Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 詩篇 35 Bible Online

詩篇 35 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

詩篇 35

¹大衛ê詩。1) 耶和華ah，kap我相爭ê，求你kap in相爭；Kap我交戰-ê，求你kap in交戰。

²The̍h大細ê藤牌，起來幫贊我。

³抽出鎗，阻止hiah-ê追趕我ê；Tùi我ê神魂講，我是拯救你ê。

⁴願hiah-ê siàu想我ê性命ê人受見笑凌辱；願hiah-ê計謀害我ê人oa̍t倒tńg漏氣。

⁵願in親像風吹ê粗糠；有耶和華ê使者teh趕in。

⁶願in ê路暗koh滑，有耶和華ê使者teh趕in。

⁷因為in無因端為我暗設羅網tī坑內，無因端ku̍t陷坑beh害我ê性命。

⁸願tī伊無phah算ê時，災厄到伊ê身上；願伊暗設 ê羅網纏tio̍h伊家己；願伊跋落hí內面，受害。

⁹就我ê心beh tī耶和華來快樂；Tī伊ê救恩來歡喜。

¹⁰我ê骨頭lóng beh講，耶和華ah，chī-chūi ōe親像你？你拯救困苦ê人，脫離hiah-ê比伊khah強ê；拯救困苦kap sòng-hiong ê人脫離hiah-ê搶奪伊ê。

¹¹兇惡ê干證ê起來；我所m̄知ê事，in查問我。

¹²In對tī我用pháiⁿ報好：Hō͘我ê神魂孤單。

¹³論到我，當in破病ê時，我就穿麻衫，用禁食刻苦我ê心神；我所求ê，lóng歸tī家己ê心懷。

¹⁴我án-ni行，親像伊是我ê朋友，我ê兄弟；我屈落身軀悲哀，親像人為tio̍h老母哀傷。

¹⁵我tú-tio̍h患難，in就歡喜，相kap聚集；我所m̄相識ê 下等人聚集攻擊我；In khiú-la̍k我無soah。

¹⁶In親像戲hiauh，pián食ê無hē落人，對我咬嘴齒根。

¹⁷主ah，你定定teh看，beh到jōa久？求你救我ê神魂脫離in ê殘害，救我ê性命脫離猛ê獅á-thûn。

¹⁸我tī大聚會ê中間beh感謝你；Tī眾百姓ê中間beh o-ló你。

¹⁹求你莫得容允hiah-ê無理由對敵我ê，對我誇口；莫得容允hiah-ê無因端怨恨我ê gîn我。

²⁰因為in無講和平ê話；就是計謀詭譎ê話；害地上安份ê人。

²¹In大大開嘴攻擊我；講，Ho͘h-chāi！Ho͘h-chāi！阮ê目睭已經看見lah。

²²耶和華ah，你已經看見；求你m̄-thang靜靜；主ah，m̄-thang離開我。

²³我ê上帝，我ê主ah，求你精神，起來；判決我ê事，辨理我ê案。

²⁴耶和華我ê上帝ah，求你照你ê公義判斷我；莫得容允in對我誇口。

²⁵莫得容允in心內講，Ho͘h-chāi，照阮ê心願lah；莫得容允in講，阮已經kā伊吞落去lah。

²⁶願hiah-ê歡喜我tú-tio̍h患難ê，lóng見笑漏氣；願hiah-ê對我家己尊大ê，受見笑lak臉。

²⁷願hiah-ê ài我得tio̍h伸冤ê人，出歡喜ê聲快樂；願in常常講，tio̍h尊耶和華做大。因為伊歡喜伊ê奴僕平安。

²⁸我ê舌beh講起你ê義，Thong日o-ló你。