⁰Pháiⁿ人設羅網beh害我；總是我無偏離你ê教示。

¹¹¹我將你干證ê話，做永遠ê基業；因為這是我心內所歡喜ê。

¹¹²我hō͘我ê心專ǹg你ê律例；永遠遵thàn，直到路尾。

¹¹³兩樣心ê人是我所痛恨；獨獨你ê律法是我所疼惜。

¹¹⁴你是我閃bih ê所在，koh是我ê藤牌；我tī你ê話有ǹg望。

¹¹⁵做pháiⁿ ê人ah，lín tio̍h離開我；Hō͘我thang守我ê上帝ê誡命。

¹¹⁶求你照你ê話扶持我，hō͘我活；亦無hō͘我因為所ǹg望ê來見笑。

¹¹⁷求你扶持我，我就得救；我beh常常對重你ê律例。

¹¹⁸見若行叉路，離開你ê律例ê人，你看輕in；因為in ê詭詐是虛假。

¹¹⁹世間ê pháiⁿ人，你lóng kā in除去，親像渣滓；因為án-ni，我疼惜你干證ê話。

¹²⁰我因為驚畏你，我ê肉就chhoah；你ê判斷亦hō͘我驚惶。

¹²¹我秉公行義；求你m̄-thang將我放hō͘壓制我ê人。

¹²²求你保認你ê奴僕，thang得tio̍h好境遇；莫得hō͘驕傲ê人壓制我。

¹²³我因為ǹg望你ê救恩，kap你公義ê話，致到目睭花。

¹²⁴求你照你ê慈愛款待你ê奴僕；將你ê律例教示我。

¹²⁵我是你ê奴僕，求你hō͘我智慧；Hō͘我會知你干證ê話。

¹²⁶現今當是耶和華行tāi-chì ê時；因為人廢無你ê律法。

¹²⁷所以我疼惜你ê誡命，贏過金，亦贏過好金。

¹²⁸所以你一切ê教示，萬事，我lóng掠做正直；Koh我怨恨一切ê 斜路。

¹²⁹你干證ê話是奇妙；所以我ê心謹慎執守。

¹³⁰你ê話一下開拆，就發出光，Hō͘戇人通達。

¹³¹我開嘴直直喘；因為我切切欣慕你ê誡命。

¹³²求你oa̍t-tńg ǹg我，憐憫我；親像你平常款待hiah-ê敬愛你ê名ê人。

¹³³求你用你ê話hō͘我ê腳步穩當；莫容允甚麼罪惡管轄我。

¹³⁴求你救贖我，脫離人ê壓制，我就beh守你ê教示。

¹³⁵願你hō͘你ê面ê光照你ê奴僕；Koh將你ê律例教示我。

¹³⁶我ê目屎親像溪水teh流；因為in無守你ê律法。

¹³⁷耶和華，你是公義ê；你ê判斷亦是正直ê。

¹³⁸你所命令干證ê話，是照公義，極其誠實。

¹³⁹我ê心熱，親像火燒滅我；因為我ê對敵bōe記得你ê話。

¹⁴⁰你ê話鍛鍊到真精；所以你ê奴僕真意愛。

¹⁴¹我卑微，hō͘人看輕，總是我無bōe記得你ê教示。

¹⁴²你ê公義是永遠ê公義；你ê律法是真實。

¹⁴³我tú-tio̍h患難憂苦；總是你ê誡命是我所歡喜ê。

¹⁴⁴你干證ê話永遠是公義；求你hō͘我智慧，我就會活。

¹⁴⁵耶和華ah，我專心求叫你，求你應我；我beh謹慎守你ê律例。

¹⁴⁶我對你求叫，求你救我；我就beh守你干證ê話。

¹⁴⁷我thàn天 bē光求叫你；Tī你ê話我有ǹg望。

¹⁴⁸暝時，更iáu未深，我ê目睭已經nih開；因為beh靜靜想你ê話。

¹⁴⁹求你照你ê慈愛，聽我ê聲；耶和華ah，求你將你ê判斷，hō͘我能活。

¹⁵⁰慣練行pháiⁿ ê人逼óa來；In離開你ê律法遠遠。

¹⁵¹耶和華ah，你是近近；你ê誡命lóng是真實。

¹⁵²我講究你干證ê話，早早已經知，是你立定到永遠ê。

¹⁵³求你看顧我ê苦難，來牽救goa；因為我無bōe記得你ê律法。

¹⁵⁴求你kā我伸冤，救贖我；照你ê話hō͘我活。

¹⁵⁵救恩離開pháiⁿ人遠遠；因為in無chhē你ê律例。

¹⁵⁶耶和華ah，你ê慈悲是大；求你照你ê判斷hō͘我活。

¹⁵⁷窘迫我ê，抵敵我ê，真chōe，總是我無偏離你干證ê話。

¹⁵⁸我看見奸惡ê人，就真厭惡；因為in無守你ê話。

¹⁵⁹你看我怎樣疼惜你ê教示；耶和華ah，求你照你ê慈愛hō͘我活。

¹⁶⁰你ê話ê總根頭是真實；你一切公義ê判斷是永遠tī-teh。

¹⁶¹貴族無因端窘迫我；總是我ê心驚畏你ê話。

¹⁶²我歡喜你ê話，親像人得tio̍h chōe-chōe thâi贏ê物。

¹⁶³白賊話是我所痛恨，所厭賤ê；你ê律法是我所疼惜-ê。

¹⁶⁴我因為你公義ê判斷，Ta̍k日七pái o-ló你。

¹⁶⁵疼惜你ê律法ê人有大平安，無一項能纏絆in ê腳。

¹⁶⁶耶和華ah，我有teh ǹg望你ê救恩，有行你ê誡命。

¹⁶⁷我ê心有守你干證ê話，Chiah-ê話，我盡在意愛。

¹⁶⁸我有守你ê教示，kap你干證ê話；因為我一切所行ê，lóng tī你ê面前。

¹⁶⁹耶和華ah，願我求叫ê聲透到你ê面前；求你照你ê話，賞賜我智慧。

¹⁷⁰願我懇求ê話到你ê面前；求你照你ê話牽救我。

¹⁷¹願我ê嘴唇發出o-ló ê話，因為你將你ê律例教示我。

¹⁷²願我ê舌唱歌o-ló你ê話；因為你一切ê誡命lóng是公義。

¹⁷³願你伸手幫贊我；因為我有揀你ê教示。

¹⁷⁴耶和華ah，我切切欣慕你ê救恩；你ê律法亦是我所歡喜ê。

¹⁷⁵願我活teh，我ê神魂就beh o-ló你；願你ê判斷幫贊我。

¹⁷⁶我迷路親像phah-m̄見ê羊；求你chhē你ê奴僕；因為我無bōe記得你ê誡命。