Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 詩篇 59 Bible Online

詩篇 59 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

詩篇 59

¹掃羅差人去埋伏大衛ê厝，beh thâi伊；hit時大衛做chit-ê金ê詩；交hō͘樂官；調用「莫得毀壞」。1) 我ê上帝ah，求你救我脫離我ê對敵；安置我tī高ê所在，得tio̍h脫離hiah-ê起來攻擊我ê人。

²求你救我脫離做pháiⁿ ê人，Koh救我脫離ài thâi-死人ê人。

³因為in埋伏beh害我ê性命；有猛人聚集來攻擊我；耶和華ah，這m̄是因為我ê過失，亦m̄是因為我ê罪過。

⁴我雖然無過失，in走來，備辦beh害我；求你精神起來幫贊我，來鑑察。

⁵萬軍ê上帝耶和華，就是以色列ê上帝ah，求你起來，辨理萬國；m̄-thang憐憫見若行奸詐ê pháiⁿ人。[Sè-la̍h]

⁶In ê-hng時tò來，喉叫親像狗；Tī城裡四界行。

⁷In ê嘴吐出pháiⁿ話，嘴唇有刀。因為in講，Chī-chūi聽見？

⁸但是你耶和華beh笑in，你beh chhìn笑列邦。

⁹我ê氣力ah，我beh ǹg望你；因為上帝是我ê高台。

¹⁰我ê上帝beh用慈愛迎接我；上帝beh hō͘我看見我ê對敵受報應。

¹¹莫得剿滅in，驚見我ê百姓bōe記得；主ah，阮ê藤牌ah，求你用你ê氣力，hō͘ in四散，koh降低。

¹²因為in嘴ê罪過kap嘴唇ê話，以及in所講ê咒罵kap白賊，願in tī驕傲ê中間受掠tio̍h。

¹³求你受氣剿滅in，剿滅in，到lóng無去；Hō͘ in知上帝tī雅各ê中間掌權，到tī地極。[Sè-la̍h]

¹⁴In ê-hng時tò來，喉叫親像狗；Tī城裡四界行。

¹⁵In beh走來走去chhē食物；若無得tio̍h飽，就thong暝thèng候。

¹⁶但是我beh唱歌o-ló你ê氣力，早起時beh大聲o-ló你ê慈愛；因為你bat做我ê高台，Tī患難ê日，做我逃閃ê所在。

¹⁷我ê氣力ah，我beh唱歌o-ló你；因為上帝是我ê高台，是我慈愛ê上帝。