Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 傳道書 1 Bible Online

傳道書 1 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

傳道書 1

¹Tī耶路撒冷做王，大衛ê kiáⁿ，傳道ê話。

²傳道ê講，空虛ê空虛；空虛ê空虛；凡事lóng是空虛。

³人一切ê tio̍h磨，就是伊tī日光ê下面所tio̍h磨ê有甚麼利益ah？

⁴一代過去，koh一代來，總是地猶原tī-teh。

⁵日出，日落，緊緊走倒tńg伊所出來ê所在。

⁶風吹ǹg南，koh倒tńg ǹg北，轉旋無soah，也倒tńg tī伊轉旋ê環。

⁷江河lóng流落海，總是海也無滿；江河流到toh落，就koh流到hia。

⁸萬事勞苦到極，人講bōe盡；目睭看，看bōe飽，耳孔聽，聽bōe tīⁿ。

⁹所beh有ê，是前已經有，所beh做ê是前已經做；tī日光ê下面無有新ê事。

¹⁰kiám有甚麼事，人thang kí伊講，你看chit-ê是新ê？Tī咱以前ê世代，早早已經有lah。

¹¹已經過ê世代，無人記得；將來ê世代，後來ê人也bōe記得。

¹²我傳道ê，bat tī耶路撒冷做以色列王。

¹³我專心用智慧研究查考天下所做一切ê事，就知上帝所hō͘人tio̍h磨ê是苦痛ê tio̍h磨。

¹⁴我看見日光ê下面所做一切ê事；看ah，lóng是空虛，lóng是掠風。

¹⁵彎曲ê bōe能hō͘伊直，缺陷ê bōe能算得。

¹⁶我ê心內想講，看ah，我得tio̍h大智慧，贏過我以前一切tī耶路撒冷ê人；koh我心歷過chōe-chōe智識kap知bat。

¹⁷我專心致意ài知智慧，ài知顛狂kap愚戇，就知這也是掠風。

¹⁸因為chōe-chōe智慧就chōe-chōe煩惱，加添知bat就加添憂傷。