Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 傳道書 4 Bible Online

傳道書 4 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

傳道書 4

¹我koh oa̍t-tńg看，tī日光ê下面所行一切ê壓迫，看ah，受壓迫ê流目屎，koh無人安慰；壓迫in ê勢力，也無人安慰in。

²因為án-ni我o-ló hiah-ê已經死ê死人，贏過hiah-ê iáu活teh ê活人。

³Koh hit-ê iáu未出世ê，就是bē看見日光ê下面所做ê pháiⁿ-tāi-ê，我看伊，比chit兩等號iáu khah好。

⁴我koh看見人為tio̍h一切ê tio̍h磨，kap ta̍k樣奇巧ê工，就hō͘厝邊怨妒；這也是空虛，也是掠風。

⁵愚戇ê人手phah叉，食家己ê肉。

⁶一手滿滿也有平安，贏過兩手滿滿來勞碌掠風。

⁷我koh oa̍t-tńg看tī日光ê下面有空虛ê事。

⁸有人孤單無兩個，無kiáⁿ也無兄弟，竟然勞碌無soah，伊ê目睭無看錢財做到-額。伊講，我勞碌刻苦家己，無享福，到底為chī-chūi ah？這也是空虛，也是極重ê勞苦。

⁹兩人總比一人khah好，因為in相kap tio̍h磨得tio̍h好ê效果。

¹⁰若是跋倒，chit人thang扶伊ê同伴起來；若是單身來跋倒，無別人扶伊起來，chit人就有災厄。

¹¹Koh，兩人相kap睏，就會燒lō；若家己一人，thái-thó會燒ah？

¹²單單一人就人會phah贏伊，若有兩人就會抵擋伊；三股ê索無快快斷。

¹³Sòng-hiong koh有智慧ê少年人，贏過年老m̄肯受諫諍戇ê王。

¹⁴Chit-ê人是tùi監內出來做王；tī伊ê國內，出世是sòng-hiong人，

¹⁵我看tī日光ê下面teh行ê活人，lóng thàn hit-ê少年人，就是第二個，續接伊ê位ê。

¹⁶伊所管ê百姓chōe-chōe，bōe算得；後來ê人無為tio̍h伊來歡喜。這也是空虛，也是掠風。