Read 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization 傳道書 9 Bible Online

傳道書 9 - 巴克禮台語聖經漢羅 1933 - Barclay Taiwanese Bible, 1933 - Mixed Sino-Romanization bible

傳道書 9

¹我將這一切ê事hē tī心裡，beh詳細查考；就知義ê人kap智慧ê人，kap in ê所做lóng tī上帝ê手，或是疼或是怨恨，lóng tī in ê頭前，人m̄知。

²凡若臨到眾人ê事，lóng是一樣；義人kap pháiⁿ人lóng tú-tio̍h一樣ê事；好人kap清氣ê人，kap無清氣ê人；獻祭ê人kap無獻祭ê人，也是一樣；好人án-ni，罪人也án-ni；chiù-chōa-ê án-ni，驚chiù-chōa-ê也án-ni。

³Tī日光ê下面所行一切ê事，有一項pháiⁿ-tāi，就是眾人所tú-tio̍h ê，lóng是一樣；koh世間人ê心有pháiⁿ滿滿，活ê時心內顛狂，後來就歸tī死人hit位。

⁴見若屬tī活ê人hit人iáu有ǹg望，因為活ê狗贏過死ê獅。

⁵活ê人知會死；死ê人lóng m̄知，也無得tio̍h報賞，in ê名人bōe記得。

⁶也in ê疼，也in ê怨恨，也in ê妒忌，lóng已經消無tī日光ê下面所行一切ê事，in永遠無份。

⁷做你去歡喜食你ê飯，用快樂ê心lim酒，因為上帝已經接納你ê所做。

⁸你ê衣服tio̍h常常白，你抹頭殼ê油也m̄-thang欠缺。

⁹Tī你一生空虛ê日子，就是上帝賞賜你tī日光ê下面空虛ê日子，tio̍h kap你所疼ê婦人人快樂過日；因為he是你生前，tī日光ê下面，勞碌ê事所得tio̍h ê福份。

¹⁰見若你ê手所應該做ê事，tio̍h盡力去做；因為tī你所beh去ê陰間，無做工，無計畫，無知bat，也無智慧。

¹¹我koh oa̍t-tńg想tī日光ê下面gâu走ê無的確會先到，有力ê無的確會khah贏，智慧ê無的確會得tio̍h米糧，明理ê，無的確會得tio̍h好額，奇巧ê無的確會得tio̍h恩典；in所tú-tio̍h-ê lóng在tī時期kap偶然ê。

¹²因為人ê時期伊家己m̄知，親像魚不幸hō͘網圍tio̍h，鳥hō͘羅網當tio̍h，災厄忽然到ê時，世間人陷落tī hit內面，也是án-ni。

¹³我看見日光ê下面有一項智慧，照我看是真大。

¹⁴就是有一個細細ê城，hit中間人少少；有大ê君王來攻擊伊，圍困伊，koh起高ê土堆來攻擊伊。

¹⁵城內有一個sòng-hiong koh也有智慧ê人，伊用智慧救hit-ê城；總是無人記念hit-ê sòng-hiong人。

¹⁶我就講，智慧贏過氣力；總是hit-ê sòng-hiong人ê智慧hō͘人看輕，伊ê話也無人聽伊。

¹⁷智慧ê人tī安靜中講話，比戇人ê頭目大聲嚷khah有人聽。

¹⁸智慧贏過交戰ê軍器；總是一個有罪ê人會敗壞真chōe好事。