Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 詩篇 136 Bible Online

詩篇 136 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

詩篇 136

¹Lín tio̍h感謝耶和華，因為伊是好；因為伊ê慈愛永遠tī-teh。

²Lín tio̍h感謝chiah-ê上帝 ê上帝；因為伊ê慈愛永遠tī-teh。

³Lín tio̍h感謝萬主ê主；因為伊ê慈愛永遠tī-teh。

⁴感謝hit-ê家己行大奇事ê；因為伊ê慈愛永遠tī-teh。

⁵感謝hit-ê用智慧創造天ê；因為伊ê慈愛永遠tī-teh。

⁶感謝hit-ê鋪地tī水ê頂面ê；因為伊ê慈愛永遠tī-teh。

⁷感謝hit-ê創造大ê光體ê；因為伊ê慈愛永遠tī-teh。

⁸就是日頭來管日時；因為伊ê慈愛永遠tī-teh；

⁹月kap星管暝時；因為伊ê慈愛永遠tī-teh。

¹⁰感謝hit-ê phah死埃及人ê大kiáⁿ ê；因為伊ê慈愛永遠tī-teh。

¹¹Chhōa以色列人tùi in中間出來ê；因為伊ê慈愛永遠tī-teh。

¹²用大權能ê手kap伸出來ê手骨；因為伊ê慈愛永遠tī-teh。

¹³感謝hit-ê分開紅海ê；因為伊ê慈愛永遠tī-teh。

¹⁴也chhōa以色列tùi hit-ê中間經過ê；因為伊ê慈愛永遠tī-teh。

¹⁵將法老kap伊ê軍兵hiat tī紅海ê；因為伊ê慈愛永遠tī-teh。

¹⁶感謝hit-ê chhōa伊ê百姓行tī曠野ê；因為伊ê慈愛永遠tī-teh。

¹⁷感謝hit-ê phah死大君王ê；因為伊ê慈愛永遠tī-teh。

¹⁸thâi死有名聲ê王ê；因為伊ê慈愛永遠tī-teh。

¹⁹thâi死A-mô͘-lī 王Se-hông；因為伊ê慈愛永遠tī-teh。

²⁰Koh thâi死Pa-san 王Go̍k；因為伊ê慈愛永遠tī-teh。

²¹將in ê地賞賜做業；因為伊ê慈愛永遠tī-teh。

²²就是賞賜伊ê奴僕以色列做業；因為伊ê慈愛永遠tī-teh。

²³伊siàu念咱tī卑微ê位；因為伊ê慈愛永遠tī-teh。

²⁴拯救咱脫離咱ê對敵；因為伊ê慈愛永遠tī-teh。

²⁵I賞賜米糧hō͘見有血氣ê；因為伊ê慈愛永遠tī-teh。

²⁶Lín tio̍h感謝天頂ê上帝；因為伊ê慈愛永遠tī-teh。