Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 詩篇 31 Bible Online

詩篇 31 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

詩篇 31

¹大衛ê詩；交hō͘樂官。1) 耶和華ah，我óa靠你，求你hō͘我永永無見笑；照你ê公義拯救我。

²求你àⁿ耳孔聽我，緊緊來救我；做我堅固ê石磐，做拯救我ê衛所。

³因為你是我ê山巖，我ê山寨。所以求你因為你ê名來引chhōa我，指點我。

⁴人暗靜張羅網beh網我，求你救我脫離；因為你是我ê衛所。

⁵我將我ê靈魂交tī你ê手；耶和華真實ê上帝ah，你有救贖我。

⁶我怨恨hiah-ê信奉虛假ê人；獨獨我óa靠耶和華。

⁷我因為你ê慈愛beh歡喜快樂；因為你有看見我ê艱苦，知我心神ê艱難。

⁸你bē-bat將我交tī對敵ê手；你hō͘我ê腳khiā tī開闊ê所在。

⁹耶和華ah，我tī患難中，求你憐憫我；我ê目睭因為憂悶phah-pháiⁿ，我ê心神，我ê身體，亦是án-ni。

¹⁰我ê性命因為憂苦來消無，我ê年歲為tio̍h吐氣亦án-ni；我ê氣力因為我ê罪惡來衰lám；我ê骨頭亦枯焦。

¹¹我因為我一切ê對敵成做凌辱；Tī我ê厝邊tau koh-khah傷重；hiah-ê bat我ê人lóng驚我；Tī外面看見我ê人走閃離開我。

¹²我親像死人hō͘人bōe記得，無人siàu念；我親像破碎ê器具。

¹³因為我聽見chōe-chōe人ê譭謗，四圍lóng是驚惶；In相kap參詳攻擊我ê時，就計謀beh害我ê性命。

¹⁴耶和華ah，我猶原óa靠你；我講，你是我ê上帝。

¹⁵我ê遭遇tī你ê手；求你救我脫離我ê對敵ê手，以及窘迫我ê人。

¹⁶求你hō͘你ê面照光你ê奴僕；照你ê慈愛拯救我。

¹⁷耶和華ah，求你hō͘我無見笑；因為我有求叫你。求你hō͘ pháiⁿ人見笑，hō͘ in tī陰間穿chauh-chauh。

¹⁸願你hō͘ hiah-ê白賊ê嘴piàn啞口；就是驕傲看輕，lām-sám侮慢義人ê。

¹⁹敬畏你ê人，你為tio̍h in所積聚ê恩惠，為tio̍h óa靠你ê人，tī世間人ê面前，所施行ê恩惠，怎樣hiah大！

²⁰你beh將in khǹg tī你ê面前隱密ê所在；免致tú-tio̍h人ê計謀；你beh暗靜保守in tī帳帷內，免受嘴舌ê爭辯。

²¹耶和華是應該o-ló-ê，因為伊tī堅固ê城對我施出伊奇妙ê慈愛。

²²論到我，我bat著急講，tùi你ê目睭前，我受隔斷；總是我求叫你ê時，你猶原聽我懇求ê聲。

²³耶和華聖ê百姓ah，lín lóng tio̍h疼伊；耶和華保守誠實ê人，重重報應行驕傲ê人。

²⁴見若ǹg望耶和華ê人，Lín tio̍h壯膽，lín ê心tio̍h堅固。