Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 詩篇 40 Bible Online

詩篇 40 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

詩篇 40

¹大衛ê詩，交hō͘樂官。1) 我bat吞忍thèng候耶和華；伊àⁿ落ǹg我，聽我ê求叫。

²伊tùi thang驚ê陷坑，tùi土糜中，牽我起來；Hō͘我ê腳khiā tī石磐頂，hō͘我ê腳步在伍。

³伊hō͘我ê嘴唱新ê歌，就是o-ló阮ê上帝ê；Chōe-chōe人beh看見來驚畏，亦beh óa靠耶和華。

⁴獨獨óa靠耶和華，無chhap hiah-ê驕傲，以及偏ǹg虛假ê人，Chit號人有福氣。

⁵耶和華我ê上帝ah，你所行ê奇事，以及你對阮所存ê念頭真chōe；Bōe能對你排列；我若beh提起來講，Hit-ê數額算bōe了。

⁶祭祀kap禮物你無歡喜；你有開我ê耳孔；燒祭kap贖罪祭，你無ài-ti̍h：

⁷Hit時我講，你看，我來lah；我ê事已經記tī冊裡。

⁸我ê上帝ah，你ê旨意我歡喜thàn；你ê律法tī我ê心內。

⁹我tī大聚會ê中間，宣傳公義ê好消息；我無beh停止我ê嘴唇；耶和華ah，這是你所知ê。

¹⁰我bē-bat將你ê公義蓋密tī我ê心內；我已經排列你ê信實，kap你ê救恩。我對大聚會bē-bat隱khǹg你ê慈愛kap誠實。

¹¹耶和華ah，求你m̄-thang對我停止你ê慈悲；願你ê慈愛kap誠實常常保護我。

¹²因為有bōe算得ê災厄圍困我；我ê罪惡jip-tio̍h我，hō͘我bōe能kia̍h目；Chiah-ê罪惡比我ê頭毛khah-chōe；我ê心續離開我。

¹³耶和華ah，求你歡喜拯救我；耶和華ah，求你緊緊幫贊我。

¹⁴願hiah-ê siàu想beh害我性命ê做一下見笑，漏氣；願hiah-ê歡喜我受陷害ê，oa̍t倒tńg受凌辱。

¹⁵願hiah-ê對我講，Ho͘h-chāi，Hhouh-chāi ê，因為見笑來敗無。

¹⁶願一切chhē你ê，因為你來歡喜快樂；願hiah-ê欣慕你救恩-ê常常講，Tio̍h尊耶和華做大。

¹⁷總是我是困苦sòng-hiong-ê，主iáu-kú siàu念我；你是幫贊我ê，拯救我ê；我ê上帝ah，求你m̄-thang延chhiân。