Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 箴言 16 Bible Online

箴言 16 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

箴言 16

¹心ê計謀在tī人，舌ê應答是tùi耶和華。

²人一切ê所行家己看做清氣，獨獨耶和華測度人ê心。

³你所做ê lóng tio̍h交託耶和華；你所計謀ê就會穩當。

⁴耶和華所造-ê lóng合伊ê路用；連pháiⁿ人也合tī災厄ê日。

⁵見若心驕傲-ê是耶和華所厭惡，雖然手khan手也bōe免受刑罰。

⁶Tùi憐憫kap誠實，罪過得tio̍h贖回；Tùi敬畏耶和華就離開pháiⁿ-tāi。

⁷人ê所行若hō͘耶和華歡喜，連伊ê對敵耶和華也hō͘ in kap伊和。

⁸Chōe-chōe錢也無義，m̄值tio̍h少少錢koh有公義。

⁹人ê心計畫伊ê路，獨獨耶和華定tio̍h伊ê腳步。

¹⁰王ê嘴內有神ê話，審判ê時伊ê嘴就無chha-chhok。

¹¹公道ê天秤kap秤，lóng屬耶和華，袋á內一切ê鉈子lóng是伊所定tio̍h。

¹²做pháiⁿ是王所厭惡，因為座位是tùi公義來堅固。

¹³公義ê嘴唇是王所歡喜，講話正直ê是王所疼。

¹⁴王ê大受氣親像hō͘人死ê使者，獨獨智慧ê人會hō͘伊soah。

¹⁵王ê面色ê光hō͘人有活命，王ê恩典親像春雨ê雲。

¹⁶得tio̍h智慧比得tio̍h金加jōa好；揀tio̍h聰明比得tio̍h銀iáu khah好。

¹⁷正直ê人ê大路是離開pháiⁿ；謹慎守伊ê路ê，是保全伊ê性命。

¹⁸驕傲是失敗ê事先；自高ê心就是跋倒ê事先。

¹⁹心謙卑kap sòng-hiong人相kap tòa，贏過kap驕傲ê人相kap分所搶ê物。

²⁰致意tī道理-ê beh得tio̍h利益，óa靠耶和華ê有福氣。

²¹心智慧-ê稱做通達；好口才ōe加添人ê學問。

²²人有明理就有活命ê水泉；戇人ê責罰就是伊ê戇。

²³智慧ê人ê心教示伊ê嘴；Koh kā伊ê嘴唇加添學問。

²⁴婉轉ê話親像蜜房；心知甜hō͘骨爽快。

²⁵有一條路人看做正直；到尾成做死無ê路。

²⁶腹肚iau是勉勵做工ê人做工；因為伊ê口腹逼伊。

²⁷無路用ê人圖謀損害；伊ê嘴唇親像有火teh燒。

²⁸乖僻ê人四界起相爭，學話ê人hō͘親密ê朋友冷淡。

²⁹強暴ê人引誘厝邊，chhōa伊行m̄好ê路。

³⁰Ba̍k-就放-khoeh teh圖謀乖僻，嘴唇合óa來成hit-ê pháiⁿ事。

³¹白頭毛是súi ê冕旒，Tī義ê路能chhē-tio̍h。

³²無快快受氣贏過勇士，管轄家己ê心ê贏過取tio̍h城ê。

³³Liam-khau在tī人，定tio̍h tāi-chì lóng tùi耶和華。